104
1 Hemdusana éytqin Perwerdigargha, ey jénim! Ey Perwerdigar Xudayim, némidégen ulughsen,
izzet-hörmet we shan-sherep bilen oralghansen.
2 Sen nurni kiyimdek kiygen,
asmanni chédirdek yayghansen.
3 Sen qesringning tüwrüklirini
sularning üstide ornatqansen,
bulutlarni Özüngge harwa qilip,
shamalning qanatliri üstide mangisen.
4 Sen perishtiliringni shamal,
xizmetkarliringni ot yalquni qilisen.
5 Sen yerni ulliri üstige ornatqansen.
U ebedil’ebed héch tewrenmes.
6 Uni chongqur sular bilen tongha orighandek oriding.
Sular égiz taghlarning üstide turdi.
7 Sular Séning tehditliring bilen yénip,
Séning güldürmama awazingdin beder qachti.
8 Taghlar örlep, wadilar chüshüp,
Sen ulargha békitken makangha jaylashti.
9 Sen sular zéminni yene bésiwalmisun dep
ulargha ötelmeydighan bir chégra békitting.
10 Sen wadilargha bulaq sulirini éqitisen.
Ular taghlarning arisida aqidu.
11 Ular daladiki hemme janiwarlarni sughiridu.
Yawa éshekler u yerde ussuzluqini qanduridu.
12 Asmandiki qushlar ularning boylirigha qonup,
derex shaxliri arisida sayrishidu.
13 Sen Öz égizlikingdin taghlarni sugharghachqa,
zémin Sen östürgen méwiler bilen toldurulidu.
14 Sen charwa mallar üchün ot-chöp ündürüp,
insanlar üchün zira’et-köktatlarni östürüp,
yerdin ashliq chiqirisen.
15 Ademning könglini xush qilidighan sharabni,
yüzini parqiritidighan yaghni,
shundaqla insanning yürikige quwwet béridighan nanni chiqirip bérisen.
16 Perwerdigarning derexliri,
yeni U Özi tikken Liwanning kédir derexliri
sugha qandurulidu.
17 Qushlar u yerde uwilirini yasaydu,
leyleklar qarighay derexliride makan tutidu.
18 Égiz taghlar yawa tékilerning makani bolidu,
qoram tashlar tagh chashqanlirining panahgahi bolidu.
19 Sen pesillerni ayrish üchün ayni,
patidighan waqtini bilidighan quyashni yaratting.
20 Sen qarangghuluq chüshürseng, kéche bolidu.
ormanlardiki haywanlar shipirlap yürüshidu.
21 Yash shirlar olja izdep hörkirep, Xudadin riziqlirini tileydu.
22 Kün chiqqanda, ular öz uwilirigha qaytip kélip yatidu.
23 Adem bolsa öz ishigha chiqidu,
axshamghiche méhnet qilidu.
24 Ey Perwerdigar, Séning yaratqan mexluqatliring neqeder köp!
Hemmisini hékmet bilen yaratqansen.
Dunya Séning bayliqliring bilen tolghandur.
25 Mana, bipayan we kengri déngiz,
uning ichide üzidighan sansiz chong-kichik janiwarlar bardur.
26 Uning üstide kémiler üzüp yüridu.
Uningda oynisun dep Sen yaratqan Léwi’atanmu tépilidu. ◼
27 Yémeklikimizni öz waqtida béridu dep,
ularning hemmisi Séni kütüp turidu.
28 Sen ulargha berseng, ular tériwalidu.
Qolungni achsang, ular yaxshi németlerge toyidu.
29 Yüzüngni yoshursang, ular perishan bolidu.
Nepeslirini alsang, ular ölüp, yene tupraqqa qaytidu.
30 Rohingni ewetseng, ular yaritilidu.
We Sen yer yüzini yéngilaysen.
31 Perwerdigarning shan-sheripi ebediydur,
Perwerdigar Öz yaratqanliridin xursen bolghay.
32 U yerge nezer salsa, yer titreydu,
taghlargha qol tegküzse, ulardin tütün chiqidu.
33 Men ömür boyi Perwerdigar üchün naxsha éytimen.
Mewjutla bolsam Xudayimgha medhiye naxshilirini éytimen.
34 Oy-xiyallirim Uninggha yéqimliq bolsun.
Men Perwerdigardin shadlinimen.
35 Gunahkarlar yer yüzidin yoq bolup ketsun,
yamanlar hergiz qalmisun.
Perwerdigarni medhiyiligin, ey jénim.
Perwerdigargha hemdusanalar bolsun! ◼