106
1 Perwerdigargha hemdusanalar bolsun! Perwerdigargha shükür éytinglar, chünki U méhribandur,
Uning méhir-shepqiti ebediydur.
2 Kimmu Perwerdigarning qudretlik ishlirini toluq bayan qilip,
Uninggha bolghan barche rehmitini ipadiliyeleydu?
3 Her da’im adaletni yaqlaydighan
we heqqaniy ish qilidighan kishi neqeder bextliktur!
4 Ey Perwerdigar, Öz xelqingge körsetken shapa’iting bilen méni esligin,
nijatliqing bilen manga kelgin.
5 Shundaq qilsang, men tallighanliringning bext-sa’aditini körüp,
xelqingning shadliqida shadlinip,
mirasing bolghan millet bilen pexirlinimen.
6 Biz ata-bowilirimizdek gunah ötküzduq,
xata ish qilip yamanliq qilduq.
7 Ata-bowilirimiz Misirda ajayip ishliringgha etiwar bermidi,
köpligen merhemetliringni ésige almidi.
Ular déngiz boyida, Qizil dengiz boyida isyan qildi.
8 Shundaq bolsimu, U qudritim namayan bolsun dep,
ularni Öz nami üchün qutquzdi.
9 U qizil déngizgha höküm qilip uni qurutti,
ularni chöldin ötküzgendek déngiz astidin ötküzdi.
10 U ularni öch körgenlerning qolidin chiqirip,
düshmenlirining changgilidin qutuldurdi.
11 Emma düshmenlirini su basti,
héchbiri hayat qalmidi.
12 Shuning bilen ular Uning sözige ishendi,
Uni medhiyilep naxshilar éytti.
13 Lékin ular Uning qilghan ishlirini tézla untudi,
Uning yolyoruqlirini kütmidi.
14 Ular chölde ach közlükke bérildi,
chöl-bayawanda Xudani sinidi.
15 U ularning telep qilghinini berdi,
biraq ulargha jénini qurutidighan waba ewetti.
16 Bargahta ular heset qilishti Musagha
we Perwerdigarning muqeddisi bolghan Harungha.
17 Yer yérilip Datanni yutuwaldi,
Abiramning ademlirini kömüwetti.
18 Ularning jama’itige ot tutashti,
ot yalquni yamanlarni köydürüwetti.
19 Ular Xorébta bir mozay butni yasidi,
shu quyma heykelge sejde qilishti.
20 Ular özlirining pexiri-shöhritini
ot-chöp yeydighan kalining butigha tégishti.
21 Ular Misirda ulugh ishlarni qilghan,
ularning nijatkari bolghan Xudani untudi.
22 Ham zéminida möjizilerni körsetken,
Qizil déngiz boyida heywetlik ishlarni qilghan Xudani untup qaldi.
23 U: «Ularni halak qilay» dégende,
Özi tallighan Musa Uning aldigha chiqip tosup, Uning achchiqini yandurmighan bolsa,
U ularni halak qilghan bolar idi.
24 Ular güzel zéminnimu közge ilmay ret qildi,
Uning sözige ishenmidi.
25 Ular chédirlirida ghotuldiship,
Perwerdigarning awazigha qulaq salmidi.
26 Shunga U ulargha qarshi qolini kötürüp:
«Men ularni chölde urup yiqitimen,
27 uruq-ewladini yat xelqler arisida tügeshtürimen,
yer-yüzidiki ellerge ularni tarqitiwétimen» dédi.
28 Ular Ba’al-Pé’orgha egiship choqunup,
ölgenlerge atalghan qurbanliqlarni yédi.
29 Ular öz emelliri bilen Xudaning ghezipini qozghighachqa,
waba ularning üstige yaghdi.
30 Pinixas ornidin turup höküm yürgüzdi.
Shuning bilen waba toxtidi.
31 Bundaq qilghini üchün u heqqaniy dep hésablandi.
Bu nesildin nesilge, menggüge dawam qilidu.
32 Meriba sulirining boyida
ular yene Perwerdigarni ghezeplendürdi.
Ularning sewebidin Musaghimu zerer yetti.
33 Chünki ular Uning Rohini tériktürgechke,
Musa lewliri bilen oylimayla sözlep saldi.
34 Perwerdigar halak qilinglar dégen xelqlerni
ular halak qilmidi.
35 Belki ular bu yat xelqler bilen ariliship,
ularning qilmish-etmishlirini ögendi.
36 Ularning butlirigha ibadet qilishti we bu özlirige tuzaq boldi.
37 Ular öz oghul-qizlirini jinlargha atap qurbanliq qildi.
38 Ular bigunah qanni, yeni öz oghul-qizlirining qénini töküp,
ularni Ken’anning butlirigha atap qurbanliq qildi.
Zémin tökülgen qan bilen bulghinip ketti.
39 Ular bolsa öz qilmishliri bilen bulghandi.
Qilghanliri bir buzuqchiliq idi.
40 Shunga Perwerdigarning Öz xelqige ghezipi tashti,
U Öz mirasidin yirgendi.
41 U ularni yat ellerning qoligha tashlap berdi.
Ulardin nepretlinidighanlar ulargha hökümranliq qildi.
42 Ular düshmenlirining zulumigha uchridi,
ularning qol astida bashlirini égishti.
43 Perwerdigar ularni köp qétim qutquzsimu,
ular qesten Uninggha asiyliq qilip,
öz yamanliqi bilen pesliship ketti.
44 Lékin U ularning peryadini anglighanda,
ularning azab-oqubetlirige étibar berdi.
45 U ular bilen tüzgen ehdisini yadigha aldi,
tengdashsiz méhir-shepqiti bilen ulargha ichi aghrip ghezipidin yandi.
46 Ularni esir qilip élip ketkenlerning qelbide rehim-shepqet oyghatti.
47 Qutquz bizni, ey Perwerdigar Xudayimiz.
Topla bizni eller arisidin,
Séning muqeddes naminggha shükür éytishqa,
Séning shan-sheripingni medhiyileshke.
48 Isra’ilning Xudasi bolghan Perwerdigar,
ezeldin ebedkiche medhiyilensun.
Hemme xelq «Amin» désun.
Perwerdigargha hemdusanalar bolsun!