Pend-nesihetler
Hékmetlik sözlerge qulaq sélishning ehmiyiti
1
1 Dawudning oghli, Isra’il padishahi Sulaymanning hékmetlik sözliri. 2 Bu hékmetlik sözler bizning
hékmet we edep-exlaqni öginishimiz,
danaliqqa tolghan sözlerni chüshinishimiz,
3 terbiye-nesihet qobul qilishimiz,
heqqaniy, adil we durus bolushimiz üchün bérildi.
4 Ular saddilargha hoshyarliq bérer,
yashlarni bilimlik we pem-parasetlik qilar.
5 Dana kishi bularni anglap bilimini ashurar,
eqil-parasetlik kishi meslihetke érisher.
6 Shuning bilen ular maqal-temsillerni,
danishmenlerning chongqur sözliri
we tépishmaqlirini chüshinidighan bolidu.
7 Perwerdigardin qorqush ilim-hékmetning bashlinishidur.
Emma exmeqler hékmet we nesihetni közge ilmaydu.
8 Ey oghlum, atangning nesihetige qulaq salghin,
anangning telimini tashlimighin.
9 Chünki ular béshinggha taqalghan bir güzel tajdek bolar,
boynunggha ésilghan marjandek bolar.
10 Ey oghlum, gunahkarlar séni azdursa,
ulargha egeshmigin.
11 Ular: «Biz bilen barghin, qan töküsh üchün möküp yatayli,
seweb bolmisimu bigunah kishige tuzaq qurayli.
12 Ölükler diyaridek kishilerni yutuwéteyli,
gördek ularni tirik yep kéteyli.
13 Her xil qimmetlik mal tapayli,
öylirimizni olja bilen toldurayli.
14 Biz bilen shérik bolghin,
pul xaltimiz bir bolsun» désimu,
15 ey oghlum, ular bilen hemrah bolmighin,
putungni ularning yolidin tartqin.
16 Chünki ularning putliri yamanliqqa yügüridu,
ular qan töküshke aldiraydu.
17 Qushlarning közliri aldida
tor yéyip qoyushning paydisi yoq.
18 Lékin bu ademler öz qénini töküsh üchün möküp yatidu,
öz janlirigha tuzaq quridu.
19 Haram paydini közligen kishilerning yolliri shundaq bolar,
mundaq payda igisining jénini alar.
20 Hékmet kochilarda chaqirip,
bazarlarda awazini anglitip,
21 kocha bashlirida jakarlap,
sheher derwazilirining aldida söz qilip mundaq deydu:
22 Ey nadanlar, qachanghiche nadanliqni yaxshi körisiler?
Ey mesxire qilghuchilar, qachanghiche mesxire qilishtin söyünisiler?
Ey exmeqler, qachanghiche ilim-hékmettin nepretlinisiler?
23 Manga qulaq sélip, nesihetimni anglanglar!
Mana, könglümdikini silerge töküp bérimen,
sözlirimni silerge bildürimen.
24 Lékin chaqirsam, anglimidinglar,
qolumni uzatsam qarimidinglar.
25 Meslihetimni tashlap,
nesihetimge qulaq salmidinglar.
26 Shuning üchün men béshinglargha bala-qaza kelgen künde külimen,
wehimiler üstünglargha kelgende zangliq qilimen.
27 Wehime halaket élip kelgen topandek kelgende,
balayi’apet bir borandek chiqqanda,
derd-elem we ghem-qayghu üstünglargha chüshkende,
28 ular manga nale qilsa, men jawab bermeymen,
méni qanche izdisimu méni tapalmaydu.
29 Ular ilim-hékmettin nepretlinip,
Perwerdigardin qorqushni xalimay,
30 méning meslihetimge unimay,
hemme nesihetimni ret qilghini üchün,
31 ular öz ishlirining méwisini yep,
öz meslihetlirining aqiwitidin toyidu.
32 Chünki jahillar mendin yüz örügini üchün öltürülidu,
exmeqlerning bighemliqi ularni halak qilidu.
33 Lékin manga qulaq salghan kishi tinch-aman turidu,
bala-qazadin qorqmay xatirjem bolidu.