‏1 خۇدا دەسلەپتە ئاسمان بىلەن يەرنى ياراتتى.

‏2 ئۇ چاغدا يەر شەكىلسىز ۋە بوش ھالەتتە ئىدى ۋە قاراڭغۇلۇق چوڭقۇر سۇلارنىڭ يۈزىنى قاپلىغانىدى. خۇدانىڭ روھى سۇلار ئۈستىدە پەرۋاز قىلاتتى.

‏3 خۇدا سۆز قىلىپ: «يورۇقلۇق بولسۇن» دېدى، ۋە يورۇقلۇق پەيدا بولدى. ‏4 خۇدا يورۇقلۇقنىڭ ياخشى ئىكەنلىكىنى كۆرۈپ، يورۇقلۇقنى قاراڭغۇلۇقتىن ئايرىدى. ‏5 خۇدا يورۇقلۇقنى «كۈندۈز» دەپ ئاتاپ، قاراڭغۇلۇقنى «كېچە» دەپ ئاتىدى. ئاخشام ئۆتتى، سەھەر ئۆتتى، بۇ بىرىنچى كۈن بولدى.

‏6 خۇدا: «سۇلارنىڭ ئوتتۇرىسىدا بىر ئاسمان گۈمبىزى بولسۇن ۋە ئۇ سۇلارنى بىر-بىرىدىن ئايرىسۇن» دېدى. ^■   ‏7 خۇدا ئاسمان گۈمبىزىنى يارىتىپ، ئۇنىڭ ئاستىدىكى سۇلارنى ئۇنىڭ ئۈستىدىكى سۇلاردىن ئايرىدى. ئىش ئەنە شۇنداق بولدى. ‏8 خۇدا ئاسمان گۈمبىزىنى «ئاسمان» دەپ ئاتىدى. ئاخشام ئۆتتى، سەھەر ئۆتتى، بۇ ئىككىنچى كۈن بولدى.

‏9 ئاندىن خۇدا: «ئاسماننىڭ ئاستىدىكى سۇلار بىر يەرگە يىغىلسۇن، قۇرۇق تۇپراق كۆرۈنسۇن» دېدى، ۋە شۇنداق بولدى. ‏10 خۇدا قۇرۇقلۇقنى «يەر» دەپ ئاتاپ، يىغىلغان سۇلارنى بولسا «دېڭىز» دەپ ئاتىدى. خۇدا بۇلارنىڭ ياخشى ئىكەنلىكىنى كۆردى.

‏11 خۇدا يەنە: «يەر ئوتلارنى، ئۇرۇقلۇق ئوتياشلارنى ۋە تۈرى بويىچە ئۇرۇقى مېۋىسىدە بولغان مېۋىلىك دەرەخلەرنى ئۈندۈرسۇن» دېدى، ۋە شۇنداق بولدى. ‏12 شۇنىڭ بىلەن يەر ئوتلارنى، ئۆز تۈرى بويىچە ئۇرۇق چىقىدىغان ئوتياشلارنى ۋە ئۆز تۈرى بويىچە ئۇرۇقى مېۋىسى ئىچىدە بولغان مېۋىلىك دەرەخلەرنى ئۈندۈردى. خۇدا بۇلارنىڭ ياخشى ئىكەنلىكىنى كۆردى. ‏13 ئاخشام ئۆتتى، سەھەر ئۆتتى، بۇ ئۈچىنچى كۈن بولدى. ‏14 خۇدا يەنە: «ئاسمان گۈمبىزىدە يورۇقلۇق بېرىدىغان جىسىملار بولسۇن. ئۇلار كۈندۈزنى كېچىدىن ئايرىپ، مەۋسۇم، كۈن ۋە يىللارنى پەرق ئېتىدىغان بەلگىلەر بولسۇن. ‏15 ئۇلار ئاسمان گۈمبىزىدە تۇرۇپ، يەر يۈزىنى يورۇتۇپ تۇرسۇن» دېدى، ۋە شۇنداق بولدى. ‏16 خۇدا ئىككى چوڭ يورۇقلۇق بېرىدىغان جىسىمنى ياراتتى. ئۇ چوڭراقىنى كۈندۈزنى باشقۇرىدىغان، كىچىكرەكىنى كېچىنى باشقۇرىدىغان قىلدى، ھەمدە باشقا يۇلتۇزلارنىمۇ ياراتتى. ‏17 خۇدا بۇلارنى يەرگە يورۇقلۇق بېرىش، ‏18 كۈندۈز بىلەن كېچىنى باشقۇرۇش ۋە يورۇقلۇقنى قاراڭغۇلۇقتىن ئايرىش ئۈچۈن ئاسمان گۈمبىزىگە ئورۇنلاشتۇردى. خۇدا بۇلارنىڭ ياخشى ئىكەنلىكىنى كۆردى. ‏19 ئاخشام ئۆتتى، سەھەر ئۆتتى، بۇ تۆتىنچى كۈن بولدى.

‏20 خۇدا يەنە: «سۇلار مىغ-مىغ جانىۋارلار بىلەن تولسۇن ۋە يەرنىڭ ئۈستىدىكى ئاسماندا ئۇچار قاناتلار ئۇچسۇن» دېدى. ‏21 بۇنىڭ بىلەن خۇدا چوڭ-چوڭ سۇ مەخلۇقلىرىنى، سۇدا مىدىرلاپ يۈرىدىغان تۈرلۈك جانىۋارلارنى ئۆز تۈرلىرى بويىچە ۋە ھەر خىل قاناتلىق ئۇچار قاناتلارنىمۇ ئۆز تۈرلىرى بويىچە ياراتتى. خۇدا بۇلارنىڭ ياخشى ئىكەنلىكىنى كۆردى. ‏22 ئاندىن كېيىن خۇدا ئۇلارغا بەرىكەت ئاتا قىلىپ: «سىلەر نەسىل قالدۇرۇپ كۆپىيىپ، دېڭىزلارنىڭ سۇلىرىنى تولدۇرۇڭلار، ئۇچار قاناتلارمۇ يەر يۈزىدە كۆپەيسۇن» دېدى. ‏23 ئاخشام ئۆتتى، سەھەر ئۆتتى، بۇ بەشىنچى كۈن بولدى.

‏24 خۇدا يەنە سۆز قىلىپ: «يەر جانىۋارلارنى ئۆز تۈرلىرى بويىچە چىقارسۇن. چارۋا مال، ئۆمىلىگۈچى جانىۋارلار ۋە ياۋايى ھايۋانلار ئۆز تۈرلىرى بويىچە پەيدا بولسۇن» دېدى، ۋە شۇنداق بولدى. ‏25 شۇنىڭ بىلەن خۇدا يەرنىڭ ياۋايى ھايۋانلىرىنى ئۆز تۈرلىرى بويىچە، چارۋا ماللىرىنى ئۆز تۈرلىرى بويىچە ۋە يەردە ئۆمىلىگۈچى جانىۋارلارنىمۇ ئۆز تۈرلىرى بويىچە ياراتتى. خۇدا بۇلارنىڭ ياخشى ئىكەنلىكىنى كۆردى.

‏26 خۇدا يەنە: «ئۆز ئوبرازىمىزدا ئۆزىمىزگە ئوخشايدىغان قىلىپ ئادەمنى يارىتايلى! ئۇلار دەريادىكى بېلىقلار، ھاۋادىكى ئۇچار قاناتلار، چارۋا ماللار، شۇنداقلا پۈتۈن يەر يۈزى ۋە ئۇنىڭدىكى ھەممە ئۆمىلىگۈچى جانىۋارلارنى باشقۇرسۇن» دېدى. ^■   ‏27 شۇنىڭ بىلەن، خۇدا ئادەمنى ئۆز ئوبرازىدا ياراتتى. ئۇنى خۇدانىڭ ئوبرازىدا يارىتىپ، ئۇلارنى ئەر ۋە ئايال قىلىپ ياراتتى. ^■   ‏28 خۇدا ئۇلارغا بەرىكەت ئاتا قىلىپ: «سىلەر نەسىل قالدۇرۇپ كۆپىيىپ، يەرنى تولدۇرۇپ ئۇنى بويسۇندۇرۇڭلار. دېڭىزدىكى بېلىقلار، ھاۋادىكى ئۇچار قاناتلار ۋە يەردە مىدىرلايدىغان ھەممە جانىۋارلارنى باشقۇرۇڭلار» دېدى. ‏29 ئاندىن خۇدا يەنە: «مانا، مەن پۈتۈن يەر يۈزىدىكى ئۇرۇقلۇق ئۆسۈملۈكلەر ۋە ئۇرۇقى مېۋىسىدە بولغان مېۋىلىك دەرەخلەرنىڭ ھەممىسىنى ئوزۇق بولسۇن دەپ سىلەرگە بېرىمەن. ‏30 يەر يۈزىدىكى ھەممە ھايۋانلار، ھاۋادىكى ھەممە ئۇچار قاناتلار ۋە يەر يۈزىدىكى ھەممە ئۆمىلىگۈچى جانىۋارلارغا غىزا بولسۇن دەپ بارچە ئوت-گىياھلارنى ئۇلارغا ئاتا قىلىمەن» دېدى، ۋە شۇنداق بولدى. ‏31 خۇدا ياراتقانلىرىنىڭ ھەممىسىگە سەپسېلىپ قارىدى، ۋە مانا، بۇلارنىڭ ھەممىسىنىڭ ناھايىتى ياخشى ئىكەنلىكىنى كۆردى. ئاخشام ئۆتتى، سەھەر ئۆتتى، بۇ ئالتىنچى كۈن بولدى.