‏1 ئاندىن كېيىن خۇدا نۇھنى ياد ئېتىپ، ئۇنىڭ بىلەن كېمىدە بولغان ھەممە جانىۋار ۋە بارچە چارۋا مالنى ئېسىگە كەلتۈردى. خۇدا يەر يۈزىگە شامال چىقاردى. شۇنىڭ بىلەن سۇلار پەسىيىشكە باشلىدى. ‏2 چوڭقۇر سۇلارنىڭ بۇلاقلىرى ۋە ئاسماننىڭ دەرۋازىلىرى ئېتىلدى. ئاسماندىن ياغقان قاتتىق يامغۇر توختىدى. ‏3 سۇلار بارا-بارا يەر يۈزىدىن ياندى. بىر يۈز ئەللىك كۈن ئۆتكەندىن كېيىن سۇ خېلى ئازلاپ قالغانىدى. ‏4 يەتتىنچى ئاينىڭ ئون يەتتىنچى كۈنى، كېمە ئارارات تاغلىرى ئۈستىدە توختىدى. ‏5 سۇ ئونىنچى ئايغىچە داۋاملىق پەسلىدى. ئونىنچى ئاينىڭ بىرىنچى كۈنى تاغلارنىڭ چوققىلىرى كۆرۈنۈشكە باشلىدى.

‏6 قىرىق كۈندىن كېيىن نۇھ كېمىگە ئورناتقان دېرىزىنى ئېچىپ، ‏7 بىر قۇزغۇننى سىرتقا قويۇپ بەردى. يەر يۈزىدىن سۇ تارتىلىپ قۇرۇپ كەتكۈچە، ئۇ ئايلىنىپ ئۇچۇپ يۈردى. ‏8 ئاندىن كېيىن نۇھ سۇلارنىڭ يەر يۈزىدىن تارتىلغان-تارتىلمىغىنىنى بىلىش ئۈچۈن بىر كەپتەرنى سىرتقا قويۇپ بەردى. ‏9 ئەمما پۈتۈن يەر يۈزىدە سۇ بولغاچقا، كەپتەر پۇتىنى قويغىلى يەر تاپالماي، كېمىگە ئۇنىڭ يېنىغا قايتىپ كەلدى. نۇھ قولىنى سۇنۇپ ئۇنى تۇتۇپ، كېمى ئىچىگە ئېلىپ كىردى. ‏10 ئۇ يەنە يەتتە كۈن ساقلاپ، ئاندىن كەپتەرنى تەكرار كېمىدىن سىرتقا قويۇپ بەردى. ‏11 كەپتەر ئاخشام ۋاقتىدا ئۇنىڭ يېنىغا قايتىپ كەلگىنىدە، دەرۋەقە، تۇمشۇقىدا زەيتۇننىڭ يېڭى ئۈزۈلگەن بىر يوپۇرمىقى بار ئىدى. نۇھ شۇنىڭدىن سۇلارنىڭ يەر يۈزىدىن تارتىلغىنىنى بىلدى. ‏12 ئاندىن ئۇ يەنە يەتتە كۈن ساقلىغاندىن كېيىن، كەپتەرنى تەكرار سىرتقا قويۇپ بەردى، ئەمما بۇ قېتىم كەپتەر قايتىپ كەلمىدى. ‏13 نۇھ ئالتە يۈز بىر ياشقا كىرگەن يىلى، بىرىنچى ئاينىڭ بىرىنچى كۈنى، سۇ يەر يۈزىدىن تارتىلىپ قۇرۇغانىدى. نۇھ كېمىنىڭ ئۈستىنى ئېچىپ ئەتراپىغا قاراپ، يەر يۈزىنىڭ قۇرۇغىنىنى كۆردى. ‏14 ئىككىنچى ئاينىڭ يىگىرمە يەتتىنچى كۈنى، يەر يۈزى پۈتۈنلەي قۇرۇغانىدى.

‏15 خۇدا نۇھقا سۆز قىلىپ: ‏16 «سەن ئايالىڭ، ئوغۇللىرىڭ ۋە ئوغۇللىرىڭنىڭ ئاياللىرىنى ئېلىپ، كېمىدىن چىققىن. ‏17 ئۆزۈڭ بىلەن بىللە بولغان بارچە جانىۋارلارنى، يەنى ئۇچار قاناتلار، چارۋا مال ۋە يەردە ئۆمىلىگۈچى جانىۋارلارنىڭ ھەممىسىنى ئۆزۈڭ بىلەن قوشۇپ كېمىدىن چىقارغىن. ئۇلار يەر يۈزىدە يېيىلىپ، نەسىل قالدۇرۇپ زېمىندا ئاۋۇسۇن» دېدى. ‏18 شۇنىڭ بىلەن، نۇھ ئۆز ئايالى، ئوغۇللىرى ۋە ئوغۇللىرىنىڭ ئاياللىرى بىلەن بىللە سىرتقا چىقتى. ‏19 ھەممە جانىۋارلار، يەنى ئۆمىلىگۈچى جانىۋارلار، ئۇچار قاناتلار ۋە يەردە ئۆمىلەيدىغان جانىۋارلارنىڭ ھەرقايسىسى ئۆز تۈرلىرى بويىچە كېمىدىن چىقتى.

‏20 نۇھ پەرۋەردىگار ئۈچۈن بىر قۇربانلىق سۇپىسى ياساپ، ھەر خىل پاك جانىۋار ۋە ھەر خىل پاك ئۇچار قاناتتىن ئېلىپ، قۇربانلىق سۇپىسىنىڭ ئۈستىدە قۇربانلىق قىلىپ كۆيدۈردى. ‏21 پەرۋەردىگار خۇش پۇراقنى پۇراپ، كۆڭلىدە: «ئادەمنىڭ كۆڭلىنىڭ نىيىتى كىچىكىدىن تارتىپ يامان بولسىمۇ، مەن ئادەم تۈپەيلىدىن يەر يۈزىگە يەنە لەنەت قىلمايمەن ۋە بۇ قېتىم قىلغىنىمدەك بارلىق جانلىقلارنى يەنە ئۆلتۈرۈۋەتمەيمەن. ^■   ‏22 يەر يۈزى مەۋجۇتلا بولىدىكەن تېرىم-يىغىم، ئىسسىق-سوغۇق، قىش-ياز، كېچە-كۈندۈزمۇ توختاپ قالمايدۇ» دېدى.