118
1 پەرۋەردىگارغا شۈكۈر ئېيتىڭلار، چۈنكى ئۇ مېھرىباندۇر، ئۇنىڭ مېھىر-شەپقىتى ئەبەدىيدۇر.
2 ئىسرائىل: «ئۇنىڭ مېھىر-شەپقىتى ئەبەدىيدۇر» دېسۇن.
3 ھارۇن جەمەتى: «ئۇنىڭ مېھىر-شەپقىتى ئەبەدىيدۇر» دېسۇن.
4 پەرۋەردىگاردىن قورقىدىغانلارمۇ: «ئۇنىڭ مېھىر-شەپقىتى ئەبەدىيدۇر» دېسۇن.
5 مەن قىيىنچىلىقتا پەرۋەردىگارغا يالۋۇرغىنىمدا،
پەرۋەردىگار جاۋاب بېرىپ، مېنى كەڭرى يەرگە چىقاردى.
6 پەرۋەردىگار مەن تەرەپتە بولغاچقا،
مەن ھېچ قورقمايمەن.
ئىنسان مېنى نېمە قىلالىسۇن؟
7 پەرۋەردىگار مېنىڭ يېنىمدىكى مەدەتكارىم بولغاچقا،
دۈشمەنلىرىمنىڭ مەغلۇبىيىتىنى كۆرىمەن.
8 ئىنسانغا تايىنىشتىن پەرۋەردىگارغا تايىنىش نەقەدەر ئەۋزەلدۇر.
9 خانزادىلەرگە تايىنىشتىن پەرۋەردىگارغا تايىنىش نەقەدەر ئەۋزەلدۇر.
10 بارلىق ئەللەر مېنى قورشىۋالدى،
لېكىن پەرۋەردىگارنىڭ نامى بىلەن ئۇلارنى مەغلۇپ قىلدىم.
11 ئۇلار مېنى قورشىۋالدى، ھەر تەرەپتىن قورشىۋالدى،
لېكىن پەرۋەردىگارنىڭ نامى بىلەن ئۇلارنى مەغلۇپ قىلدىم.
12 ئۇلار ھەسەل ھەرىلىرىدەك مېنى ئورىۋالدى،
لېكىن ئۇلار يانتاق ئوتىدەك تېزلا ئۆچۈپ كەتتى،
چۈنكى پەرۋەردىگارنىڭ نامى بىلەن ئۇلارنى مەغلۇپ قىلدىم.
13 سەن مېنى يىقىتىش ئۈچۈن قاتتىق ئىتتەرگەچكە يىقىلغىلى تاس قالدىم،
لېكىن پەرۋەردىگار مېنى يۆلىۋالدى.
14 پەرۋەردىگار مېنىڭ كۈچۈم ۋە ناخشام.
ئۇ مېنىڭ نىجاتكارىم بولدى.
15 ھەققانىيلارنىڭ چېدىرلىرىدا
شادلىق ۋە نىجاتلىقنىڭ ساداسى ئاڭلىنىدۇ.
پەرۋەردىگارنىڭ ئوڭ قولى ئۇلۇغ ئىشلارنى قىلىدۇ.
16 پەرۋەردىگارنىڭ ئوڭ قولى ئېگىز كۆتۈرۈلگەن،
پەرۋەردىگارنىڭ ئوڭ قولى ئۇلۇغ ئىشلارنى قىلىدۇ.
17 مەن ئۆلمەيمەن، بەلكى ياشايمەن،
پەرۋەردىگارنىڭ ئەمەللىرىنى بايان قىلىمەن.
18 پەرۋەردىگار ماڭا قاتتىق تەربىيە بەرگەن بولسىمۇ،
بىراق مېنى ئۆلۈمگە تاپشۇرۇپ بەرمىدى.
19 ماڭا ئادالەتنىڭ دەرۋازىلىرىنى ئېچىڭلار.
مەن ئىچىگە كىرىپ پەرۋەردىگارغا شۈكۈر ئېيتاي.
20 بۇ پەرۋەردىگارنىڭ دەرۋازىسىدۇر،
ھەققانىيلار ئۇنىڭدىن كىرىدۇ.
21 ساڭا شۈكۈر ئېيتىمەن،
چۈنكى سەن ماڭا جاۋاب بېرىپ، مېنىڭ نىجاتكارىم بولدۇڭ.
22 تامچىلار تاشلىۋەتكەن تاش
بۇرجەكنىڭ ئۇل تېشى بولۇپ قالدى.
23 بۇ پەرۋەردىگار قىلغان ئىشتۇر،
بۇ بىزنىڭ نەزىرىمىزدە ئاجايىپتۇر.
24 بۇ پەرۋەردىگار ياراتقان كۈندۇر،
ئۇنىڭدىن مەمنۇن بولۇپ شادلىنايلى.
25 ئەي پەرۋەردىگار، بىزنى قۇتقۇزغىن.
ئەي پەرۋەردىگار، بىزگە بەخت-سائادەت ئاتا قىلغىن.
26 پەرۋەردىگارنىڭ نامىدا كەلگۈچى مۇبارەك بولغاي!
بىز پەرۋەردىگارنىڭ بەيتىدىن سىلەرگە بەرىكەت تىلەيمىز.
27 پەرۋەردىگار بىزگە نۇر بەرگەن خۇدادۇر.
قۇربانلىق سۇپىسىنىڭ مۈڭگۈزلىرىگە
ھېيت قۇربانلىقلىرىنى تانىلار بىلەن ئىلىپ باغلاڭلار.
28 سەن مېنىڭ خۇدايىمسەن، ساڭا شۈكۈر ئېيتىمەن.
سەن مېنىڭ خۇدايىمسەن، سېنى ئۇلۇغلايمەن.
29 پەرۋەردىگارغا شۈكۈر ئېيتىڭلار، چۈنكى ئۇ مېھرىباندۇر.
ئۇنىڭ مېھىر-شەپقىتى ئەبەدىيدۇر.