‏1 ئۇز دېگەن يۇرتتا ئەييۇب ئىسىملىك بىر ئادەم ياشايتتى. ئۇ كامىل ۋە دۇرۇس ئادەم ئىدى، خۇدادىن قورقۇپ، يامانلىقتىن قاچاتتى. ‏2 ئۇنىڭ يەتتە ئوغۇل، ئۈچ قىزى بار ئىدى. ‏3 ئۇنىڭ يەتتە مىڭ قويى، ئۈچ مىڭ تۆگىسى، بەش يۈز جۈپ ئۆكۈزى ۋە بەش يۈز مادا ئېشىكى ۋە نۇرغۇن خىزمەتكارلىرى بار بولۇپ، شەرقتىكىلەر ئىچىدە ئەڭ كاتتىسى ئۇ ئىدى.

‏4 ئۇنىڭ ئوغۇللىرى بېكىتىلگەن كۈنلەردە ئۆيلىرىدە نۆۋەت بىلەن زىياپەت بېرىپ، ئۈچ سىڭلىسىنىمۇ بىللە يەپ-ئىچىپ غىزالىنىشقا چاقىرىشاتتى. ‏5 بۇ زىياپەت كۈنلىرى ئاياغلىشىشى بىلەن ئەييۇب ئادەم ئەۋەتىپ ئۇلارنى پاكلىنىشقا بۇيرۇيتتى. ئۇ سەھەر تۇرۇپ ھەربىرىگە ئاتاپ كۆيدۈرمە قۇربانلىق قىلاتتى. چۈنكى ئۇ: «بالىلىرىم گۇناھ ئۆتكۈزۈپ، كۆڭۈللىرىدە خۇداغا بىھۆرمەتلىق قىلغان بولۇشى مۇمكىن» دەپ ئويلايتتى. ئەييۇب ھەر دائىم شۇنداق قىلىپ تۇراتتى.

‏6 بىر كۈنى ‹خۇدانىڭ ئوغۇللىرى› پەرۋەردىگارنىڭ ھۇزۇرىدا ھازىر بولغىنىدا، شايتانمۇ ئۇلارنىڭ ئارىسىدا ئىدى. ^■   ‏7 پەرۋەردىگار شەيتاندىن: «قەيەردىن كەلدىڭ؟» دەپ سورىدى. شەيتان: «ئۇياق-بۇياقلارنى كېزىپ يەر يۈزىنى ئايلىنىپ كەلدىم» دېدى جاۋابەن. ‏8 پەرۋەردىگار شەيتانغا: «خىزمەتكارىم ئەييۇبقا دىققەت قىلغانسەن؟ يەر يۈزىدە ئۇنىڭدەك خۇدادىن قورقۇپ، يامانلىقتىن قاچىدىغان كامىل ۋە دۇرۇس كىشى يوقتۇر» دېدى. ‏9 شەيتان پەرۋەردىگارغا جاۋاب بېرىپ دېدىكى: «ئەييۇب خۇدادىن بىكاردىن-بىكار قورقمىغاندۇ؟ ‏10 سەن ئۆزۈڭ ئۇنىڭ ھەم ئائىلىسىنىڭ ۋە ئېرىشكەن ھەممە نەرسىسىنىڭ ئەتراپىنى توسۇقلار بىلەن قورشاپ قوغدىمىدىڭمۇ؟ ئۇنىڭ قوللىرىغا بەرىكەت ئاتا قىلدىڭ، شۇنىڭ بىلەن ئۇنىڭ تەئەللۇقاتى ئاۋۇپ روناق تاپتى. ‏11 ئەگەر قولۇڭنى ئۇزىتىپ ئۇنىڭ ئېرىشكەن ھەممە نەرسىسىنى يوقىتىۋەتسەڭ، ئۇ چوقۇم سەندىن يۈز ئۆرۈپ ساڭا لەنەت ئوقۇيدۇ». ‏12 پەرۋەردىگار شەيتانغا: «ماقۇل، ئۇنىڭ بارىنىڭ ھەممىسى سېنىڭ قولۇڭغا تاپشۇرۇپ بېرىلدى. لېكىن ئۇنىڭ ئۆزىگە قول تەگكۈزكۈچى بولما» دېدى. شۇنىڭ بىلەن شەيتان پەرۋەردىگارنىڭ ھۇزۇرىدىن چىقىپ كەتتى.

‏13 بىر كۈنى ئەييۇبنىڭ ئوغۇل-قىزلىرى چوڭ ئاكىسىنىڭ ئۆيىدە غىزالىنىپ شاراب ئىچىپ ئولتۇرغاندا، ‏14 بىر خەۋەرچى كېلىپ ئەييۇبقا مۇنداق دېدى: «ئۆكۈزلەر يەر ھەيدەۋاتاتتى ۋە ئېشەكلەر ئەتراپتا ئوتلاۋاتاتتى، ‏15 شېبالىقلار بېسىپ كېلىپ ئۇلارنى بۇلاپ كەتتى، ئىشلەۋاتقان يىگىتلەرنى چېپىپ ئۆلتۈرۈۋەتتى. يالغۇز مەنلا قۇتۇلۇپ قېلىپ، ساڭا خەۋەر يەتكۈزگىلى كەلدىم».

‏16 ئۇنىڭ گېپى تېخى تۈگىمەي تۇرۇپلا باشقا بىر خەۋەرچى كېلىپ: «ئاسماندىن خۇدانىڭ ئوتى چۈشۈپ، قويلار ۋە يىگىتلەرنى كۆيدۈرۈپ كۈل قىلىۋەتتى. يالغۇز مەنلا قۇتۇلۇپ قېلىپ، ساڭا خەۋەر يەتكۈزگىلى كەلدىم» دېدى.

‏17 ئۇ تېخى گەپ قىلىۋاتقاندا يەنە بىر كىشى كېلىپ خەۋەر بېرىپ: «كالدىيلار ئۈچ قولغا بۆلۈنۈپ تۆگىلەرگە ھۇجۇم قىلىپ ھەممىسىنى بۇلاپ كەتتى، ئىشلەۋاتقان يىگىتلەرنى چېپىپ ئۆلتۈرۈۋەتتى. يالغۇز مەنلا قۇتۇلۇپ قېلىپ، ساڭا خەۋەر يەتكۈزگىلى كەلدىم» دېدى.

‏18 ئۇ تېخى گەپ قىلىۋاتقاندا يەنە بىر كىشى كېلىپ خەۋەر بېرىپ: «ئوغۇل-قىزلىرىڭ چوڭ ئاكىلىرىنىڭ ئۆيىدە غىزالىنىپ، شاراب ئىچىپ ئولتۇرغىنىدا، ‏19 تۇيۇقسىز، چۆلدىن شىددەتلىك بىر بوران كېلىپ، ئۆينىڭ تۆت تەرىپىگە شۇنداق ئۇردىكى، ئۆي بالىلارنىڭ ئۈستىگە غۇلاپ چۈشتى ۋە ھەممىسى ئۆلدى. يالغۇز مەنلا قۇتۇلۇپ قېلىپ، ساڭا خەۋەر يەتكۈزگىلى كەلدىم» دېدى.

‏20 ئەييۇب بۇنى ئاڭلاپ، ئورنىدىن دەس تۇردى ۋە تونىنى يىرتىپ، چېچىنى چۈشۈرۈپ، يەرگە يىقىلىپ سەجدە قىلدى. ‏21 ئۇ: «ئانامنىڭ قورسىقىدىن يالىڭاچ چىقتىم، يەنە يالىڭاچ قايتىمەن. پەرۋەردىگار بەردى، پەرۋەردىگار ئالدى، پەرۋەردىگارنىڭ نامى مۇبارەك بولسۇن» دېدى. ‏22 بۇلارنىڭ ھەممىسىدە ئەييۇب گۇناھ قىلمىدى ۋە خۇدانى ھېچقانداق نالايىقلىق بىلەن ئەيىبلىمىدى.