پەند-نەسىھەتلەر
ھېكمەتلىك سۆزلەرگە قۇلاق سېلىشنىڭ ئەھمىيىتى
1
1 داۋۇدنىڭ ئوغلى، ئىسرائىل پادىشاھى سۇلايماننىڭ ھېكمەتلىك سۆزلىرى. 2 بۇ ھېكمەتلىك سۆزلەر بىزنىڭ
ھېكمەت ۋە ئەدەپ-ئەخلاقنى ئۆگىنىشىمىز،
دانالىققا تولغان سۆزلەرنى چۈشىنىشىمىز،
3 تەربىيە-نەسىھەت قوبۇل قىلىشىمىز،
ھەققانىي، ئادىل ۋە دۇرۇس بولۇشىمىز ئۈچۈن بېرىلدى.
4 ئۇلار ساددىلارغا ھوشيارلىق بېرەر،
ياشلارنى بىلىملىك ۋە پەم-پاراسەتلىك قىلار.
5 دانا كىشى بۇلارنى ئاڭلاپ بىلىمىنى ئاشۇرار،
ئەقىل-پاراسەتلىك كىشى مەسلىھەتكە ئېرىشەر.
6 شۇنىڭ بىلەن ئۇلار ماقال-تەمسىللەرنى،
دانىشمەنلەرنىڭ چوڭقۇر سۆزلىرى
ۋە تېپىشماقلىرىنى چۈشىنىدىغان بولىدۇ.
7 پەرۋەردىگاردىن قورقۇش ئىلىم-ھېكمەتنىڭ باشلىنىشىدۇر.
ئەمما ئەخمەقلەر ھېكمەت ۋە نەسىھەتنى كۆزگە ئىلمايدۇ.
8 ئەي ئوغلۇم، ئاتاڭنىڭ نەسىھەتىگە قۇلاق سالغىن،
ئاناڭنىڭ تەلىمىنى تاشلىمىغىن.
9 چۈنكى ئۇلار بېشىڭغا تاقالغان بىر گۈزەل تاجدەك بولار،
بوينۇڭغا ئېسىلغان مارجاندەك بولار.
10 ئەي ئوغلۇم، گۇناھكارلار سېنى ئازدۇرسا،
ئۇلارغا ئەگەشمىگىن.
11 ئۇلار: «بىز بىلەن بارغىن، قان تۆكۈش ئۈچۈن مۆكۈپ ياتايلى،
سەۋەب بولمىسىمۇ بىگۇناھ كىشىگە تۇزاق قۇرايلى.
12 ئۆلۈكلەر دىيارىدەك كىشىلەرنى يۇتۇۋېتەيلى،
گۆردەك ئۇلارنى تىرىك يەپ كېتەيلى.
13 ھەر خىل قىممەتلىك مال تاپايلى،
ئۆيلىرىمىزنى ئولجا بىلەن تولدۇرايلى.
14 بىز بىلەن شېرىك بولغىن،
پۇل خالتىمىز بىر بولسۇن» دېسىمۇ،
15 ئەي ئوغلۇم، ئۇلار بىلەن ھەمراھ بولمىغىن،
پۇتۇڭنى ئۇلارنىڭ يولىدىن تارتقىن.
16 چۈنكى ئۇلارنىڭ پۇتلىرى يامانلىققا يۈگۈرىدۇ،
ئۇلار قان تۆكۈشكە ئالدىرايدۇ.
17 قۇشلارنىڭ كۆزلىرى ئالدىدا
تور يېيىپ قويۇشنىڭ پايدىسى يوق.
18 لېكىن بۇ ئادەملەر ئۆز قېنىنى تۆكۈش ئۈچۈن مۆكۈپ ياتىدۇ،
ئۆز جانلىرىغا تۇزاق قۇرىدۇ.
19 ھارام پايدىنى كۆزلىگەن كىشىلەرنىڭ يوللىرى شۇنداق بولار،
مۇنداق پايدا ئىگىسىنىڭ جېنىنى ئالار.
20 ھېكمەت كوچىلاردا چاقىرىپ،
بازارلاردا ئاۋازىنى ئاڭلىتىپ،
21 كوچا باشلىرىدا جاكارلاپ،
شەھەر دەرۋازىلىرىنىڭ ئالدىدا سۆز قىلىپ مۇنداق دەيدۇ:
22 ئەي نادانلار، قاچانغىچە نادانلىقنى ياخشى كۆرىسىلەر؟
ئەي مەسخىرە قىلغۇچىلار، قاچانغىچە مەسخىرە قىلىشتىن سۆيۈنىسىلەر؟
ئەي ئەخمەقلەر، قاچانغىچە ئىلىم-ھېكمەتتىن نەپرەتلىنىسىلەر؟
23 ماڭا قۇلاق سېلىپ، نەسىھەتىمنى ئاڭلاڭلار!
مانا، كۆڭلۈمدىكىنى سىلەرگە تۆكۈپ بېرىمەن،
سۆزلىرىمنى سىلەرگە بىلدۈرىمەن.
24 لېكىن چاقىرسام، ئاڭلىمىدىڭلار،
قولۇمنى ئۇزاتسام قارىمىدىڭلار.
25 مەسلىھەتىمنى تاشلاپ،
نەسىھەتىمگە قۇلاق سالمىدىڭلار.
26 شۇنىڭ ئۈچۈن مەن بېشىڭلارغا بالا-قازا كەلگەن كۈندە كۈلىمەن،
ۋەھىمىلەر ئۈستۈڭلارغا كەلگەندە زاڭلىق قىلىمەن.
27 ۋەھىمە ھالاكەت ئېلىپ كەلگەن توپاندەك كەلگەندە،
بالايىئاپەت بىر بوراندەك چىققاندا،
دەرد-ئەلەم ۋە غەم-قايغۇ ئۈستۈڭلارغا چۈشكەندە،
28 ئۇلار ماڭا نالە قىلسا، مەن جاۋاب بەرمەيمەن،
مېنى قانچە ئىزدىسىمۇ مېنى تاپالمايدۇ.
29 ئۇلار ئىلىم-ھېكمەتتىن نەپرەتلىنىپ،
پەرۋەردىگاردىن قورقۇشنى خالىماي،
30 مېنىڭ مەسلىھەتىمگە ئۇنىماي،
ھەممە نەسىھەتىمنى رەت قىلغىنى ئۈچۈن،
31 ئۇلار ئۆز ئىشلىرىنىڭ مېۋىسىنى يەپ،
ئۆز مەسلىھەتلىرىنىڭ ئاقىۋىتىدىن تويىدۇ.
32 چۈنكى جاھىللار مەندىن يۈز ئۆرۈگىنى ئۈچۈن ئۆلتۈرۈلىدۇ،
ئەخمەقلەرنىڭ بىغەملىقى ئۇلارنى ھالاك قىلىدۇ.
33 لېكىن ماڭا قۇلاق سالغان كىشى تىنچ-ئامان تۇرىدۇ،
بالا-قازادىن قورقماي خاتىرجەم بولىدۇ.