ھېكمەت ئادەمنى يامان يوللاردىن ساقلايدۇ
2
1 ئەي ئوغلۇم، ئەگەر سۆزلىرىمنى قوبۇل قىلساڭ، ئەمرلىرىمنى قەلبىڭدە ساقلىساڭ،
2 ھېكمەتكە قۇلاق سالساڭ،
دانالىققا كۆڭلۈڭ قويساڭ،
3 ئەقىل-پاراسەتنى تىلىسەڭ،
دانالىققا ئېرىشىش ئۈچۈن ئاۋازىڭنى كۆتۈرسەڭ،
4 كۈمۈشنى ئارزۇ قىلغاندەك ئۇنى ئارزۇ قىلساڭ،
يوشۇرۇن خەزىنىنى ئىزدىگەندەك ئۇنى ئىزدىسەڭ،
5 شۇ چاغدا پەرۋەردىگاردىن قورقۇشنى بىلىسەن،
خۇدانى تونۇيالايسەن.
6 چۈنكى پەرۋەردىگار ھېكمەت بەرگۈچىدۇر.
ئۇنىڭ ئاغزىدىن بىلىم ۋە دانالىق چىقىدۇ.
7 ئۇ دۇرۇسلارغا مەدەت بېرىشكە تەييار تۇرىدۇ،
ئۇ ئادىل يولدا ماڭغانلارغا قالقاندۇر.
8 ئۇ ئادىللارنىڭ يوللىرىنى ساقلايدۇ،
تەقۋادارلارنىڭ يوللىرىنى قوغدايدۇ.
9 شۇ چاغدا ھەققانىيلىق، ئادىللىق ۋە دۇرۇسلۇقنى تونۇيسەن،
ھەممە ياخشى يوللارنى چۈشىنىسەن.
10 چۈنكى دانالىق كۆڭلۈڭگە كىرىدۇ،
جېنىڭ ئىلىم-ھېكمەتكە ئامراق بولىدۇ.
11 پەم-پاراسەت سېنى قوغدايدۇ،
دانالىق سېنى ساقلايدۇ.
12 چۈنكى ھېكمەت سېنى يامان يولدىن قۇتقۇزۇپ،
ئەگرى گەپ قىلغۇچىلاردىن ساقلايدۇ.
13 توغرا يوللارنى تاشلاپ قاراڭغۇلۇق يوللاردا ماڭغۇچىلاردىن
ئۇ سېنى خالاس قىلىدۇ.
14 ئۇ سېنى يامانلىق قىلىشتىن خۇشال بولغانلاردىن،
يامانلارنىڭ يالغانچىلىقىدىن شادلانغانلاردىن ساقلايدۇ.
15 ئۇ ئەگرى يوللاردا ماڭىدىغانلاردىن،
تەتۈر يوللاردا يۈرگۈچىلەردىن قۇتقۇزىدۇ.
16 ئۇ سېنى بۇزۇق خوتۇندىن،
سىلىق سۆزلەيدىغان يات ئايالدىن ساقلايدۇ.
17 ياش ۋاقتىدا تەگكەن يولدىشىنى تاشلاپ،
خۇدانىڭ ئالدىدا قىلغان ئەھدىسىنى ئۇنتۇغان ئايالدىن ئۇ سېنى قۇتقۇزىدۇ.
18 چۈنكى شۇنداق ئايال ئۆز ئۆيى بىلەن قوشۇلۇپ ئۆلۈمگە بارار،
ئۇنىڭ يوللىرى ئۆلۈكلەرنىڭ ماكانىغا باشلار.
19 ئۇنىڭ يېنىغا بارغانلارنىڭ بىرىمۇ قايتىپ كەلمەس،
ئۇلار ھاياتقا ئېرىشتۈرىدىغان يولنى تاپالماس.
20 ئەمما سەن ياخشىلارنىڭ يولىدا ماڭغىن،
ھەققانىيلارنىڭ ئىزلىرىدىن چىقمىغىن.
21 چۈنكى دۇرۇس كىشىلەر زېمىندا ياشار،
توغرا كىشىلەر ئۇ يەردە تۇرۇپ قالار.
22 لېكىن يامانلار زېمىندىن يوقىتىلار،
ۋاپاسىزلار ئۇنىڭدىن يۇلۇپ تاشلىنار.