ھېكمەت ئىزدىگۈچى بەرىكەت تاپىدۇ
3
1 ئەي ئوغلۇم، تەلىمىمنى ئۇنتۇمىغىن، مېنىڭ بۇيرۇقلىرىمنى قەلبىڭدە چىڭ ساقلىغىن.
2 چۈنكى بۇنىڭ بىلەن ئۇزۇن ئۆمۈر كۆرىسەن،
يىللىرىڭغا يىل قوشۇلۇپ، ئامانلىق تاپىسەن.
3 مېھىر-مۇھەببەت ۋە ساداقەت سەندىن ئايرىلمىسۇن.
ئۇلارنى بوينۇڭغا مارجان كەبى ئېسىۋالغىن،
يۈرىكىڭنىڭ تاختىسىغا پۈتۈۋالغىن.
4 شۇنداقتا خۇدا ۋە ئادەملەرنىڭ نەزىرىدە
ئىلتىپات تېپىپ، قەدىرلىنىسەن.
5 پۈتۈن قەلبىڭ بىلەن پەرۋەردىگارغا ئىشەنگىن،
ئۆز ئەقىل-پاراسىتىڭگە تايانمىغىن.
6 ھەممە ئىشلىرىڭدا ئۇنى ياد ئەتسەڭ،
ئۇ ھەممە يوللىرىڭنى ئوچۇق قىلار.
7 ئۆزۈڭنى دانا ھېسابلىمىغىن،
پەرۋەردىگاردىن قورقۇپ، يامانلىقتىن قاچقىن.
8 بۇ سېنىڭ تېنىڭگە داۋا بولار،
ئۇستىخانلىرىڭغا يىلىك بولار.
9 ئۆز مال-مۈلكۈڭ ۋە دەسلەپكى ھوسۇلۇڭنى پەرۋەردىگارغا ئاتىغىن،
شۇنداق قىلىپ ئۇنىڭغا شان-شەرەپ كەلتۈرگىن.
10 شۇندا ئامبارلىرىڭ ئاشلىققا تولار،
ئۈزۈم سىققۇچلىرىڭ يېڭى شارابتىن تاشار.
11 ئەي ئوغلۇم، پەرۋەردىگارنىڭ تەربىيىسىدىن باش تارتمىغىن،
ئۇنىڭ ئەدەب بېرىشىنى يامان كۆرمىگىن.
12 چۈنكى ئاتا ئۆزى سۆيگەن ئوغلىنى تەربىيىلىگەندەك،
پەرۋەردىگار ئۆزى سۆيگەن كىشىنى تەربىيىلەر.
13 ھېكمەتنى تاپقان ئىنسان
ۋە ئەقىل-پاراسەتنى ئىگىلىگەن ئادەم بەختلىكتۇر!
14 ھېكمەتنى تېپىش كۈمۈش تېپىشتىن ياخشىدۇر،
ئۇنىڭ پايدىسى ئالتۇننىڭ پايدىسىدىن ئەۋزەلدۇر.
15 ئۇ مەرۋايىتتىن قىممەتلىكتۇر.
ھېچبىر ئارزۇلۇق نەرسە ئۇنىڭغا تەڭ كەلمەيدۇ.
16 ئۇنىڭ ئوڭ قولىدا ئۇزۇن ئۆمۈر بار،
سول قولىدا دۆلەت بىلەن ئىززەت بار.
17 ئۇنىڭ يوللىرى خۇشاللىققا تولغان يوللار،
ھەممە ئىزلىرىدا ئامانلىق بار.
18 ئۇنى چىڭ تۇتقۇچىلارغا ئۇ ھاياتلىق دەرىخىدۇر،
ئۇنى ساقلىغانلار بەختلىكتۇر.
19 ھېكمەت بىلەن پەرۋەردىگار يەرنى ياراتتى،
دانالىق بىلەن ئاسماننى ئورناتتى.
20 ئۇنىڭ دانالىقى بىلەن چوڭقۇر بۇلاقلارنىڭ سۇلىرى چىقتى
ۋە بۇلۇتلار شەبنەمنى تېمىتتى.
21 ئەي ئوغلۇم، دانالىق ۋە پەم-پاراسەتنى ساقلىغىن،
ئۇلارنى كۆزلىرىڭدىن يوقاتمىغىن.
22 مۇنداق قىلساڭ، ئۇلار جېنىڭغا ھايات بېرىدۇ،
بوينۇڭغا ئېسىلغان مارجاندەك بولىدۇ.
23 يولۇڭدا تىنچ-ئامان ماڭىسەن،
ھەرگىز پۇتلاشمايسەن.
24 ھېچ نەرسىدىن قورقماي ياتىسەن،
يېتىپلا شېرىن ئۇخلايسەن.
25 تۇيۇقسىز كەلگەن دەھشەتتىن
ۋە يامانلارنىڭ ئۈستىگە كېلىدىغان ھالاكەتتىن قورقمىغىن.
26 چۈنكى پەرۋەردىگار تايانچىڭدۇر،
ئۇ پۇتۇڭنى قىلتاقتىن ساقلايدۇ.
27 ئەگەر قولۇڭدىن كەلسە،
ھاجەتمەنلەردىن ياردىمىڭنى ئايىمىغىن.
28 قوشناڭغا بەرگىلى يېنىڭدا بىر نەرسە بولسا:
«قايتىپ كېتىپ، ئەتە كەلسەڭ، ساڭا بېرەي» دېمىگىن.
29 قوشناڭ ساڭا ئىشىنىپ يېنىڭدا تىنچ-ئامان تۇرسا،
ئۇنىڭغا يامان نىيەتتە بولمىغىن.
30 كىشى ساڭا يامانلىق قىلمىغان بولسا،
ئۇنىڭ بىلەن سەۋەبسىز ئۇرۇشمىغىن.
31 زۇلۇم قىلغۇچىغا ھەسەت قىلمىغىن،
ئۇنىڭ يوللىرىنىڭ ھېچبىرىنى تاللىمىغىن.
32 بۇزۇق كىشى پەرۋەردىگارغا يىرگىنچلىكتۇر،
لېكىن دۇرۇس كىشىلەر بىلەن ئۇنىڭ يېقىن مۇناسىۋىتى باردۇر.
33 پەرۋەردىگارنىڭ لەنىتى يامان كىشىنىڭ ئۆيىگە تېگەر،
لېكىن ئۇ ھەققانىيلارنىڭ ئۆيىگە بەرىكەت ئاتا قىلار.
34 ئۇ مەسخىرە قىلغۇچىنى مەسخىرە قىلار،
لېكىن مىسكىنلەرگە شاپائەت قىلار.
35 دانالار ئىززەتكە ئېرىشەر،
ئەخمەقلەر بولسا شەرمەندىلىكتا قالار.