ھېكمەتكە ئېرىشىش يولى
4
1 ئەي ئوغۇللار، ئاتىنىڭ نەسىھەتىنى ئاڭلاڭلار، ئەقىل-پاراسەت تېپىش ئۈچۈن ئۇنىڭغا قۇلاق سېلىڭلار.
2 چۈنكى سىلەرگە بېرىمەن ياخشى تەلىمنى،
شۇڭا تاشلىماڭلار نەسىھەتىمنى.
3 مەن ئاتامنىڭ كىچىك بالىسى ئىدىم،
ئانامنىڭ نازۇك يالغۇز ئوغلى ئىدىم.
4 ئاتام ماڭا تەلىم بېرىپ مۇنداق دېدى:
مېنىڭ سۆزلىرىمنى يۈرىكىڭدە ساقلىغىن
ۋە بۇيرۇقلىرىمغا بويسۇنغىن،
شۇندا ھاياتىڭنى ساقلايسەن.
5 ھېكمەت ۋە ئەقىل-پاراسەت تاپقىن،
ئاغزىمنىڭ سۆزلىرىنى ئۇنتۇمىغىن،
ئۇلاردىن چىقمىغىن.
6 ھېكمەتنى تاشلىمىساڭ، ئۇ سېنى ساقلايدۇ.
ئۇنى دوست تۇتساڭ، ئۇ سېنى قوغدايدۇ.
7 ھېكمەت ھەممىدىن مۇھىمدۇر.
شۇنىڭ ئۈچۈن ھېكمەت ئىزدىگىن،
پۈتۈن بارلىقىڭ بىلەن
ئەقىل-پاراسەت تېپىش ئۈچۈن تىرىشقىن.
8 ئۇنى ئۇلۇغ دەپ بىلسەڭ، ئۇ سېنى كۆتۈرىدۇ،
ئۇنى قۇچىقىڭدا تۇتساڭ، ئۇ ساڭا ئىززەت ئاتا قىلىدۇ.
9 ئۇ سېنىڭ بېشىڭغا بىر زىننەتلىك تاجنى تاقايدۇ،
شۆھرەتلىك بىر تاجنى ساڭا تاپشۇرىدۇ.
10 ئەي ئوغلۇم، مېنى ئاڭلاپ، سۆزلىرىمنى قوبۇل قىلغىن،
شۇنداق قىلساڭ، ئۆمرۈڭ ئۇزاق بولىدۇ.
11 مەن ساڭا ھېكمەتنىڭ يوللىرىنى كۆرسىتىمەن،
سېنى توغرا يوللارغا باشلايمەن.
12 پۇتلىرىڭ توسالغۇغا ئۇچرىمايدۇ ماڭغىنىڭدا،
ھەرگىز پۇتلاشمايسەن يۈگۈرگىنىڭدە.
13 مېنىڭ نەسىھەتىمنى چىڭ تۇتقىن،
ئۇنى قويۇپ بەرمەي ساقلىغىن،
چۈنكى ئۇ سېنىڭ ھاياتىڭ بولىدۇ.
14 يامانلارنىڭ ئىزىغا ئەگەشمىگىن،
رەزىللەرنىڭ يولىدا ماڭمىغىن.
15 ئۇلارنىڭ يوللىرىدىن قاچقىن، ئۇ يەردىن ئۆتمىگىن،
بۇرۇلۇپ ئۇلاردىن يىراقلىشىپ كەتكىن.
16 چۈنكى ئۇلار يامانلىق قىلمىغۇچە ئۇخلىيالماس،
بىر كىشىنى يىقىتمىغۇچە، ئۇيقۇسى كەلمەس.
17 يامانلىق ئۇلارنىڭ يەيدىغان نېنىدۇر،
زۇلۇم ئۇلارنىڭ ئىچىدىغان شارابىدۇر.
18 ئەمما ھەققانىيلارنىڭ يولى تاڭ نۇرىدەكتۇر،
بارغانسېرى يورۇپ چىڭ چۈشتىكى قۇياشتەك بولۇر.
19 لېكىن يامانلارنىڭ يولى قاراڭغۇ زۇلمەتكە ئوخشار،
ئۇلار نېمىگە پۇتلىشىدىغىنىنى بىلمەس.
20 ئەي ئوغلۇم، سۆزلىرىمنى دىققەت بىلەن ئاڭلىغىن،
گەپلىرىمگە قۇلاق سالغىن.
21 ئۇلارنى كۆزلىرىڭدىن يوقاتمىغىن،
قەلبىڭدە چىڭ ساقلىغىن.
22 ئۇلارنى تاپقان كىشىگە ئۇلار ھاياتتۇر،
پۈتۈن تېنىگە داۋادۇر.
23 ئەڭ ئاۋۋال قەلبىڭنى پاك ساقلىغىن،
چۈنكى ئۇ ھاياتنىڭ بۇلىقىدۇر.
24 ئۆزۈڭنى ئېغىزنىڭ ھىيلىسىدىن نېرى تۇتقىن،
لەۋلەرنىڭنى ئەگرى گەپ قىلىشتىن ساقلىغىن.
25 كۆزلىرىڭنى ئالدىڭغا تىككىن،
نەزىرىڭنى ئۇدۇلغا سالغىن.
26 پۇتۇڭ ماڭىدىغان يولنى تۈز قىلغىن،
ھەممە يوللىرىڭنىڭ توغرا بولۇشىغا دىققەت قىلغىن.
27 نە ئوڭغا، نە سولغا بۇرۇلمىغىن،
ئايىغىڭنى يامانلىقتىن يىغقىن.