بىرىنچى گۇناھ
3
1 يىلان يەر يۈزىدە پەرۋەردىگار خۇدا ياراتقان جانىۋارلارنىڭ ھەممىسىدىن ھىيلىگەر بولۇپ، ئايالدىن: «راستتىنلا، خۇدا: ‹باغدىكى دەرەخلەرنىڭ ھېچقايسىسىنىڭ مېۋىسىدىن يېمەڭلار› دېدىمۇ؟» دەپ سورىدى. 2 ئايال يىلانغا جاۋاب بېرىپ: «باغدىكى دەرەخلەرنىڭ مېۋىسىدىن يېسەك بولىدۇ. 3 ئەمما باغنىڭ ئوتتۇرىسىدىكى دەرەخنىڭ مېۋىسى توغرىسىدا خۇدا: ‹بۇنىڭدىن يېمەڭلار، قولمۇ تەگكۈزمەڭلار، بولمىسا ئۆلىسىلەر› دېگەن» دېدى. 4 يىلان ئايالغا: «ھەرگىز ئۆلمەيسىلەر. 5 بەلكى بۇنىڭدىن يېسەڭلار، شۇ كۈنى كۆزلىرىڭلارنىڭ ئېچىلىپ، ياخشى-يامانلىقنى بىلىشتە خۇدادەك بولۇپ قېلىشىڭلارنى خۇدا بىلىدۇ» دېدى. 6 ئايال دەرەخنىڭ مېۋىسىنىڭ يېيىشكە ياخشى، كۆزگە چىرايلىق ۋە ئەقىل بېرىش جەھەتتىن جەلپكار ئىكەنلىكىنى كۆردى. ئۇ مېۋىدىن ئېلىپ يېدى ۋە ئۇنىڭدىن يېنىدا تۇرغان ئېرىگىمۇ بەردى. ئۇمۇ يېدى. 7 شۇنىڭ بىلەن ئىككىلىسىنىڭ كۆزلىرى ئېچىلىپ، ئۆزلىرىنىڭ يالىڭاچ ئىكەنلىكىنى بىلىپ قالدى. ئۇلار ئەنجۈر يوپۇرماقلىرىنى بىر-بىرىگە ئۇلاپ، ئۆزلىرىگە يېپىنچاق-پەرتۇق ياساشتى. 8 كۈن سالقىن بولغاندا ئۇلار پەرۋەردىگار خۇدانىڭ باغدا ماڭغان شەپىسىنى ئاڭلاپ قالدى. شۇنىڭ بىلەن ئادەمئاتا ئايالى بىلەن پەرۋەردىگار خۇدانىڭ ھۇزۇرىدىن قېچىپ، باغدىكى دەرەخلەرنىڭ ئارىسىغا يوشۇرۇنۇۋالدى.
9 ئەمما پەرۋەردىگار خۇدا ئادەمئاتىنى چاقىرىپ، ئۇنىڭغا: «سەن قەيەردە؟» دەپ سورىدى. 10 ئۇ جاۋاب بېرىپ: «مەن باغدا شەپەڭنى ئاڭلاپ، يالىڭاچ بولغىنىم ئۈچۈن قورقۇپ كېتىپ، يوشۇرۇنۇۋالدىم» دېدى. 11 خۇدا ئۇنىڭدىن: «يالىڭاچ ئىكەنلىكىڭنى ساڭا كىم بىلدۈردى؟ مەن ساڭا يېمىگىن دەپ ئەمر قىلغان دەرەخنىڭ مېۋىسىدىن يېدىڭمۇ؟» دەپ سورىدى. 12 ئادەمئاتا: «سەن ماڭا ھەمراھ بولۇشقا بەرگەن ئايال دەرەخنىڭ مېۋىسىدىن ماڭا بەرگەنىدى، شۇنىڭ ئۈچۈن يېدىم» دەپ جاۋاب بەردى. 13 پەرۋەردىگار خۇدا ئايالغا: «بۇ نېمە قىلغىنىڭ؟» دېدى. ئايال: «يىلان مېنى ئازدۇردى، شۇنىڭ ئۈچۈن يېدىم» دەپ جاۋاب بەردى.
14 پەرۋەردىگار خۇدا يىلانغا:
«سەن بۇ قىلمىشىڭ ئۈچۈن ھەممە چارۋا مال
ۋە دالانىڭ بارلىق جانىۋارلىرى ئارىسىدا لەنەتكە قالىسەن.
قورسىقىڭ بىلەن بېغىرلاپ يۈرۈپ،
ئۆمۈرۋايەت توپا يەيسەن.
15 مەن سەن بىلەن ئايالنىڭ ئارىسىغا،
سېنىڭ نەسلىڭ بىلەن ئايالنىڭ نەسلىنىڭ ئارىسىغا دۈشمەنلىك سالىمەن.
ئۇ سېنىڭ بېشىڭنى يانجىيدۇ.
سەن بولساڭ، ئۇنىڭ تاپىنىنى چاقىسەن» دېدى.
16 ئاندىن ئۇ ئايالغا:
«ھامىلىدارلىقىڭنىڭ ئازابلىرىنى ھەسسىلەپ ئاشۇرىمەن.
بالىلىرىڭنى ئاچچىق تولغاق يەپ تۇغىسەن.
سەن ئېرىڭگە ئىشتىياق باغلايسەن.
ئۇ بولسا سېنى باشقۇرىدۇ» دېدى.
17 ئاندىن كېيىن ئۇ ئادەمئاتىغا:
«سەن ئايالىڭنىڭ سۆزىگە قۇلاق سېلىپ،
مەن ساڭا ئۇنىڭدىن يېمىگىن دەپ،
ئەمر قىلغان دەرەختىن يېگەنلىكىڭ ئۈچۈن،
يەرمۇ سېنىڭ سەۋەبىڭدىن لەنەتكە ئۇچرايدۇ.
سەن ئۆمۈرۋايەت مۇشەققەت چېكىپ، ئۇنىڭدىن ئوزۇقلىنىسەن.
18 ئۇ ساڭا تىكەن ۋە يانتاق ئۈندۈرىدۇ،
سەن بولساڭ ئېتىزدىكى زىرائەتلەرنى يەيسەن.
19 تۇپراققا قايتقۇچە سەن پېشانەڭنىڭ تەرى بىلەن نان يەيسەن،
چۈنكى سەن يەردىن ئېلىنغان،
ئەسلى توپىدىن بولغاچقا، يەنە توپىغا قايتىسەن» دېدى.
20 ئادەمئاتا ئۇنىڭ ئايالى بارچە تىرىكلەرنىڭ ئانىسى بولىدىغىنى ئۈچۈن ئۇنىڭغا ھاۋا دەپ ئات قويدى. ■
21 پەرۋەردىگار خۇدا ئادەمئاتا بىلەن ئۇنىڭ ئايالىغا تېرىدىن كىيىم قىلىپ، ئۇلارنى كىيدۈرۈپ قويدى. 22 پەرۋەردىگار خۇدا: «مانا، ئادەم ياخشى-ياماننى بىلىشتە بىزدىن بىرىدەك بولۇپ قالدى. ئەمدى قولىنى ئۇزىتىپ، ھاياتلىق دەرىخىدىن يەۋېلىپ، مەڭگۈ ھايات قالمىسۇن» دېدى. ■ 23 شۇنىڭ بىلەن پەرۋەردىگار خۇدا ئۇنى ئېدەن بېغىدىن چىقىرىۋېتىپ، ئۇنى ئۆزى ئەسلى ئېلىنغان تۇپراققا ئىشلەيدىغان قىلىپ قويدى. 24 ئۇ ئادەمئاتىنى قوغلاپ چىقارغاندىن كېيىن، ھاياتلىق دەرىخىگە بارىدىغان يولنى توسۇش ئۈچۈن، ئېدەن بېغىنىڭ شەرق تەرىپىگە كېرۇبلار ۋە ھەر تەرەپكە پىرقىرايدىغان يالقۇنلۇق بىر قىلىچنى قويۇپ قويدى. ■