‏1 نۇھنىڭ ئوغۇللىرى شېم، خام ۋە يافەتنىڭ نەسلىنىڭ بايانى مۇنداق: توپاندىن كېيىن ئۇلاردىن بالىلار تۆرەلدى.

‏2 يافەتنىڭ ئوغۇللىرى: گومەر، ماگوگ، ماداي، ياۋان، تۇبال، مەشەك ۋە تىراس ئىدى. ‏3 گومەرنىڭ ئوغۇللىرى بولسا ئاشكىناز، رىفات ۋە توگارما ئىدى. ‏4 ياۋاننىڭ ئوغۇللىرى بولسا ئەلىشا، تارشىش، كىتتىم ۋە دودانىم ئىدى. ‏5 بۇلاردىن ئارال-قىتئەلەردە ياشايدىغان مىللەتلەر تارقىلىپ چىقىپ، ھەرقايسىسى ئۆز زېمىنىدا ياشاپ، ئۆز تىللىرى ۋە قەبىلىلىرى بويىچە باشقا-باشقا مىللەت بولۇپ قالدى.

‏6 خامنىڭ ئوغۇللىرى: كۇش، مىسىر، پۇت ۋە كەنئان ئىدى. ‏7 كۇشنىڭ ئوغۇللىرى بولسا سېبا، خاۋىلا، سابتا، رائاما ۋە سابتىكا ئىدى. رائامانىڭ ئوغۇللىرى بولسا شېبا ۋە دېدان ئىدى.

‏8 كۇشتىن نىمرود تۆرەلدى. ئۇ يەر يۈزىدە كۈچتۈڭگۈر پالۋان بولدى. ‏9 پەرۋەردىگارنىڭ ئالدىدا پالۋان ئوۋچى بولغانىدى. شۇڭا «خۇددى نىمرودتەك پەرۋەردىگارنىڭ ئالدىدا پالۋان ئوۋچى ئىكەن» دېگەن سۆز تارقالدى. ‏10 ئۇنىڭ سەلتەنىتى شىنار زېمىنىدىكى بابىل، ئېرەك، ئاككاد ۋە كالنە دېگەن شەھەرلەردىن باشلانغانىدى. ‏11 ئۇ بۇ زېمىندىن چىقىپ ئاسسۇرغا بېرىپ، نىنەۋە، رەخوبوت-ئىر ۋە كالاھ شەھەرلەرنى قۇرۇپ، ‏12 نىنەۋە بىلەن چوڭ شەھەر كالاھنىڭ ئارىسىدا رېسەن شەھىرىنىمۇ بىنا قىلدى.

‏13 مىسىرنىڭ ئەۋلادلىرى لۇدىيلار، ئانامىيلار، لېھابىيلار، نافتۇھىيلار، ‏14 پاتروسىيلار ۋە فىلىستىنلەرنىڭ ئاتا-بوۋىلىرى بولغان كاسلۇھىيلار ۋە كافتورىيلار ئىدى.

‏15 كەنئاندىن ئۇنىڭ تۇنجى ئوغلى سىدون ۋە خىت تۆرەلدى. ‏16 يەبۇسىيلار، ئامورىيلار، گىرگاشىيلار، ‏17 خىۋۋىيلار، ئارقىيلار، سىنىيلار، ‏18 ئارۋادىيلار، زېمارىيلار ۋە خاماتىيلار ئۇنىڭ ئەۋلادلىرى ئىدى. كېيىن كەنئاننىڭ قەبىلىلىرى يېيىلىپ تارقىلىشقا باشلىدى. ‏19 كەنئانلارنىڭ زېمىنىنىڭ چېگرىسى سىدوندىن تارتىپ گەرارنى بويلاپ، گازاغىچە چىقىپ، ئاندىن سودوم، گوموررا، ئادما ۋە زىبويىم تەرىپىگە قايرىلىپ، لاشاغىچە يېتىپ باردى. ‏20 بۇلار خامنىڭ ئوغۇللىرى بولۇپ، ئۆز قەبىلىلىرى ۋە تىللىرى بويىچە مىللەتلەر بولۇپ ئۆز زېمىنلىرىدا ئولتۇراقلاشتى.

‏21 يافەتنىڭ ئاكىسى بولغان شېمگىمۇ ئوغۇللار تۇغۇلدى، ئۇ ھەممە ئېبەرلەرنىڭ ئاتىسى بولدى. ‏22 شېمنىڭ ئوغۇللىرى ئېلام، ئاسسۇر، ئارپاخشاد، لۇد ۋە ئارام ئىدى. ‏23 ئارامنىڭ ئوغۇللىرى بولسا ئۇز، ھۇل، گەتەر ۋە ماش ئىدى. ‏24 ئارپاخشادتىن شالاھ تۆرەلدى. شالاھتىن ئېبەر تۆرەلدى. ‏25 ئېبەردىن ئىككى ئوغۇل تۆرەلدى. بىرىنىڭ ئېتى پەلەگ ئىدى، چۈنكى ئۇنىڭ دەۋرىدە يەر يۈزى بۆلۈندى. ئۇنىڭ قېرىندىشىنىڭ ئىسمى يوقتان ئىدى. ^■   ‏26 يوقتاندىن ئالموداد، شەلەف، خازارماۋەت، يېراھ، ‏27 ھادورام، ئۇزال، دىقلا، ‏28 ئوبال، ئابىمائەل، شېبا، ‏29 ئوفىر، خاۋىلا ۋە يوباب تۆرەلدى. بۇلارنىڭ ھەممىسى يوقتاننىڭ ئوغۇللىرى ئىدى. ‏30 ئۇلارنىڭ تۇرغان جايلىرى مېشادىن تارتىپ، سېفارنىڭ شەرق تەرىپىدىكى تاغقىچە سوزۇلاتتى. ‏31 بۇلار شېمنىڭ ئوغۇللىرى بولۇپ، ئۆز قەبىلىلىرى ۋە تىللىرى بويىچە مىللەتلەر بولۇپ ئۆز زېمىنلىرىدا ئولتۇراقلاشتى.

‏32 بۇلار ئۆز نەسەبلىرى ۋە قەبىلىلىرى بويىچە نۇھنىڭ ئوغۇللىرىنىڭ نەسىللىرى ئىدى. توپاندىن كېيىنكى خەلق-مىللەتلەر ئۇلاردىن چىقىپ، يەر يۈزىگە تارقالدى.