‏1 ئىبراھىم كۈننىڭ ئەڭ ئىسسىق ۋاقتىدا ئۆز چېدىرىنىڭ ئىشىكىدە ئولتۇرۇۋاتقاندا، پەرۋەردىگار مامرەدىكى دۇب دەرەخلىكىنىڭ يېنىدا ئۇنىڭغا كۆرۈندى. ‏2 ئۇ بېشىنى كۆتۈرۈپ قارىسا، مانا، ئالدىدا ئۈچ كىشى تۇرۇپتۇ. ئۇلارنى كۆرگەندە، ئۇ چېدىرىنىڭ ئىشىكىدىن ئۇلارنىڭ ئالدىغا يۈگۈرۈپ، يەرگە ئېگىلىپ تەزىم قىلىپ: ‏3 «ئەي ئىگەم، ئەگەر مەن كۆزۈڭدە ئىلتىپات تاپقان بولسام، سەندىن ئۆتۈنەيكى قۇلۇڭدىن ئايرىلىپ كەتمىگەيسەن. ‏4 ئازغىنە سۇ كەلتۈرۈلسۇن. سىلەر پۇتلىرىڭلارنى يۇيۇپ، دەرەخ تۈۋىدە ئارام ئېلىڭلار. ‏5 سىلەر قۇلۇڭلارنى يوقلاپ ئۆتكەن ئىكەنسىلەر، مەن بىر ئاز نان بولسىمۇ ئېلىپ كېلەي. سىلەر ئارام ئېلىپ، ئاندىن كېيىن كەتكەيسىلەر» دېدى. ئۇلار جاۋاب بېرىپ: «ئېيتقىنىڭدەك بولسۇن» دېدى.

‏6 ئىبراھىم چېدىرىغا يۈگۈرۈپ كىرىپ، ساراھقا: «دەرھال ئۈچ كۈرە ئېسىل ئۇن ئېلىپ، خېمىر يۇغۇرۇپ، توقاچ پىشۇرغىن» دېدى. ^■   ‏7 ئاندىن ئىبراھىم پادىغا يۈگۈرۈپ بېرىپ، بىر ئوبدان سېمىز موزاينى ئېلىپ، بىر چاكىرىغا بەردى. ئۇ دەرھال ئۇنى تەييارلاشقا باشلىدى. ‏8 ئاندىن ئىبراھىم قايماق، سۈت ۋە موزاينىڭ گۆشىنى ئېلىپ كېلىپ، ئۇلارنىڭ ئالدىغا قويدى. ئۇلار تاماق يەۋاتقاندا، ئۇ دەرەخ تۈۋىدە ئۇلارنىڭ يېنىدا ئۆرە تۇردى. ‏9 ئۇلار ئۇنىڭدىن: «ئايالىڭ ساراھ قەيەردە؟» دەپ سورىدى. ئۇ: «مانا، چېدىردا» دەپ جاۋاب بەردى. ‏10 ئۇ ئۇنىڭغا: «كېلەر يىلى مۇشۇ ۋاقىتتا مەن چوقۇم قايتىپ كېلىمەن. مانا، شۇ چاغدا ئايالىڭ ساراھنىڭ بىر ئوغلى بولىدۇ» دېدى. ساراھ ئۇنىڭ كەينىدىكى چېدىرنىڭ ئىشىكىدە تۇرۇپ، بۇ سۆزلەرنى ئاڭلاپ قالدى. ‏11 ئىبراھىم بىلەن ساراھ ئىككىلىسى قېرىپ كەتكەچكە، ساراھنىڭ ئاياللاردىكى ئادەت كۆرۈشى توختاپ قالغانىدى. ‏12 شۇڭا ساراھ ئۆز ئىچىدە كۈلۈپ: «راستتىنلا مەن شۇنچە قېرىپ كەتكەن تۇرۇقلۇق، لەززەت تاپامدىمەن؟ خوجايىنىممۇ قېرىپ كەتتى ئەمەسمۇ؟» دەپ ئويلىدى. ‏13 پەرۋەردىگار ئىبراھىمغا: «ساراھ نېمىشقا: ‹مەن قېرىپ قالغاندا راستتىنلا بالا تۇغامدىمەن؟› دەپ كۈلدى؟ ‏14 پەرۋەردىگار ئۈچۈن مۇمكىن بولمايدىغان ئىش بولامدۇ؟ كېلەر يىلى مۇشۇ ۋاقىتتا قايتىپ كېلىمەن. ئۇ چاغدا ساراھنىڭ بىر ئوغلى بولىدۇ» دېدى. ‏15 ئەمما ساراھ قورقۇپ كەتكەچكە: «كۈلمىدىم» دەپ ئىنكار قىلدى. لېكىن ئۇ: «ياق، سەن كۈلدۈڭ» دېدى.

‏16 ئاندىن كېيىن بۇ كىشىلەر ئۇ جايدىن قوزغىلىپ، سودوم تەرەپكە يۈزلەندى. ئىبراھىممۇ ئۇلارنى ئۇزاتقىلى ئۇلار بىلەن بىللە ماڭدى. ‏17 پەرۋەردىگار ئۆز-ئۆزىگە مۇنداق دېدى: «مەن قىلىدىغان ئىشىمنى ئىبراھىمدىن يوشۇرسام بولمايدۇ. ‏18 چۈنكى ئىبراھىمدىن چوڭ ۋە قۇۋۋەتلىك بىر خەلق ئوتتۇرىغا چىقىدۇ، يەر يۈزىدىكى بارچە خەلقلەر ئۇ ئارقىلىق بەرىكەت تاپىدۇ. ‏19 مەن ئۇنى ئۆز ئوغۇللىرىغا ۋە ئۆزىدىن كېيىنكى ئەۋلادلىرىغا پەرۋەردىگارنىڭ يولىنى تۇتۇپ، ئادىللىق ۋە ھەققانىيلىق بىلەن ئىش قىلىشنى ئۆگەتسۇن دەپ تاللىدىم. بۇنىڭ بىلەن مەن، پەرۋەردىگار، ئىبراھىمغا قىلغان ۋەدەمنى ئەمەلگە ئاشۇرىمەن». ‏20 ئاندىن كېيىن پەرۋەردىگار: «سودوم ۋە گوموررا توغرۇلۇق كۆتۈرۈلگەن پەرياد كۈچلۈك ۋە گۇناھلىرى ناھايىتى ئېغىر بولغىنى ئۈچۈن، ‏21 مەن ئەمدى چۈشۈپ، قىلمىشلىرى توغرۇلۇق ماڭا يەتكەن پەريادلارنىڭ ھەقلىق ياكى ئەمەسلىكىنى كۆرۈپ ئېنىقلاي» دېدى. ‏22 ئاندىن بۇ كىشىلەر ئۇ يەردىن قوزغىلىپ، سودوم تەرەپكە يول ئالدى. ئەمما ئىبراھىم تېخىچە پەرۋەردىگارنىڭ ئالدىدا تۇراتتى. ‏23 ئىبراھىم يېقىنراق بېرىپ: «سەن راستتىنلا ھەققانىيلارنى يامانلار بىلەن قوشۇپ ھالاك قىلامسەن؟ ‏24 شەھەردە ئەللىك ھەققانىي كىشى بار بولسا، سەن راستتىنلا ئۇ جاينى ۋەيران قىلامسەن؟ ئۇ يەردىكى ئەللىك ھەققانىي كىشى ئۈچۈن جاينى ساقلاپ قالمامسەن؟ ‏25 ياق، ھەرگىز ئۇنداق قىلمايسەن! سەن ھەرگىز ھەققانىيلارنى يامانلارغا قوشۇپ ھالاك قىلىپ، ھەققانىيلارنى يامانلار بىلەن تەڭ كۆرمەيسەن. پۈتۈن جاھاننىڭ ھاكىمى ئادىللىق بىلەن ھۆكۈم قىلمامدۇ؟» دېدى. ‏26 پەرۋەردىگار: «ئەگەر مەن سودوم شەھىرىدە ئەللىك ھەققانىي كىشىنى تاپسام، ئۇلار ئۈچۈن پۈتۈن جاينى ساقلاپ قالىمەن» دەپ جاۋاب بەردى. ‏27 ئىبراھىم جاۋاب بېرىپ: «مانا، مەن توپا ۋە كۈلدىن ئىبارەت بولساممۇ، ئىگەم بىلەن سۆزلىشىشكە جۈرئەت قىلدىم. ‏28 مۇبادا ئەللىك ھەققانىيدىن بەش كىشى كەم بولسا، راستتىنلا سەن بۇ بەش كىشىنىڭ كەم بولغىنى ئۈچۈن پۈتۈن شەھەرنى يوقىتامسەن؟» دېدى. ئۇ ئۇنىڭغا: «ئەگەر مەن ئۇ يەردە قىرىق بەشنى تاپساممۇ، ئۇنى ۋەيران قىلمايمەن» دېدى. ‏29 ئىبراھىم ئۇنىڭغا يەنە: «مۇبادا ئۇ يەردە قىرىق كىشى تېپىلسىچۇ؟» دېدى. پەرۋەردىگار: «بۇ قىرىق كىشى ئۈچۈن ئۇنى ۋەيران قىلمايمەن» دېدى. ‏30 ئۇ يەنە: «ئەي ئىگەم، خاپا بولمىساڭ، مەن يەنە بىر سۆز قىلاي. مۇبادا ئۇ يەردە ئوتتۇزى تېپىلسىچۇ؟» دېدى. پەرۋەردىگار: «ئەگەر مەن ئۇ يەردە ئوتتۇزنى تاپساممۇ، ئۇنى ۋەيران قىلمايمەن» دېدى. ‏31 ئىبراھىم يەنە سۆزلەپ: «مانا، ئەمدى مەن يەنە ئىگەمگە سۆزلىگىلى جۈرئەت قىلدىم. مۇبادا ئۇ يەردە يىگىرمىسى تېپىلسىچۇ؟» دېدى. پەرۋەردىگار: «بۇ يىگىرمىسى ئۈچۈن ئۇنى ۋەيران قىلمايمەن» دېدى. ‏32 ئاخىرىدا ئىبراھىم: «ئەي ئىگەم، خاپا بولمىساڭ، پەقەت يەنە بىرلا قېتىم سۆز قىلاي. مۇبادا ئۇ يەردە ئونى تېپىلسىچۇ؟» دېدى. پەرۋەردىگار يەنە: «مەن ئونى ئۈچۈن ئۇنى ۋەيران قىلمايمەن» دېدى. ‏33 پەرۋەردىگار ئىبراھىم بىلەن سۆزلىشىپ بولغاندىن كېيىن، يولىغا راۋان بولدى. ئىبراھىم بولسا ئۆز جايىغا قايتتى.