‏1 ئۇ يەردە ئىبراھىمنىڭ ۋاقتىدىكى ئاۋۋالقى ئاچارچىلىقتىن باشقا يەنە بىر ئاچارچىلىق بولدى. ئىسئھاق گەرار شەھىرىگە، فىلىستىنلەرنىڭ پادىشاھى ئابىمەلەكنىڭ ئالدىغا باردى. ‏2 پەرۋەردىگار ئىسئھاققا كۆرۈنۈپ، ئۇنىڭغا مۇنداق دېدى: «سەن مىسىرغا چۈشمەي، بەلكى مەن ساڭا دەپ بېرىدىغان يەردە تۇرغىن. ^■   ‏3 بۇ يەردە مۇساپىر بولۇپ تۇرساڭ، مەن ساڭا يار بولۇپ، ساڭا بەرىكەت ئاتا قىلىمەن، چۈنكى بۇ زېمىنلارنىڭ ھەممىسىنى ساڭا ۋە ئەۋلادلىرىڭغا بېرىمەن. مەن ئاتاڭ ئىبراھىمغا بەرگەن قەسىمىمنى ئەمەلگە ئاشۇرۇپ، ‏4 ئەۋلادىڭنى ئاسماندىكى يۇلتۇزلاردەك نۇرغۇن قىلىمەن ۋە نەسلىڭگە بۇ زېمىنلارنىڭ ھەممىسىنى بېرىمەن. يەر يۈزىدىكى ھەممە خەلقلەر سېنىڭ نەسلىڭ ئارقىلىق بەرىكەت تاپىدۇ. ‏5 چۈنكى ئىبراھىم مېنىڭ ئاۋازىمغا قۇلاق سېلىپ، بۇيرۇغىنىمغا، ئەمرلىرىم ۋە قانۇن-بەلگىلىمىلىرىمگە ئەمەل قىلدى». ‏6 شۇنىڭ بىلەن ئىسئھاق گەراردا تۇرۇپ قالدى.

‏7 ئەمما ئۇ يەرنىڭ ئادەملىرى ئۇنىڭ ئايالى توغرىسىدا ئۇنىڭدىن سورىسا، ئۇ: «بۇ مېنىڭ سىڭلىم بولىدۇ» دېدى. چۈنكى رىبەقا ئىنتايىن چىرايلىق بولغاچقا، ئىسئھاق: «بۇ مېنىڭ ئايالىم بولىدۇ دېسەم، بۇ يەرنىڭ ئادەملىرى رىبەقانىڭ سەۋەبىدىن مېنى ئۆلتۈرۈۋېتەرمىكىن» دەپ قورقتى. ‏8 ئىسئھاق ئۇ يەردە ئۇزۇن ۋاقىت تۇرغاندىن كېيىن، بىر كۈنى فىلىستىنلەرنىڭ پادىشاھى ئابىمەلەك دېرىزىدىن قارىسا، مانا، ئىسئھاق ئۆز ئايالى رىبەقا بىلەن كۈلۈشۈپ ئوينىشىۋاتاتتى. ‏9 ئابىمەلەك ئىسئھاقنى چاقىرىپ: «مانا، ئۇ سېنىڭ ئايالىڭ ئىكەن. نېمە ئۈچۈن سەن: ‹ئۇ مېنىڭ سىڭلىم› دېدىڭ؟» دەپ سورىدى. ئىسئھاق ئۇنىڭغا: «ئۇنىڭ سەۋەبىدىن ئۆلتۈرۈلمەي دەپ ئويلاپ، شۇنداق دېگەنىدىم» دېدى. ‏10 ئابىمەلەك ئۇنىڭغا: «بۇ بىزگە نېمە قىلغىنىڭ؟ خەلقنىڭ ئىچىدىن بىرى ئايالىڭ بىلەن يېتىۋالغىلى تاس قالدىغۇ! ئۇنداق بولغان بولسا، بىزنى گۇناھقا قويغان بولاتتىڭ ئەمەسمۇ؟» دېدى. ‏11 ئاندىن كېيىن ئابىمەلەك ھەممە خەلققە بۇيرۇق چۈشۈرۈپ: «كىمكى بۇ كىشىگە ياكى ئۇنىڭ خوتۇنىغا تەگسە، چوقۇم ئۆلتۈرۈلىدۇ» دەپ جاكارلىدى.

‏12 ئىسئھاق ئۇ زېمىندا دېھقانچىلىق قىلىشقا باشلىدى. پەرۋەردىگار ئۇنىڭغا بەرىكەت ئاتا قىلغاچقا، ئۇ شۇ يىلى بىرگە يۈز ھەسسە ھوسۇل ئالدى. ‏13 بۇ تەرىقىدە ئۇ باش كۆتۈرۈپ، بارغانسېرى راۋاج تېپىپ، كاتتا كىشى بولۇپ قالدى. ‏14 ئۇنىڭ قوي-كالا ۋە قۇللىرى ئىنتايىن كۆپ بولۇپ كەتكەچكە، فىلىستىنلەر ئۇنىڭغا ھەسەت قىلىشقا باشلىدى. ‏15 ئۇلار ئۇنىڭ ئاتىسى ئىبراھىمنىڭ ۋاقتىدا ئاتىسىنىڭ چاكارلىرى كولىغان قۇدۇقلارنىڭ ھەممىسىنى تىندۇرۇپ، توپا بىلەن تولدۇرۇۋەتتى. ‏16 ئابىمەلەك ئىسئھاققا: «سەن بىزدىن زىيادە كۈچلەندىڭ، شۇڭا ئەمدى ئارىمىزدىن چىقىپ كەتكىن» دېدى. ‏17 شۇنىڭ بىلەن ئىسئھاق ئۇ يەردىن كېتىپ، گەرار ۋادىسىدا چېدىر تىكىپ، شۇ يەردە تۇرۇپ قالدى. ‏18 ئاندىن ئىسئھاق ئاتىسى ئىبراھىمنىڭ ۋاقتىدا كولىنىپ ئاتىسى ئۆلگەندىن كېيىن، فىلىستىنلەر تىندۇرۇۋەتكەن قۇدۇقلارنى يەنە كولىتىپ، ئۇلارغا ئاتىسى ئىلگىرى قويغان ئىسىملىرىنى يەنە قويۇپ قويدى. ‏19 ئىسئھاقنىڭ چاكارلىرى ۋادىدا قۇدۇق كولاۋېتىپ، سۈيى ئېقىپ تۇرىدىغان بىر قۇدۇقنى تېپىۋالدى. ‏20 لېكىن گەرارنىڭ پادىچىلىرى ئىسئھاقنىڭ پادىچىلىرى بىلەن جېدەللىشىپ: «بۇ سۇ بىزنىڭكىدۇر» دېيىشتى. ئۇلار بۇ توغرىسىدا جېدەللەشكەچكە، ئىسئھاق بۇ قۇدۇقنى ئېسەك دەپ ئاتىدى. ^■   ‏21 ئۇلار يەنە باشقا بىر قۇدۇقنى كولىسا، ئۇلار بۇ توغرىسىدىمۇ جېدەللەشتى. شۇڭا ئىسئھاق ئۇ قۇدۇقنى سىتنا دەپ ئاتىدى. ^■   ‏22 ئاندىن كېيىن ئۇ يەردىن كېتىپ، باشقا يەرگە بېرىپ، ئۇ يەردىمۇ بىر قۇدۇقنى كولىدى، لېكىن بۇ توغرىسىدا جېدەل قىلىشمىدى. شۇ سەۋەبتىن ئۇ بۇ قۇدۇقنى رەخوبوت دەپ ئاتاپ: «ئەمدى پەرۋەردىگار بىزگە جاي بەرگەندىن كېيىن، بۇ زېمىندا روناق تاپىمىز» دېدى. ^■   ‏23 ئىسئھاق ئۇ يەردىن چىقىپ، بەئەرشېباغا بارغاندا،

‏24 پەرۋەردىگار ئۇ كېچىسى ئۇنىڭغا كۆرۈنۈپ: «مەن ئاتاڭ ئىبراھىمنىڭ خۇداسىدۇرمەن. سەن قورقمىغىن، چۈنكى مەن سەن بىلەن بىللە بولۇپ، ساڭا بەرىكەت ئاتا قىلىپ، خىزمەتكارىم ئىبراھىم سەۋەبىدىن ئۇرۇق-ئەۋلادىڭنى كۆپەيتىمەن» دېدى. ‏25 ئۇ شۇ يەردە بىر قۇربانلىق سۇپىسى ياساپ، پەرۋەردىگارنىڭ نامىنى چاقىرىپ ئىبادەت قىلدى. ئۇ شۇ يەردە چېدىرىنى تىكتى. ئاندىن كېيىن ئىسئھاقنىڭ چاكارلىرى ئۇ يەردە يەنە بىر قۇدۇقنى كولىدى. ‏26 ئابىمەلەك بولسا ئۆز دوستى ئاخۇززات ۋە لەشكەربېشى فىكول بىلەن بىللە گەراردىن چىقىپ، ئۇنىڭ قېشىغا كەلدى. ‏27 ئىسئھاق ئۇلارغا: «مېنى يامان كۆرۈپ، ئاراڭلاردىن قوغلىۋەتكەن تۇرۇقلۇق، نېمە ئۈچۈن يەنە مېنىڭ قېشىمغا كەلدىڭلار؟» دېدى. ‏28 ئۇلار ئۇنىڭغا: «بىز پەرۋەردىگارنىڭ ساڭا يار بولغىنىنى ئېنىق كۆرۈپ: ‹سەن ۋە بىز بىر-بىرىمىزگە قەسەم بېرىشەيلى، سەن بىلەن ئەھدە تۈزۈشەيلى، بىز ساڭا قول تەگكۈزمەي، ساڭا ياخشىلىقتىن باشقا ھېچ ئىش قىلماي، سېنى ئامان-ئېسەن يولغا سالغاندەك، ‏29 سېنىڭمۇ بىزگە زىيان يەتكۈزمەسلىكىڭ توغرىسىدا كېلىشەيلى› دەپ ئويلىدۇق. چۈنكى سەن پەرۋەردىگارنىڭ بەرىكىتىگە ئېرىشكەن ئادەمسەن» دېدى. ‏30 شۇنىڭ بىلەن ئۇ ئۇلارغا بىر زىياپەت بەردى. ئۇلار يەپ-ئىچىپ، ‏31 ئەتىسى سەھەر تۇرۇپ، قەسەم قىلىشتى. ئاندىن ئىسئھاق ئۇلارنى يولغا سېلىپ قويدى ۋە ئۇلار ئۇنىڭ يېنىدىن تىنچ-ئامان كەتتى.

‏32 شۇ كۈنى ئىسئھاقنىڭ چاكارلىرى كېلىپ، ئۆزلىرى كولىغان قۇدۇق توغرىسىدا ئۇنىڭغا خەۋەر بېرىپ: «بىز سۇ تاپتۇق» دېدى. ‏33 ئىسئھاق قۇدۇقنى شېبا دەپ ئاتىدى. شۇ سەۋەبتىن بۇ شەھەرنىڭ نامى بۈگۈنكى كۈنگىچە بەئەرشېبا دەپ ئاتىلىپ كەلمەكتە. ^■  

‏34 ئەساۋ قىرىق يېشىدا ھېتىتلاردىن بولغان بەئەرىنىڭ قىزى يەھۇدىت ۋە ھېتىتلاردىن بولغان ئېلوننىڭ قىزى باسىماتنى خوتۇنلۇققا ئالدى. ‏35 ئەمما ئۇلار ئىسئھاق بىلەن رىبەقانىڭ باش ئاغرىقىغا ئايلاندى.