‏1 شۇنىڭ بىلەن ئىسئھاق ياقۇبنى چاقىرىپ، ئۇنىڭغا خەيرلىك دۇئا قىلىپ، جېكىلەپ: «سەن كەنئانلارنىڭ قىزلىرىدىن خوتۇن ئالما، ‏2 بەلكى ئورنۇڭدىن قوزغىلىپ، پاددان-ئارامغا، ئاناڭنىڭ ئاتىسى بېتۇئەلنىڭ ئۆيىگە بار، ئۇ يەردە ئاناڭنىڭ ئاكىسى لاباننىڭ قىزلىرىدىن خوتۇن ئال. ‏3 ھەممىگە قادىر خۇدا ساڭا بەرىكەت ئاتا قىلىپ، پەرزەنت بېرىپ، نەسلىڭنى كۆپەيتىپ، سەندىن نۇرغۇن خەلق چىقارغاي. ‏4 ئۇ ئىبراھىمنىڭ بەرىكىتىنى ساڭا ۋە سېنىڭ نەسلىڭگە بەرگەي. شۇنداقكى، خۇدا ئىبراھىمغا بەرگەن، سەن ئۆزۈڭ مۇساپىر بولۇپ تۇرغان بۇ زېمىنغا ئىگە بولغايسەن» دېدى. ‏5 شۇنىڭ بىلەن ئىسئھاق ياقۇبنى يولغا سالدى. ئۇ پاددان-ئارامغا مېڭىپ، ئاراملىق بېتۇئەلنىڭ ئوغلى، ياقۇب بىلەن ئەساۋنىڭ ئانىسى رىبەقانىڭ ئاكىسى بولغان لاباننىڭ قېشىغا باردى.

‏6 ئەساۋ ئىسئھاقنىڭ ياقۇبقا خەيرلىك دۇئا قىلىپ، ئۇنى خوتۇن ئېلىشقا پاددان-ئارامغا ئەۋەتكەنلىكىنى، ۋە ئۇنىڭغا خەيرلىك دۇئا قىلغىنىدا جېكىلەپ: «سەن كەنئانلارنىڭ قىزلىرىدىن خوتۇن ئالما» دېگەنلىكىنى ئاڭلاپ، ‏7 ياقۇبنىڭ ئۆز ئاتا-ئانىسىغا ئىتائەت قىلىپ، پاددان-ئارامغا كەتكىنىنى كۆرگىنىدە، ‏8 ئەساۋ كەنئانلىق قىزلىرىنىڭ ئاتىسىنىڭ نەزىرىدە يامان ئىكەنلىكىنى چۈشەندى. ‏9 شۇڭا ئۇ ئىسمائىلنىڭ يېنىغا بېرىپ، خوتۇنلىرىنىڭ ئۈستىگە ئىبراھىمنىڭ ئوغلى ئىسمائىلنىڭ قىزى، نەبايوتنىڭ سىڭلىسى بولغان ماھالاتنى خوتۇنلۇققا ئالدى.

‏10 ياقۇب بولسا بەئەرشېبادىن چىقىپ، ھاران تەرەپكە مېڭىپ، ‏11 بىر يەرگە يېتىپ كەلگەندە، كۈن پېتىپ كەتكەچكە شۇ يەردە قوندى. ئۇ شۇ يەردىكى تاشلاردىن بىرىنى ئېلىپ، بېشىنىڭ ئاستىغا قويۇپ، شۇ يەردە ئۇخلىغىلى ياتتى. ‏12 ئۇ چۈشىدە، مانا، يەر يۈزىگە تىكلەنگەن، ئۇچى ئاسمانغىچە تاقىشىدىغان بىر شوتىنى كۆردى. خۇدانىڭ پەرىشتىلىرى ئۇنىڭدىن چىقىپ-چۈشۈپ تۇراتتى. ‏13 پەرۋەردىگار ئۇنىڭ ئۈستىدە تۇرۇپ، ياقۇبقا سۆز قىلىپ: «مەن ئاتاڭ ئىبراھىمنىڭ خۇداسى ۋە ئىسئھاقنىڭ خۇداسى بولغان پەرۋەردىگاردۇرمەن. مەن سەن ياتقان بۇ زېمىننى ساڭا ۋە سېنىڭ نەسلىڭگە بېرىمەن. ‏14 نەسلىڭ يەردىكى قۇمدەك كۆپ بولىدۇ. سەن غەرب ۋە شەرققە، شىمال ۋە جەنۇبقا يېيىلىسەن. سەن ۋە سېنىڭ نەسلىڭ ئارقىلىق يەردىكى بارچە قەبىلىلەر بەرىكەت تاپىدۇ. ‏15 مانا، مەن سەن بىلەن بىللە بولۇپ، قەيەرگە بارساڭ، سېنى قوغداپ، بۇ زېمىنغا سېنى قايتۇرۇپ كېلىمەن. ساڭا ئېيتقان سۆزۈمنى ئەمەلگە ئاشۇرمىغۇچە سېندىن ئايرىلمايمەن» دېدى. ‏16 ئاندىن ياقۇب ئويغىنىپ: «پەرۋەردىگار ھەقىقەتەن بۇ يەردىدۇر، لېكىن مەن بىلمەپتىمەن» دەپ ئويلاپ، ‏17 قورقۇپ كېتىپ: «بۇ نېمىدېگەن قورقۇنچلۇق جاي! بۇ خۇدانىڭ بەيتىدىن باشقا بىر نېمە ئەمەس، بۇ ئاسماننىڭ دەرۋازىسى ئىكەن!» دېدى.

‏18 ياقۇب ئەتىسى سەھەر ئورنىدىن تۇرۇپ، بېشىنىڭ ئاستىغا قويغان تاشنى ئېلىپ، بەلگە بولسۇن دەپ ئۇنى خاتىرە تۈۋرۈك قىلىپ تىكلەپ، ئۈستىگە ياغ قۇيۇپ قويدى. ‏19 ئۇ بۇ جاينى بەيتەل دەپ ئاتىدى. ئەمما ئىلگىرى بۇ جاينىڭ ئىسمى لۇز ئىدى. ‏20 ئاندىن ياقۇب: «ئەگەر خۇدا مەن بىلەن بىللە بولۇپ، بۇ سەپىرىمدە مېنى ساقلاپ، يېگىلى نان، كىيگىلى كىيىم بېرىپ تۇرسا ‏21 ۋە مەن ئاتامنىڭ ئۆيىگە ئامان-ئېسەن قايتىپ كەلسەم، پەرۋەردىگار مېنىڭ خۇدايىم بولىدۇ. ‏22 مەن بەلگە بولسۇن دەپ تىكلەپ قويغان بۇ تاش خۇدانىڭ بەيتى بولسۇن، ۋە چوقۇم سەن ماڭا بېرىدىغان نەرسىلەرنىڭ ئوندىن بىرىنى ساڭا سۇنىمەن» دەپ ۋەدە قىلدى.