‏1 ئاندىن ياقۇب قوزغىلىپ يولغا چىقىپ، شەرق تەرەپتىكى قەبىلىلەرنىڭ زېمىنىغا يېتىپ كەلدى. ‏2 ئۇ قارىسا، مانا، دالادا بىر قۇدۇقنى ۋە ئۇنىڭ يېنىدا ئۈچ توپ قوي پادىسى ياتاتتى، چۈنكى خەلق بۇ قۇدۇقتىن پادىلىرىنى سۇغىراتتى. قۇدۇقنىڭ ئاغزىغا چوڭ بىر تاش قويۇقلۇق ئىدى. ‏3 پادىلارنىڭ ھەممىسى ئۇ يەرگە يىغىلغاندا، كىشىلەر قۇدۇقنىڭ ئاغزىدىكى تاشنى دومىلىتىۋېتىپ، قويلارنى سۇغىرىپ، ئاندىن تاشنى يەنە قۇدۇقنىڭ ئاغزىغا ئۆز ئورنىغا قويۇپ قوياتتى. ‏4 ياقۇب ئۇ يەردىكى ئادەملەرگە سۆز قىلىپ: «ئەي بۇرادەرلەر، سىلەر قەيەرلىك؟» دېدى. ئۇلار: «بىز ھارانلىق» دېدى. ‏5 ئۇ ئۇلاردىن: «سىلەر ناھورنىڭ ئوغلى لاباننى تونۇمسىلەر؟» دەپ سورىدى. ئۇلار: «تونۇيمىز» دېدى. ‏6 ياقۇب يەنە: «ئۇ سالامەتمۇ؟» دەپ سورىسا، ئۇلار: «ھە، سالامەت. ئەنە، ئۇنىڭ قىزى راھىلە ئۇنىڭ قويلىرى بىلەن كېلىۋاتىدۇ» دەپ جاۋاب بەردى. ‏7 ياقۇب ئۇلارغا: «مانا، كۈن ھازىر تېخى ئېگىز، مالنى يىغىدىغان ۋاقىت تېخى بولمىدى. قويلارنى سۇغىرىپ، ئاپىرىپ ئوتلىتىڭلار» دېدى. ‏8 ئۇلار: «ياق، مۇنداق قىلالمايمىز. ھەممە پادىلار يىغىلىپ، پادىچىلار تاشنى قۇدۇقنىڭ ئاغزىدىن دومىلىتىۋەتكەندىن كېيىنلا بىز قويلارنى سۇغىرالايمىز» دېدى.

‏9 ئۇ تېخى ئۇلار بىلەن گەپلىشىپ تۇرغىنىدا، راھىلە ئاتىسىنىڭ قويلىرى بىلەن يېتىپ كەلدى. چۈنكى ئۇ ئۇلارنى باقاتتى. ‏10 ياقۇب تاغىسى لاباننىڭ قىزى راھىلەنى ۋە ئۇنىڭ قويلىرىنى كۆرگىنىدە، بېرىپ قۇدۇقنىڭ ئاغزىدىن تاشنى دومىلىتىۋېتىپ، تاغىسى لاباننىڭ قويلىرىنى سۇغاردى. ‏11 ئاندىن ياقۇب راھىلەنى سۆيۈپ، ئۈن سېلىپ يىغلاپ كەتتى. ‏12 ياقۇب راھىلەگە: «مەن ئاتاڭنىڭ تۇغقىنى، رىبەقانىڭ ئوغلى بولىمەن» دېدى. رەھىلە يۈگۈرۈپ بېرىپ، ئاتىسىغا خەۋەر قىلدى.

‏13 لابان ئۆز سىڭلىسىنىڭ ئوغلى ياقۇب توغرىسىدىكى خەۋەرنى ئاڭلىغاندا، ئۇنىڭ ئالدىغا يۈگۈرۈپ بېرىپ، ئۇنى قۇچاقلاپ سۆيۈپ، ئۆيىگە باشلاپ كەلدى. ئاندىن ياقۇب لابانغا ئۆتكەن ۋەقەلىرىنى سۆزلەپ بەردى. ‏14 لابان ئۇنىڭغا: «سەن دەرۋەقە مېنىڭ سۆڭىكىم ۋە ئېتىمدۇرسەن» دېدى. بۇنىڭ بىلەن ئۇ ئۇنىڭ قېشىدا بىر ئايچە تۇرۇپ قالدى. ‏15 ئاندىن لابان ياقۇبقا: «سەن مېنىڭ تۇغقىنىم بولساڭمۇ، ماڭا بىكارغا خىزمەت قىلامسەن؟ ئېيتقىنە، ئىش ھەققىڭگە نېمە ئالىسەن؟» دېدى. ‏16 لاباننىڭ ئىككى قىزى بار ئىدى. چوڭىنىڭ ئىسمى لېيا، كىچىكىنىڭ ئىسمى راھىلە ئىدى. ‏17 لېيانىڭ كۆزلىرى نۇرسىز ئىدى، راھىلە بولسا قەددى-قامىتى كېلىشكەن، چىرايلىق بىر قىز ئىدى. ‏18 ياقۇب راھىلەگە ئاشىق بولغاچقا، لابانغا: «مەن سېنىڭ كىچىك قىزىڭ راھىلە ئۈچۈن ساڭا يەتتە يىل خىزمەت قىلاي» دېدى. ‏19 لابان جاۋاب بېرىپ: «ئۇنى باشقا كىشىگە بەرگىنىمدىن ساڭا بەرگىنىم ياخشى. ئەمدى مېنىڭكىدە تۇرغىن» دېدى.

‏20 ياقۇب راھىلە ئۈچۈن يەتتە يىل خىزمەت قىلدى. ئەمما ئۇ ئۇنى ئىنتايىن ياخشى كۆرگەچكە، بۇ يىللار ئۇنىڭغا بىرنەچچە كۈندەك بىلىندى. ‏21 ئاندىن ياقۇب لابانغا: «مانا، كۈنلىرىم توشتى. ئەمدى ئايالىمنى ماڭا بەرگىن. مەن ئۇنى ئۆزۈمگە ئالاي» دېدى. ‏22 لابان شۇ يەردىكى ھەممە ئادەملەرنى يىغىپ، زىياپەت بەردى. ‏23 لېكىن ئاخشام بولغاندا ئۇ چوڭ قىزى لېيانى ئېلىپ، ياقۇبقا كەلتۈردى. ياقۇپ ئۇنىڭ بىلەن بىللە بولدى. ‏24 لابان ئۆز دېدىكى زىلپانى قىزى لېياغا دېدەك قىلىپ بەردى. ‏25 لېكىن ئەتىسى ياقۇب شۇنداق قارىسا، مانا، ئۇ لېيا ئىكەن! ئۇ لابانغا: «بۇ ماڭا نېمە قىلغىنىڭ؟ مەن راھىلە ئۈچۈن ساڭا خىزمەت قىلدىم ئەمەسمۇ؟ مېنى نېمىشقا ئالدىدىڭ؟» دېدى. ‏26 لابان: «بۇ يەردىكى ئادەتلىرىمىز بويىچە كىچىكى چوڭىدىن ئىلگىرى بېرىلمەيدۇ. ‏27 ئەمدى سەن بۇ توي ھەپتىسىنى تامام قىلغىن. كېيىن يەنە ئىككىنچىسىنىمۇ ساڭا بېرەيلى. ئەمما ئۇنىڭ ئۈچۈن يەنە يەتتە يىل ماڭا خىزمەت قىلىشىڭ لازىم بولىدۇ» دېدى. ‏28 ياقۇب ماقۇل بولدى. ئۇ لېيانىڭ توي ھەپتىسىنى تامام قىلغاندىن كېيىن، لابان قىزى راھىلەنىمۇ ئۇنىڭغا خوتۇنلۇققا بەردى. ‏29 لابان ئۆز دېدىكى بىلھانى قىزى راھىلەگە دېدەك قىلىپ بەردى. ‏30 ياقۇب راھىلە بىلەنمۇ بىللە بولدى. ئۇ راھىلەنى لېيادىن زىيادە ياخشى كۆردى. شۇنداق قىلىپ، ئۇ يەنە يەتتە يىل لابانغا خىزمەت قىلدى.

‏31 ئەمما پەرۋەردىگار ئۇنىڭ لېيانى ياخشى كۆرمىگىنىنى كۆرۈپ، ئۇنى تۇغۇتلۇق قىلىپ قويدى. لېكىن راھىلە تۇغماس ئىدى. ‏32 لېيا ھامىلىدار بولۇپ، بىر ئوغۇل تۇغدى، ئۇنىڭ ئىسمىنى رۇبەن دەپ قويۇپ: «پەرۋەردىگار دەرد-ئەلىمىمنى كۆردى. ئەمدى ئېرىم مېنى ياخشى كۆرىدىغان بولىدۇ» دېدى. ^■   ‏33 ئۇ يەنە ھامىلىدار بولۇپ، بىر ئوغۇل تۇغۇپ: «پەرۋەردىگار مېنىڭ ياخشى كۆرۈلمىگىنىمنى ئاڭلاپ، بۇنىمۇ ماڭا بەردى» دەپ ئۇنىڭ ئىسمىنى شىمون دەپ قويدى. ^■   ‏34 ئۇ يەنە ھامىلىدار بولۇپ، بىر ئوغۇل تۇغۇپ: «ئەمدى بۇ قېتىم ئېرىم ماڭا باغلىنىپ قالىدۇ، چۈنكى مەن ئۇنىڭغا ئۈچ ئوغۇل تۇغۇپ بەردىم» دېدى. شۇڭا ئۇنىڭغا «لاۋىي» دېگەن ئىسىم قويۇلدى. ^■   ‏35 ئۇ يەنە ھامىلىدار بولۇپ، بىر ئوغۇل تۇغۇپ: «ئەمدى مەن پەرۋەردىگارغا مەدھىيە ئوقۇي» دەپ، ئۇنىڭ ئىسمىنى يەھۇدا دەپ قويدى. ئاندىن كېيىن ئۇ تۇغۇتتىن توختاپ قالدى. ^■