‏1 ياقۇب بېشىنى كۆتۈرۈپ قارىسا، مانا، ئەساۋ تۆت يۈز كىشى بىلەن كېلىۋاتاتتى. ئۇ دەرھال بالىلىرىنى ئايرىپ لېيا، راھىلە ۋە ئىككى دېدىكىگە تاپشۇردى. ‏2 ئۇ ئىككى دېدەك ۋە ئۇلارنىڭ بالىلىرىنى ئەڭ ئالدىدا ماڭدۇردى، ئاندىن لېيا ۋە ئۇنىڭ بالىلىرىنى، ئەڭ ئاخىرىدا راھىلە ۋە يۈسۈپنى ماڭدۇردى. ‏3 ئۆزى بولسا ئۇلارنىڭ ئالدىغا ئۆتۈپ، ئاكىسىنىڭ ئالدىغا كەلگەندە، يەتتە قېتىم يەرگە تەگكۈدەك ئېگىلىپ تەزىم قىلدى. ‏4 ئەساۋ ئۇنىڭ ئالدىغا يۈگۈرۈپ، ئۇنى قۇچاقلاپ بوينىغا گىرە سېلىپ، ئۇنى سۆيدى. ئىككىسى يىغلىشىپ كۆرۈشتى. ‏5 ئاندىن ئەساۋ بېشىنى كۆتۈرۈپ، ئاياللار ۋە بالىلارنى كۆرۈپ: «بۇ يېنىڭدىكىلەر كىم بولىدۇ؟» دەپ سورىدى. ياقۇب: «بۇلار خۇدا مەرھەمەت قىلىپ قۇلۇڭغا بەرگەن بالىلاردۇر» دېدى. ‏6 ئاندىن ئىككى دېدەك بالىلىرى بىلەن ئالدىغا بېرىپ، ئۇنىڭغا تەزىم قىلدى، ‏7 ئاندىن لېيامۇ بالىلىرى بىلەن ئالدىغا كېلىپ، تەزىم قىلدى. ئاخىرىدا يۈسۈپ ۋە راھىلە ئالدىغا كېلىپ، تەزىم قىلدى. ‏8 ئەساۋ: «ماڭا ئۇچرىغان بۇ توپلارنىڭ ھەممىسى نېمە ئۈچۈندۇر؟» دېسە، ئۇ جاۋاب بېرىپ: «خوجامنىڭ نەزىرىدە ئىلتىپات تېپىشىم ئۈچۈندۇر» دېدى. ‏9 بىراق ئەساۋ: «ئەي ئۇكام، مەندە يەتكۈدەك بار. سېنىڭ نەرسىلىرىڭ ئۆزۈڭگە قالسۇن» دېدى. ‏10 ئەمما ياقۇب: «ياق، بولمايدۇ. ئەگەر مەن نەزىرىڭدە ئىلتىپات تاپقان بولسام، قولۇمدىن ھەدىيەمنى قوبۇل قىلغايسەن. چۈنكى سېنىڭ مەندىن رازى بولغان يۈزۈڭنى كۆرگىنىمدە، خۇدانىڭ يۈزىنى كۆرگەندەك بولدۇم. ‏11 ئەمدى مېنىڭ ساڭا كەلتۈرگەن ھەدىيەمنى قوبۇل قىلىپ ئالغايسەن. خۇدا ماڭا مەرھەمەت قىلغاچقا، ھەممە نەرسەم بار» دېدى. ياقۇب قايتا-قايتا تەلەپ قىلغاچقا، ئەساۋ ئاخىر قوبۇل قىلىپ ئالدى.

‏12 ئاندىن ئەساۋ: «ئەمدى بىز قوزغىلىپ ماڭايلى. مەن ئالدىڭدا ماڭاي» دېدى. ‏13 ياقۇب ئۇنىڭغا جاۋاب بېرىپ: «ئەي خوجام، سەن بىلىسەن، بالىلار كىچىك ۋە قېشىمدا ئېمىتىدىغان قوي ۋە كالىلار بار. ئەگەر مەن بۇلارنى بىر كۈنلا زىيادە ماڭدۇرسام، پۈتۈن پادا ئۆلۈپ كېتىدۇ. ‏14 شۇڭا، خوجام ئۆز قۇلىنىڭ ئالدىدا ماڭسۇن. مەن ئالدىمدىكى پادا ۋە بالىلارنىڭ مېڭىشىغا قاراپ ئاستا-ئاستا مېڭىپ، ئۆز خوجامنىڭ قېشىغا سېئىرغا يېتىپ باراي» دېدى. ‏15 ئەساۋ ئۇنىڭغا: «ئۇنداق بولسا، مەن ئۆزۈم بىلەن كەلگەن كىشىلەردىن بىرنەچچىنى قېشىڭدا قالدۇرۇپ كېتەي» دېدى. لېكىن ئۇ جاۋاب بېرىپ: «بۇ لازىم ئەمەس. پەقەتلا خوجامنىڭ نەزىرىدە ئىلتىپات تاپسام، شۇ ماڭا كۇپايە» دېدى. ‏16 شۇنىڭ بىلەن ئەساۋ شۇ كۈنى سېئىرغا قايتىپ كەتتى.

‏17 ياقۇب بولسا يولغا راۋان بولۇپ، سۇككوت دېگەن جايغا كەلدى. ئۇ يەردە ئۇ ئۆزىگە ئۆي ۋە ماللىرىغا لاپاس سالدى. شۇڭا بۇ يەر سۇككوت دەپ ئاتالدى. ^■   ‏18 ياقۇب پاددان-ئارامدىن كەنئان زېمىنىدىكى شەكەم شەھىرىگە تىنچ-ئامان كەلدى. ئۇ شەھەرنىڭ ئالدىدا چېدىر تىكتى. ‏19 ئۇ ئۇ يەرنىڭ چېدىر تىككەن پارچىسىنى شەكەمنىڭ ئاتىسى بولغان خامورنىڭ بالىلىرىدىن يۈز كۈمۈش تەڭگىگە سېتىۋالدى. ‏20 ئۇ بۇ يەردە بىر قۇربانلىق سۇپىسى ياساپ، نامىنى ئەل-ئەلوھىي-ئىسرائىل دەپ ئاتىدى. ^■