‏1 يۈسۈپ مىسىرغا كەلتۈرۈلگىنىدە، فىرئەۋننىڭ بىر ئوردا ئەمەلدارى، ئۇنىڭ ياساۋۇل بېگى پوتىفار، ئۇنى ئۇ يەرگە ئېلىپ كەلگەن ئىسمائىلىيلارنىڭ قولىدىن سېتىۋالدى. ‏2 لېكىن پەرۋەردىگار يۈسۈپكە يار بولغاچقا، ئۇ ئىشلىرىدا مۇۋەپپەقىيەتلىك ئادەم بولۇپ، ئۆزىنىڭ مىسىرلىق خوجايىنىنىڭ ئۆيىدە تۇرۇپ قالدى. ‏3 ئۇنىڭ خوجايىنى پەرۋەردىگارنىڭ ئۇنىڭغا يار ئىكەنلىكىنى ۋە ئۇ نېمە ئىش قىلسا، پەرۋەردىگارنىڭ ئۇنىڭ قولىغا مۇۋەپپەقىيەت كەلتۈرۈپ بەرگىنىنى كۆردى.

‏4 شۇنىڭ ئۈچۈن يۈسۈپ ئۇنىڭ ئالدىدا ئىلتىپاتقا ئېرىشىپ، ئۇنىڭ خىزمىتىنى قىلاتتى. خوجايىنى ئۇنى ئۆز ئۆيىنىڭ غوجىدارى قىلىپ تەيىنلەپ، بارلىق تەئەللۇقاتىنى ئۇنىڭ قولىغا تاپشۇردى. ‏5 ئۇ ئۇنى ئۆيى ۋە بارلىق تەئەللۇقاتىنى باشقۇرۇشقا قويغاندىن تارتىپ، پەرۋەردىگار بۇ مىسىرلىقنىڭ ئۆيىگە يۈسۈپنىڭ سەۋەبىدىن بەرىكەت ئاتا قىلدى، پەرۋەردىگارنىڭ بەرىكىتى ئۆيىدىكى ۋە دالادىكى پۈتۈن بارلىقىغا كەلدى. ‏6 شۇنىڭ ئۈچۈن ئۇ پۈتۈن بارلىقىنى يۈسۈپنىڭ قولىغا تاپشۇرۇپ قويۇپ، ئۆزى يەيدىغان ناندىن باشقا نەرسە بىلەن كارى بولمىدى. يۈسۈپ قەددى-قامىتى كېلىشكەن، چىرايلىق يىگىت ئىدى.

‏7 بىرنەچچە ۋاقىت ئۆتكەندىن كېيىن يۈسۈپكە ئۇنىڭ خوجايىنىنىڭ ئايالىنىڭ كۆزى چۈشۈپ قالدى. ئۇ ئۇنىڭغا: «مەن بىلەن بىر ئورۇندا ياتقىن» دېدى. ‏8 ئەمما ئۇ ئۇنىماي، خوجايىنىنىڭ ئايالىغا: «مانا، خوجايىنىم ئۆيدىكى مېنىڭ قولۇمدا بولغان بارلىق نەرسىلىرى بىلەن كارى يوق. ئۇ پۈتۈن بارلىقىنى مېنىڭ قولۇمغا تاپشۇرۇپ قويدى. ‏9 بۇ ئۆيدە مەندىن چوڭ كىشى يوق. سەندىن باشقا ھېچبىر نەرسىنى مەندىن ئايىمىدى، چۈنكى سەن ئۇنىڭ ئايالىدۇرسەن. شۇنداق تۇرۇقلۇق، مەن قانداقمۇ بۇنداق يامانلىقنى قىلىپ، خۇدا ئالدىدا گۇناھكار بولاي؟» دېدى. ‏10 ئۇ ھەر كۈنى يۈسۈپكە گەپ قىلسىمۇ، ئۇ ئۇنىڭ بىلەن ياتمىدى، ئۇنىڭغا يېقىن يولىمىدى.

‏11 بىر كۈنى ئۆيدىكىلەردىن ھېچكىم يوق ۋاقتىدا، يۈسۈپ ئۆز ئىشى بىلەن ئۆيگە كىرسە، ‏12 بۇ ئايال ئۇنىڭ تونىغا ئېسىلىۋېلىپ: «مەن بىلەن بىر ئورۇندا ياتقىن» دېدى. يۈسۈپ تونىنى ئۇنىڭ قولىدا قالدۇرۇپ قويۇپ، قېچىپ تاشقىرىغا چىقىپ كەتتى. ‏13 ئايال ئۇنىڭ ئۆز تونىنى ئۇنىڭ قولىدا قالدۇرۇپ، تاشقىرىغا قېچىپ كەتكىنىنى كۆرگەندە، ‏14 ئۆيىدىكى خىزمەتكارلىرىنى چاقىرىپ، ئۇلارغا: «قاراڭلار، بىزگە ھاقارەت قىلسۇن دەپ، ئېرىم بىر ئىبرانىي ئادەمنى بىزگە ئېلىپ كەلدى! بۇ ئادەم قېشىمغا كىرىپ، مەن بىلەن بىللە ياتماقچى بولدى، لېكىن مەن قاتتىق ئاۋاز بىلەن ۋارقىرىدىم. ‏15 ئۇ مېنىڭ يۇقىرى ئاۋازدا ۋارقىرىغىنىمنى ئاڭلىغاندا ئۆز تونىنى يېنىمغا تاشلاپ قويۇپ، قېچىپ تاشقىرىغا چىقىپ كەتتى» دېدى. ‏16 ئۇ ئۇنىڭ تونىنى خوجايىنى ئۆيگە قايتىپ كەلگۈچە ئۆز يېنىدا ساقلاپ قويدى. ‏17 ئاندىن ئۇنىڭغىمۇ ئوخشاش گەپ قىلىپ: «سەن ئېلىپ كەلگەن ئىبرانىي قۇل ماڭا ھاقارەت قىلىشقا قېشىمغا كىردى. ‏18 لېكىن مەن يۇقىرى ئاۋاز بىلەن ۋارقىرىسام، ئۇ ئۆز تونىنى يېنىمغا تاشلاپ، تاشقىرىغا قېچىپ كەتتى» دېدى. ‏19 ئۇنىڭ خوجايىنى ئۆز ئايالىنىڭ: «سېنىڭ قۇلۇڭ ماڭا ئۇنداق قىلدى-مۇنداق قىلدى» دېگەن سۆزلىرىنى ئاڭلىغىنىدا، قاتتىق غەزەپكە كەلدى. ‏20 خوجايىنى يۈسۈپنى تۇتۇپ، پادىشاھنىڭ مەھبۇسلىرى سولانغان ئوردا زىندانىغا سولاپ قويدى. شۇنىڭ بىلەن ئۇ شۇ يەردە سولاقتا يېتىپ قالدى.

‏21 لېكىن پەرۋەردىگار يۈسۈپكە يار بولۇپ، ئۇنىڭغا مېھىر-شەپقەت كۆرسىتىپ، گۇندىپاينىڭ ئالدىدا ئىلتىپاتقا ئېرىشتۈردى. ‏22 شۇنداقكى، گۇندىپاي زىنداندىكى مەھبۇسلارنىڭ ھەممىسىنى يۈسۈپنىڭ قولىغا تاپشۇردى. ئۇ يەردىكى ھەممە ئىشلارغا ئۇ مەسئۇل ئىدى. ‏23 گۇندىپاي ئۇنىڭ قولىدىكى ھېچ ئىشتىن ئەندىشە قىلمايتتى، چۈنكى پەرۋەردىگار ئۇنىڭغا يار بولغاچقا، ھەممە ئىشلىرىدا پەرۋەردىگار ئۇنى مۇۋەپپەقىيەتلىك قىلاتتى.