‏1 بىرنەچچە ۋاقىت ئۆتكەندىن كېيىن مىسىر پادىشاھىنىڭ ساقىيى ۋە ناۋىيى ئۆز خوجايىنى بولغان مىسىر پادىشاھى ئالدىدا خاتالىق ئۆتكۈزدى. ‏2 شۇنىڭ بىلەن فىرئەۋن باش ساقىي ۋە باش ناۋاي بولغان بۇ ئىككى ئوردا ئەمەلدارىغا قاتتىق غەزەپلىنىپ، ‏3 ئۇلارنى خاس ياساۋۇل بېگىنىڭ سارىيىدىكى يۈسۈپ سولاقلىق تۇرغان زىندانغا سولاپ قويدى. ‏4 ياساۋۇل بېگى يۈسۈپنى ئۇلارغا خىزمەت قىلىشقا تەيىنلەپ قويدى. ئۇلار سولاقتا بىر مەزگىل يېتىپ قالدى. ‏5 مىسىر پادىشاھىنىڭ ساقىيى ۋە ناۋىيى زىنداندا سولاقلىق تۇرغىنىدا، ئىككىلىسى بىر كېچىدە ھەربىرى ئۆزىگە يارىشا تەبىرى بار چۈش كۆردى.

‏6 ئەتىگىنى يۈسۈپ ئۇلارنىڭ قېشىغا كىرگىنىدە، ئۇلارنىڭ غەمكىن ئولتۇرغىنىنى كۆرۈپ، ‏7 ئۆزى بىلەن بىللە خوجايىنىنىڭ ئۆيىدە سولاقلىق تۇرغان فىرئەۋننىڭ ئوردا ئەمەلدارلىرىدىن: «بۈگۈن نېمىشقا چىرايىڭلار سولغۇن؟» دەپ سورىدى. ‏8 ئۇلار ئۇنىڭغا: «ئىككىمىز بىر چۈش كۆردۇق، ئەمما ئۇنىڭ تەبىرىنى ئېيتىپ بېرىدىغان كىشى يوق» دېدى. يۈسۈپ ئۇلارغا: «تەبىر بېرىش خۇدادىن ئەمەسمۇ؟ چۈشنى ماڭا ئېيتىپ بېرىڭلار» دېدى.

‏9 بۇنىڭ بىلەن باش ساقىي يۈسۈپكە ئۆز چۈشىنى ئېيتىپ بېرىپ: «چۈشۈمدە ئالدىمدا بىر ئۈزۈم تېلى تۇرغىنىنى كۆردۈم. ‏10 بۇ ئۈزۈم تېلىنىڭ ئۈچ شېخى بار ئىكەن. مانا، ئۇ بىخلاپ، كۆكلەپ، چېچەكلەپ، ساپاقلىرىدا ئۈزۈم پىشىپ ساڭگىلاپ تۇرۇپتۇ. ‏11 فىرئەۋننىڭ قەدىھىنى قولۇمدا تۇتۇپ، ئۈزۈملەرنى ئېلىپ فىرئەۋننىڭ قەدىھىگە سىقىپ، قەدەھنى ئۇنىڭ قولىغا بەردىم» دېدى. ‏12 يۈسۈپ ئۇنىڭغا مۇنداق دېدى: «چۈشنىڭ تەبىرى شۇكى: بۇ ئۈچ شاخ ئۈچ كۈن دېمەكتۇر. ‏13 ئۈچ كۈن ئىچىدە فىرئەۋن ساڭا ئىززەت ئاتا قىلىپ، سېنى قايتىدىن ئۆز مەنسىپىڭگە ئولتۇرغۇزىدۇ. شۇنىڭ بىلەن سەن بۇرۇن فىرئەۋنگە ساقىي بولغاندا قىلغىنىڭدەك، يەنە ئۇنىڭ قولىغا قەدەھ بېرىدىغان بولىسەن. ‏14 لېكىن ئىشلىرىڭ ئوڭۇشلۇق بولغاندا، مېنى يادىڭغا كەلتۈرۈپ ماڭا غەمخورلۇق قىلغايسەن. فىرئەۋننىڭ ئالدىدا مەن توغرۇلۇق گەپ قىلىپ، مېنى بۇ ئۆيدىن چىقارتقايسەن. ‏15 چۈنكى مەن ئىبرانىيلارنىڭ زېمىنىدىن ناھەق ئېلىپ كېتىلدىم. بۇ يەردىمۇ مېنى زىندانغا تاشلىغۇدەك بىر ئىش قىلمىدىم».

‏16 باش ناۋاي بولسا يۈسۈپنىڭ ياخشى تەبىر بەرگىنىنى كۆرۈپ، ئۇنىڭغا: «مەنمۇ بىر چۈشنى كۆردۈم. مانا، بېشىمدا ئۈچ سېۋەت ئاق نان بار ئىكەن. ‏17 ئەڭ ئۈستىدىكى سېۋەتتە فىرئەۋن يەيدىغان ھەر خىل نانلار بار ئىكەن. لېكىن قۇشلار بېشىمدىكى سېۋەتتىن ئۇلارنى يېمەكتە ئىكەن» دېدى. ‏18 يۈسۈپ جاۋاب بېرىپ: «چۈشنىڭ تەبىرى شۇكى: بۇ ئۈچ سېۋەت ئۈچ كۈن دېمەكتۇر. ‏19 ئۈچ كۈن ئىچىدە فىرئەۋن سېنىڭ بېشىڭنى كېسىپ، سېنى دارغا ئاسىدۇ ۋە قۇشلار كېلىپ، گۆشۈڭنى يەيدۇ» دېدى.

‏20 ئۈچىنچى كۈنى فىرئەۋننىڭ تۇغۇلغان كۈنى بولغاچقا، ئۇ ھەممە خىزمەتكارلىرى ئۈچۈن بىر زىياپەت ئۆتكۈزۈپ، ئۆز خىزمەتكارلىرىنىڭ ئارىسىدا باش ساقىي ۋە باش ناۋاينىڭ «بېشىنى كۆتۈردى»، ‏21 شۇنداقكى ئۇ باش ساقىينى قايتىدىن ئۆز مەنسىپىگە ئولتۇرغۇزۇپ قويدى. ئۇ يەنە فىرئەۋننىڭ قولىغا قەدەھ بېرىدىغان بولدى. ‏22 لېكىن باش ناۋاينى يۈسۈپ تەبىر بەرگەندەك دارغا ئېسىۋەتتى. ‏23 ئەمما باش ساقىي، يۈسۈپنى ئەسلىمەي ئۇنى ئۇنتۇپ قالدى.