‏1 ئىسرائىل ھەممە مال-مۈلكىنى ئېلىپ يولغا چىقتى. ئۇ بەئەرشېباغا كېلىپ، ئۇ يەردە ئاتىسى ئىسئھاقنىڭ خۇداسىغا ئاتاپ قۇربانلىق قىلدى. ‏2 كېچىسى خۇدا بىر ۋەھىيدە ئىسرائىلغا: «ئەي ياقۇب، ئەي ياقۇب» دېدى. ئۇ: «مانا مەن» دەپ جاۋاب بەردى. ‏3 ئۇ ئۇنىڭغا: «مەن خۇدا، سېنىڭ ئاتاڭنىڭ خۇداسىدۇرمەن. سەن مىسىرغا بېرىشتىن قورقمىغىن، چۈنكى مەن سېنى ئۇ يەردە چوڭ بىر خەلق قىلىمەن. ‏4 مەن سەن بىلەن بىللە مىسىرغا بېرىپ، يەنە شۇ يەردىن سېنى قايتۇرۇپ كېلىمەن. يۈسۈپ ئۆز قولى بىلەن سېنىڭ كۆزۈڭنى يۇمدۇرىدۇ» دېدى.

‏5 ئاندىن ياقۇب بەئەرشېبادىن قوزغىلىپ يولغا چىقتى. ئىسرائىلنىڭ ئوغۇللىرى ئۆز ئاتىسى ياقۇب ۋە بالا-چاقىلىرىنى، فىرئەۋن ئۇلارنى ئېلىپ كېلىش ئۈچۈن ئەۋەتكەن ھارۋىلارغا ئولتۇرغۇزۇپ، ‏6 چارۋا ماللىرى ۋە كەنئان زېمىنىدا تاپقان مال-مۈلكىنى ئېلىپ ماڭدى. بۇ تەرىقىدە ياقۇب ھەممە ئەۋلادلىرى بىلەن بىللە مىسىرغا كەلدى. ‏7 ئۇ ئوغۇللىرى ۋە ئوغۇل نەۋرىلىرىنى، قىزلىرى ۋە قىز نەۋرىلىرىنى يىغىپ، ھەممە ئەۋلادلىرىنى ئۆزى بىلەن بىللە مىسىرغا ئېلىپ كەلدى.

‏8 مىسىرغا كەلگەن ئىسرائىلنىڭ ئەۋلادلىرىنىڭ ئىسىملىرى تۆۋەندىكىچە:

ياقۇب ۋە ئۇنىڭ ئوغۇللىرى: ياقۇبنىڭ تۇنجى ئوغلى رۇبەن ئىدى.

‏9 رۇبەننىڭ ئوغۇللىرى خانوك، پاللۇ، خەزرون ۋە كارمى ئىدى.

‏10 شىموننىڭ ئوغۇللىرى يېمۇئەل، يامىن، ئوھاد، ياكىن، زوخار ۋە كەنئانلىق ئايالدىن بولغان شائۇل ئىدى.

‏11 لاۋىينىڭ ئوغۇللىرى گەرشون، قوھات ۋە مەرارى ئىدى.

‏12 يەھۇدانىڭ ئوغۇللىرى ئېر، ئونان، شېلا، پەرەز ۋە زېراھ ئىدى. ئەمما ئېر ۋە ئونان كەنئان زېمىنىدا ئۆلۈپ كەتكەنىدى. پەرەسنىڭ ئوغۇللىرى بولسا خەزرون ۋە خامۇل ئىدى.

‏13 ئىسساكارنىڭ ئوغۇللىرى تولاھ، پۇۋا، يوباب ۋە شىمرون ئىدى.

‏14 زەبۇلۇننىڭ ئوغۇللىرى سېرەد، ئېلون ۋە ياھلىئەل ئىدى.

‏15 بۇلار لېيانىڭ ياقۇبقا پاددان-ئارامدا تۇغۇپ بەرگەن ئوغۇللىرى ئىدى. ئۇنىڭدىن بولغان ئوغۇل-قىز ئەۋلادلىرى، قىزى دىنا بىلەن جەمئىي ئوتتۇز ئۈچ جان ئىدى.

‏16 گادنىڭ ئوغۇللىرى زىفيون، خاگگى، شۇنىي، ئەزبون، ئېرى، ئارودى ۋە ئارئېلى ئىدى.

‏17 ئاشەرنىڭ ئوغۇللىرى يىمنا، يىشۋا، يىشۋى ۋە بەرىيا ئىدى ۋە ئۇلارنىڭ سىڭلىسى سېراخ ئىدى. بەرىيانىڭ ئوغۇللىرى بولسا خېبەر ۋە مالكىئەل ئىدى.

‏18 بۇلار لابان قىزى لېياغا دېدەك قىلىپ بەرگەن زىلپانىڭ ياقۇبقا تۇغۇپ بەرگەن ئوغۇللىرى ئىدى. ئۇنىڭدىن بولغان ئەۋلادلىرى جەمئىي ئون ئالتە جان ئىدى.

‏19 ياقۇبنىڭ ئايالى راھىلەنىڭ ئوغۇللىرى يۈسۈپ ۋە بەنيامىن ئىدى.

‏20 مىسىر زېمىنىدا يۈسۈپنىڭ ئۆزىگە تۇغۇلغان ئوغۇللىرى ماناسسە ۋە ئەفرائىم ئىدى. بۇلارنى ئون شەھىرىنىڭ كاھىنى پوتىفېرانىڭ قىزى ئاسىنات ئۇنىڭغا تۇغۇپ بەردى.

‏21 بەنيامىننىڭ ئوغۇللىرى بېلا، بېكەر، ئاشبەل، گېرا، نائامان، ئېخى، روش، مۇپپىم، خۇپپىم ۋە ئارد ئىدى.

‏22 بۇلار راھىلەنىڭ ياقۇبقا تۇغۇپ بەرگەن ئوغۇللىرى ئىدى. ئۇنىڭدىن بولغان ئەۋلادلىرى جەمئىي ئون تۆت جان ئىدى.

‏23 داننىڭ ئوغلى خۇشىم ئىدى.

‏24 نافتالىنىڭ ئوغۇللىرى ياخسىئەل، گۇنى، يېسەر ۋە شىللەم ئىدى.

‏25 بۇلار لابان ئۆز قىزى راھىلەگە دېدەك قىلىپ بەرگەن بىلھانىڭ ياقۇبقا تۇغۇپ بەرگەن ئوغۇللىرى ئىدى. ئۇنىڭدىن بولغان ئەۋلادلىرى جەمئىي يەتتە جان ئىدى.

‏26 ياقۇبنىڭ پۇشتىدىن بولۇپ، ئۇنىڭ بىلەن بىللە مىسىرغا كەلگەنلەر، ياقۇبنىڭ كېلىنلىرىدىن باشقا، جەمئىي ئاتمىش ئالتە جان ئىدى. ‏27 يۈسۈپنىڭ مىسىردا تۇغۇلغان ئوغۇللىرى ئىككى ئىدى. ياقۇب جەمەتىدىن بولۇپ مىسىرغا كەلگەنلەر جەمئىي يەتمىش جان ئىدى.

‏28 ياقۇب، يۈسۈپ ئۇنى گوشەنگە باشلاپ بارسۇن دەپ، يەھۇدانى يۈسۈپنىڭ يېنىغا ئەۋەتتى. شۇنداق قىلىپ ئۇلار گوشەن ۋىلايىتىگە كېلىپ چۈشتى. ‏29 يۈسۈپ ئۆز ھارۋىسىنى تەييارلاپ، ئاتىسى ئىسرائىلنىڭ ئالدىغا گوشەنگە چىقتى. ئۇ ئۇنىڭ يېنىغا يېتىپ كەلگەندە، ئۇنىڭ بوينىغا گىرە سېلىپ قۇچاقلاپ، ئۇزۇنغىچە يىغلىدى. ‏30 ئىسرائىل يۈسۈپكە: «مەن يۈزۈڭنى كۆرۈپ ھايات ئىكەنلىكىڭنى بىلدىم! ئەمدى ئۆلۈپ كېتىشكە رازىمەن» دېدى. ‏31 ئاندىن كېيىن يۈسۈپ ئۆز قېرىنداشلىرى ۋە ئاتىسىنىڭ ئۆيىدىكىلەرگە مۇنداق دېدى: «مەن ھازىر بېرىپ فىرئەۋنگە خەۋەر بېرىپ: ‹كەنئان زېمىنىدىكى قېرىنداشلىرىم ۋە ئاتامنىڭ ئۆيىدىكىلەر قېشىمغا كەلدى. ‏32 بۇ كىشىلەر پادىچى بولۇپ، مال بېقىپ كەلگەچكە، قوي-كالىلىرى ۋە ھەممە مال-مۈلۈكلىرىنى ئېلىپ كەلدى› دەپ ئېيتاي. ‏33 ئەمدى فىرئەۋن سىلەرنى چاقىرىپ سىلەردىن: ‹نېمە ئىش-ئوقەت قىلىسىلەر؟› دەپ سورىسا، ‏34 سىلەر ئۇنىڭغا: ‹بىز، قۇللىرىڭ، كىچىكلىكىمىزدىن تارتىپ ئاتا-بوۋىلىرىمىزغا ئوخشاش پادا بېقىپ كەلگەنمىز› دەڭلار. شۇنداق دېسەڭلار، سىلەرنىڭ گوشەن زېمىنىدا تۇرۇپ قېلىشىڭلارغا رۇخسەت بېرىلىدۇ. چۈنكى مىسىرلىقلار پادىچىلارنىڭ ھەممىسىدىن يىرگىنىدۇ».