ياقۇب ئوغۇللىرىغا خەيرلىك دۇئا ئوقۇيدۇ
49
1 ئاندىن كېيىن ياقۇب ئوغۇللىرىنى چاقىرىپ مۇنداق دېدى: «ھەممىڭلار جەم بولۇڭلار. مەن سىلەرگە كېيىنكى كۈنلەردە بولىدىغان ۋەقەلەرنى ئېيتىپ بېرەي. 2 ئەي ياقۇبنىڭ ئوغۇللىرى، يىغىلىپ بىرلىكتە ئاڭلاڭلار،
ئاتاڭلار ئىسرائىلغا قۇلاق سېلىڭلار.
3 ئەي رۇبەن، سەن مېنىڭ تۇنجى ئوغلۇمسەن،
كۈچ-قۇۋۋىتىمنىڭ تۇنجى مېۋىسى بولغاچ، ئابرۇي ۋە قۇدرەتتە ئۈستۈنسەن.
4 ئەمما كەلكۈندەك تىزگىنسىز بولغىنىڭ ئۈچۈن، ئەمدى ئۈستۈن بولالمايسەن.
چۈنكى سەن ئاتاڭنىڭ كۆرپىسىگە چىقىپ، ئۇنى بۇلغىدىڭ!
ئۇ مېنىڭ كۆرپەمگە چىقتى!
5 شىمون بىلەن لاۋىي، بۇ ئىككى قېرىنداشنىڭ پىچاقلىرى
زۇلۇمنىڭ قوراللىرىدۇر.
6 ئەي جېنىم، ئۇلارنىڭ مەسلىھەتىگە كىرمىگىن!
ئەي ئىززىتىم، ئۇلارنىڭ مەجلىسىگە قوشۇلمىغىن!
چۈنكى ئۇلار ئاچچىقىدا ئادەملەرنى ئۆلتۈرۈپ،
ئۆزلىرى خالىغانچە بۇقىلارنىڭ پەيىنى كەستى.
7 ئۇلارنىڭ يامان ئاچچىقى ۋە قاتتىق غەزىپىگە لەنەت ياغسۇن.
مەن ئۇلارنى ياقۇبنىڭ ئىچىدە تارقىتىۋېتەرمەن،
ئىسرائىلنىڭ ئىچىدە چېچىۋېتەرمەن.
8 ئەي يەھۇدا، قېرىنداشلىرىڭ سېنى ماختار.
قولۇڭ دۈشمەنلىرىڭنىڭ گەجگىسىدە بولار.
ئاتاڭنىڭ ئوغۇللىرى ساڭا تەزىم قىلار.
9 يەھۇدا بىر ياش شىردۇر.
ئەي ئوغلۇم، سەن ئوۋدىن قايتىپ يۇقىرىغا چىقتىڭ.
ئۇ شىردەك، ياكى بىر چىشى شىردەك سوزۇلۇپ يېتىۋالسا،
كىم ئۇنى قوزغاشقا جۇرئەت قىلار؟
10 ھۆكۈمرانلىق قىلىش ھوقۇق ئىگىسى كەلمىگۈچە،
يەھۇدادىن ھاكىمىيەت تايىقى كېتىپ قالماس
ۋە ئۇنىڭ نەسلىدىن سەلتەنەت ھاسىسى يوقالماس.
خەلقلەر ئۇنىڭغا ئىتائەت قىلار. ■
11 ئۇ مادا ئېشەكنى ئۈزۈم تېلىغا،
مادا ئېشەكنىڭ تەخىيىنى سەرخىل ئۈزۈم تېلىغا باغلاپ قويار.
ئۇ لىباسىنى شارابتا، تونىنى ئۈزۈم قېنىدا يۇيار.
12 ئۇنىڭ كۆزلىرى شارابتىن قىزىرىپ كېتەر،
چىشلىرى سۈتنىڭ سەۋەبىدىن ئاپئاق تۇرار.
13 زەبۇلۇن دېڭىز بويىدا تۇرار.
ماكانى كېمىلەرنىڭ پورتى بولار.
چېگرىسى سىدونغىچە يېتىپ بارار.
14 ئىسساكار كۈچلۈك بىر ئېشەكتۇر.
ئۇ ئىككى قوتان ئارىسىدا ياتار.
15 ئۇ ئارامگاھنىڭ ياخشى ئىكەنلىكىگە قاراپ،
زېمىننىڭ ئوبدانلىقىنى كۆرگىنىدە،
يۈك كۆتۈرۈش ئۈچۈن مۈرىسىنى ئېگىپ،
قۇل بولۇپ ھاشارغا تۇتۇلار.
16 دان ئىسرائىلنىڭ قەبىلىلىرىنىڭ بىرى بولۇپ،
ئۆز خەلقىگە ھۆكۈم چىقىرار.
17 دان يول ئۈستىدىكى يىلاندۇر.
ئۇ چىغىر يول ئۈستىدە تۇرۇپ، ئاتنىڭ پاچىقىنى چېقىپ،
مىنگۈچىنى ئارقىسىغا موللاق ئاتقۇزىدىغان زەھەرلىك يىلاندۇر.
18 ئەي پەرۋەردىگار، مەن قۇتقۇزۇشۇڭنى تەلمۈرۈپ كۈتىمەن.
19 گادقا قاراقچىلار ھۇجۇم قىلار،
لېكىن ئۇ ئۇلارنىڭ ئارقىسىدىن قوغلاپ تاپىنىنى باسار.
20 ئاشەرنىڭ نېنى ياغلىق بولار.
ئۇ پادىشاھلارنى لەززەتلىك تاماقلار بىلەن تەمىنلەر. ■
21 نافتالى ئەركىن قويۇۋېتىلغان كېيىكتۇر.
ئۇ چىرايلىق گەپ قىلار.
22 يۈسۈپ مېۋىلىك دەرەختۇر.
ئۇ بۇلاقنىڭ بويىدىكى مېۋىلىك دەرەختۇر.
ئۇنىڭ شاخلىرى تامدىن ھالقىپ ئۆتەر.
23 ئوقيا ئاتقۇچىلار ئۇنى رەنجىتىپ،
ئۇنىڭغا ئوق ئېتىپ بىئارام قىلسىمۇ،
24 ئۇنىڭ يايى مۇستەھكەم تۇرار.
ئۇنىڭ قوللىرى ئىسرائىلنىڭ قورام تېشى ھەم پادىچى،
ياقۇبنىڭ ھەممىگە قادىر خۇداسىنىڭ قولى بىلەن كۈچلۈك قىلىنار.
25 ساڭا مەدەت بېرىپ تۇرغۇچى ئاتاڭنىڭ خۇداسىنىڭ ياردىمى بىلەن،
ساڭا يۇقىرىدىن ئاسماننىڭ بەرىكەتلىرىنى،
تۆۋەندە چوڭقۇرنىڭ بەرىكەتلىرىنى،
شۇنداقلا ئەمچەك ۋە قورساقنىڭ بەرىكىتىنى
ئاتا قىلغۇچى ھەممىگە قادىر خۇدانىڭ ياردىمى بىلەن
سەن قۇۋۋەتلىنىسەن.
26 ئاتاڭنىڭ بەرىكىتى بولسا ئاتا-بوۋىلىرىمنىڭ بەرىكىتىدىن زىيادە بولۇپ،
مەڭگۈلۈك قىيا-دۆڭلۈكلەرنىڭ چېتىگىچە تاقىشار.
بۇ بەرىكەت يۈسۈپنىڭ بېشىغا كېلەر،
ئۆز قېرىنداشلىرىدىن ئايرىم تۇرغۇچىنىڭ چوققىسىغا تېگەر.
27 بەنيامىن يىرتقۇچ بۆرىدۇر.
ئەتىگەندە ئۇ ئوۋ ئوۋلاپ تۇتقىنىنى يەر.
ئاخشامدا ئۇ ئولجىنى بۆلەر».
28 مانا، بۇلارنىڭ ھەممىسى ئىسرائىلنىڭ ئون ئىككى قەبىلىسىدۇر. مەزكۇر سۆزلەر بولسا ئاتىسىنىڭ ئۇلارغا خەيرلىك دۇئا قىلغاندا ئېيتقان سۆزلىرىدۇر. ئۇ ئۇلارنىڭ ھەربىرىگە خاس بولغان بىر بەرىكەت بىلەن ئۇلارغا خەيرلىك دۇئا قىلدى. 29 ئاندىن كېيىن ئۇ ئۇلارغا مۇنداق دەپ بۇيرۇدى: «مەن ئەجدادلىرىمنىڭ قېشىغا كېتىش ئالدىدىمەن. سىلەر مېنى ئاتا-بوۋىلىرىمنىڭ يېنىغا، ھېتىتلاردىن بولغان ئەفروننىڭ ئېتىزلىقىدىكى غارغا دەپنە قىلىڭلار. 30 ئۇ غار، كەنئان زېمىنىدا مامرەنىڭ ئۇدۇلىدىكى ماكپېلانىڭ ئېتىزلىقىغا جايلاشقان. ئىبراھىم شۇ غارنى ئېتىزلىق بىلەن قوشۇپ، ئۇنى يەرلىك قىلاي دەپ، ھېتىتلاردىن بولغان ئەفروندىن سېتىۋالغانىدى. 31 شۇ يەردە ئىبراھىم ۋە ئايالى ساراھ دەپنە قىلىندى، شۇ يەرگە ھەم ئىسئھاق ۋە ئايالى رىبەقامۇ دەپنە قىلىندى. يەنە شۇ يەرگە، مەن لېيانىمۇ دەپنە قىلدىم. 32 بۇ ئېتىزلىق، ئىچىدىكى غار بىلەن بىرگە خىتنىڭ ئەۋلادىدىن سېتىۋېلىنغانىدى».
33 ياقۇب ئوغۇللىرىغا بۇ ۋەسىيەتنى تاماملاپ بولغاندا، ئورنىدا پۇتلىرىنى يىغىپ، ئاخىرقى نەپىسىنى بېرىپ، ئەجدادلىرىنىڭ قېشىغا كەتتى.