‏1 پەرۋەردىگار مۇساغا سۆز قىلىپ مۇنداق دېدى:

‏2 «مانا، مەن ئۆزۈم يەھۇدا قەبىلىسىدىن خۇرنىڭ نەۋرىسى، ئۇرىنىڭ ئوغلى بېزالەلنى ئىسمىنى ئاتاپ چاقىردىم. ‏3 مەن ئۇنى خۇدانىڭ روھى بىلەن تولدۇرۇپ، ئۇنىڭغا ھېكمەت، ئەقىل-پاراسەت ۋە بىلىم ئاتا قىلىپ، ھەر خىل ھۈنەرگە ماھىر قىلدىم. ‏4 مەن ئۇنى ئالتۇن، كۈمۈش ۋە مىستىن نەرسىلەرنى ياساشنى ئويلاپ چىقىشقا، ‏5 تاشلارنى ئويۇپ ئورنىتىشقا، ياغاچقا نەقىش ئويۇشقا، شۇنداقلا ھەر خىل ھۈنەر ئىشلىرىغا ماھىر قىلىپ قويدۇم. ‏6 مانا، مەن ئۇنىڭغا دان قەبىلىسىدىن ئاھىساماقنىڭ ئوغلى ئوھولىيابنى ياردەمچى قىلىپ قويدۇم. ئۆزۈم ساڭا بۇيرۇغان نەرسىلەرنىڭ ھەممىسىنى قىلىش ئۈچۈن، مەن ھەممە ئەقىل-پاراسەتلىك ئۇستا كىشىلەرگە ھېكمەت ئاتا قىلدىم. ‏7 ئۇلار ئۇچرىشىش چېدىرى، شاھادەت ساندۇقى، ئۇنىڭ ئۈستىدىكى مەرھەمەت تەختى، ئۇچرىشىش چېدىرىنىڭ ھەممە ئەسۋاب-جابدۇقلىرى، ‏8 شىرە ۋە ئۇنىڭ قاچا-قۇچىلىرى، ئالتۇن چىراغدان ۋە ئۇنىڭ ھەممە سايمانلىرى، خۇشبۇي ئىسرىق سۇپىسى، ‏9 كۆيدۈرمە قۇربانلىق سۇپىسى بىلەن ئۇنىڭ ھەممە ئەسۋاب-جابدۇقلىرى ۋە داس بىلەن تەگلىكىنى ياساشقا، ‏10 شۇنداقلا توقۇلغان كىيىم، يەنى كاھىن ھارۇننىڭ مۇقەددەس كىيىملىرى ۋە ئۇنىڭ ئوغۇللىرىنىڭ كاھىنلىق كىيىملىرىنى تىكىشكە ۋە ‏11 مەسىھلەش يېغى ۋە مۇقەددەس جايدا ئىشلىتىلىدىغان خۇشبۇي ئىسرىقىنى تەييارلاشقا قابىلىيەتلىك بولۇپ، بۇلارنىڭ ھەممىسىنى ساڭا بەرگەن ئەمرىم بويىچە قىلسۇن».

‏12 پەرۋەردىگار مۇساغا سۆز قىلىپ مۇنداق دېدى:

‏13 «سەن بەنى ئىسرائىلغا مۇنداق دېگىن: ‹مېنىڭ شابات كۈنلىرىمگە چوقۇم رىئايە قىلىڭلار، چۈنكى بۇ، سىلەرنى پاك-مۇقەددەس قىلىدىغان پەرۋەردىگار مەن ئىكەنلىكىمنى بىلىپ تۇرۇشۇڭلار ئۈچۈن، نەسىلدىن نەسىلگە مەن بىلەن سىلەرنىڭ ئوتتۇراڭلاردا بىر بەلگىدۇر. ‏14 شابات كۈنى مۇقەددەس كۈن بولغىنى ئۈچۈن ئۇنىڭغا رىئايە قىلىڭلار. كىمكى ئۇنى بۇزسا، چوقۇم ئۆلۈم جازاسىغا تارتىلسۇن، كىمكى ئۇ كۈندە بىرەر ئىش قىلسا، ئۆز خەلقى ئارىسىدىن يۇلۇپ تاشلانسۇن. ‏15 ئالتە كۈن ئىچىدە ئىش قىلىنسۇن، لېكىن يەتتىنچى كۈنى پەرۋەردىگارغا ئاتالغان مۇقەددەس كۈن بولغاچقا، ئارام ئالىدىغان شابات كۈنى بولىدۇ. كىمكى شابات كۈنىدە بىر ئىش قىلسا، چوقۇم ئۆلتۈرۈلسۇن. ‏16 بەنى ئىسرائىل بىر مەڭگۈلۈك ئەھدە سۈپىتىدە شابات كۈنىگە نەسىلدىن نەسىلگە رىئايە قىلسۇن. ‏17 بۇ مەن بىلەن بەنى ئىسرائىلنىڭ ئوتتۇرىسىدا مەڭگۈلۈك بەلگىدۇر، چۈنكى ئالتە كۈن ئىچىدە پەرۋەردىگار ئاسمان بىلەن يەرنى يارىتىپ، يەتتىنچى كۈنى ئارام ئېلىپ، راھەت تاپتى›». ‏18 خۇدا سىناي تېغىدا مۇساغا بۇ سۆزلەرنى قىلغاندىن كېيىن، ئىككى شاھادەت تاختىسىنى ئۇنىڭغا بەردى. بۇ تاختىلار تاشتىن بولۇپ، ئۇلارنىڭ ئۈستىدىكى خەتلەر خۇدانىڭ ئۆز بارمىقى بىلەن يېزىلغانىدى.