‏1 پەرۋەردىگار مۇساغا: «سەن قوزغىلىپ ماڭغىن، ئۆزۈڭ مىسىر زېمىنىدىن ئېلىپ كەلگەن خەلق بىلەن بىللە بۇ يەردىن كېتىپ: ‹مەن سېنىڭ نەسلىڭگە ئۇنى بېرىمەن› دەپ قەسەم قىلىپ ئىبراھىم، ئىسئھاق ۋە ياقۇبقا ۋەدە قىلغان زېمىنغا بارغىن. ‏2 مەن سىلەرىڭ ئالدىڭلاردا يول باشلاپ بارىدىغان پەرىشتەمنى ئەۋەتىپ، كەنئانلار، ئامورىيلار، ھېتىتلار، پەرىززىيلەر، خىۋۋىيلار ۋە يەبۇسىيلارنى قوغلاپ چىقىرىپ، ‏3 سىلەرنى سۈت بىلەن ھەسەل ئېقىپ تۇرىدىغان زېمىنغا ئېلىپ بارىمەن. سىلەر بوينى قاتتىق بىر خەلق بولغاچقا، يولدا سىلەرنى ھالاك قىلىۋەتمەسلىكىم ئۈچۈن، ئۆزۈم سىلەر بىلەن بىللە چىقمايمەن» دېدى. ‏4 خەلق بۇ قاتتىق سۆزنى ئاڭلىغاندا، قايغۇغا چۆمدى. ھېچبىرى ئۆز زىننەت بۇيۇملىرىنى تاقىمىدى. ‏5 چۈنكى، پەرۋەردىگار مۇساغا: «سەن بەنى ئىسرائىلغا دېگىنكى: ‹سىلەر بوينى قاتتىق بىر خەلق ئىكەنسىلەر. ئەگەر مەن پەقەت بىر دەملا سىلەرنىڭ ئاراڭلاردا بولۇپ ماڭسام، سىلەرنى يوقىتىۋەتكۈدەكمەن. ئەمدى ئۈستۇ-بېشىڭلاردىن زىننەت بۇيۇملىرىڭلارنى ئېلىۋېتىڭلار، ئاندىن مەن سىلەرگە نېمە قىلىشىمنى قارار قىلاي› » دېگەنىدى. ‏6 شۇنىڭ بىلەن بەنى ئىسرائىل زىننەت بۇيۇملىرىنى ئېلىۋېتىپ، خورېب تېغىدىن تارتىپ ئۇلارنى تاقىمىدى.

‏7 لېكىن مۇسا چېدىرنى ئېلىپ، بارگاھنىڭ سىرتىدا ئۇنىڭدىن نېرىراق جايدا تىكىپ، ئۇنى «ئۇچرىشىش چېدىرى» دەپ ئاتىدى. پەرۋەردىگارنى ئىزدەپ دۇئا قىلماقچى بولغانلار بارگاھنىڭ سىرتىدىكى ئۇچرىشىش چېدىرىغا باراتتى. ^■   ‏8 مۇسا ھەر قېتىم چېدىر تەرەپكە بارغاندا، ھەممە خەلق ئورنىدىن تۇرۇپ، ھەربىرى ئۆز چېدىرىنىڭ ئىشىكىدە ئۆرە تۇرۇپ، مۇسا چېدىرغا كىرىپ بولغۇچە ئۇنىڭ كەينىدىن قارىشىپ تۇراتتى. ‏9 مۇسا چېدىرغا كىرگەندە، بۇلۇت تۈۋرۈكى چۈشۈپ، چېدىرنىڭ كىرىش ئېغىزىدا توختاپ تۇراتتى ۋە پەرۋەردىگار مۇسا بىلەن سۆزلىشەتتى. ‏10 ھەممە خەلق بۇلۇت تۈۋرۈكىنىڭ چېدىرنىڭ كىرىش ئېغىزىدا توختاپ تۇرغىنىنى كۆرەتتى. ئۇنى كۆرگىنىدە خەلقنىڭ ھەممىسى ئورنىدىن تۇراتتى ۋە ھەربىرى ئۆز چېدىرىنىڭ ئىشىكى ئالدىدا تۇرۇپ، سەجدە قىلاتتى.

‏11 خۇددى بىر كىشى ئۆز دوستى بىلەن گەپلەشكەندەك، پەرۋەردىگار يۈزمۇ-يۈز مۇسا بىلەن سۆزلىشەتتى. ئاندىن كېيىن مۇسا بارگاھقا قايتىپ كېلەتتى. لېكىن ئۇنىڭ خىزمەتكارى بولغان نۇننىڭ ئوغلى يەشۇئا دېگەن ياش يىگىت چېدىردىن چىقمايتتى.

‏12 مۇسا پەرۋەردىگارغا: «مانا، سەن ماڭا: ‹بۇ خەلقنى ئېلىپ چىققىن› دەپ بۇيرۇدۇڭ، ھەم ماڭا: ‹مەن سېنى ئىسمىڭ بىلەن تونۇيمەن› ۋە ‹نەزىرىمدە ئىلتىپات تاپتىڭ› دېگەن بولساڭمۇ، مەن بىلەن بېرىشقا كىمنى ئەۋەتىشىڭنى ماڭا ئېيتىپ بەرمىدىڭ. ‏13 ئەگەر مەن سېنىڭ نەزىرىڭدە ئىلتىپات تاپقان بولسام، ھەمىشە نەزىرىڭدە ئىلتىپات تېپىشىم ئۈچۈن، سېنى تونۇشۇم ئۈچۈن، ماڭا ئۆز يولۇڭنى كۆرسەتكەيسەن. مانا، بۇ خەلقنىڭ سېنىڭ ئۆز خەلقىڭ بولغىنىنى نەزىرىڭدە تۇتقايسەن» دېدى. ‏14 «مەن ئۆزۈم سەن بىلەن بېرىپ، سېنى خاتىرجەم قىلىمەن» دېدى پەرۋەردىگار. ^■   ‏15 مۇسا ئۇنىڭغا: «ئەگەر سەن بىز بىلەن بىللە بارمىساڭ، بىزنى بۇ يەردىن چىقارمىغايسەن. ‏16 چۈنكى مەن ۋە سېنىڭ خەلقىڭنىڭ نەزىرىڭدە ئىلتىپات تاپقىنىمىز قانداق بىلىنىدۇ؟ ئەلۋەتتە سېنىڭ بىز بىلەن بىللە بېرىشىڭدىن بىلىنمەمدۇ؟ بۇ تەرىقىدە مەن ۋە سېنىڭ خەلقىڭ يەر يۈزىدىكى ھەممە خەلقلەردىن پەرقلىنىپ تۇرىمىز» دېدى. ‏17 پەرۋەردىگار مۇساغا: «بۇ تىلىكىڭنىمۇ ئورۇندايمەن، چۈنكى سەن نەزىرىمدە ئىلتىپات تاپتىڭ ۋە سېنى ئىسمىڭ بىلەن تونۇيمەن» دېدى.

‏18 ئاندىن مۇسا: «ئۆز شان-شەرىپىڭنى ماڭا كۆرسەتىشىڭنى ئۆتۈنىمەن» دېدى. ‏19 ئۇ ئۇنىڭغا: «مەن شاپائىتىمگە تولغان شان-شەرىپىمنى سېنىڭ تۇرغان جايىڭدىن ئۆتكۈزۈپ، ئالدىڭدا ‹ياھۋەھ› دېگەن نامىمنى جاكارلايمەن. مەن كىمگە شاپائەت قىلماقچى بولسام، ئۇنىڭغا شاپائەت قىلىمەن، كىمگە رەھىم قىلماقچى بولسام، ئۇنىڭغا رەھىم قىلىمەن» دېدى. ^■   ‏20 ۋە يەنە: «سەن يۈزۈمنى كۆرەلمەيسەن، چۈنكى ئادەمزات مېنى كۆرۈپ ھايات قالمايدۇ» دېدى. ‏21 ئاندىن كېيىن پەرۋەردىگار: «مانا، ماڭا يېقىن بىر جاي بار. ئۇ يەردىكى قورام تاشنىڭ ئۈستىدە تۇرغىن. ‏22 مېنىڭ شان-شەرىپىم ئۆتۈپ بولغۇچە، مەن سېنى بۇ قورام تاشنىڭ كاۋىكىغا قويۇپ، ئۆزۈم ئۆتۈپ بولغۇچە سېنى قولۇم بىلەن يېپىپ تۇرىمەن. ‏23 ئاندىن كېيىن قولۇمنى كۆتۈرسەم، مېنى كەينىمدىن كۆرىسەن، لېكىن يۈزۈم كۆرۈنمەيدۇ» دېدى.