‏1 ئەمما ھارۇننىڭ ئوغۇللىرى ناداب ۋە ئابىھۇ ھەر ئىككىلىسى ئۆز ئوتدانىنى ئېلىپ، ئۇنىڭغا ئوت قويۇپ ئۈستىگە خۇشبۇي ئىسرىق سېلىپ، پەرۋەردىگار ئۇلارغا بۇيرۇمىغان ئىش قىلىپ، يات ئوتنى ئۇنىڭ ئالدىغا كەلتۈرگىنىدە، ‏2 پەرۋەردىگار تەرىپىدىن ئوت چىقىپ، ئۇلارنى يۇتۇۋەتتى. ئۇلار شۇ يەردە پەرۋەردىگارنىڭ ئالدىدا ئۆلدى. ‏3 بۇ ۋاقىتتا مۇسا ھارۇنغا: «پەرۋەردىگار سۆز قىلىپ: ‹مەن ماڭا يېقىن تۇرغانلارغا مۇقەددەس ئىكەنلىكىمنى نامايان قىلىمەن، بارچە خەلقنىڭ ئالدىدا ئۆزۈمنى ئۇلۇغلايمەن› دەپ ئېيتمىدىمۇ؟» دېدى. ھارۇن بۇنى ئاڭلاپ جىم بولۇپ قالدى. ‏4 ئاندىن مۇسا ھارۇننىڭ تاغىسى ئۇززىئەلنىڭ ئوغۇللىرى بولغان مىشائەل ۋە ئەلىزافاننى چاقىرىپ، ئۇلارغا: «سىلەر كېلىپ، ئۆز تۇغقانلىرىڭلارنى مۇقەددەس جاينىڭ ئالدىدىن كۆتۈرۈپ، بارگاھنىڭ سىرتىغا ئېلىپ چىقىڭلار» دېدى. ‏5 ئۇلار كېلىپ، ئۇلارنى كىيگەن كۆينىكى بىلەن كۆتۈرۈپ، مۇسانىڭ بۇيرۇغىنىدەك بارگاھنىڭ سىرتىغا ئېلىپ چىقتى. ‏6 ئاندىن كېيىن مۇسا ھارۇن ۋە ئۇنىڭ ئوغۇللىرى بولغان ئەلىئازار ۋە ئىتامارغا سۆزلەپ: «سىلەر باشلىرىڭلارنى ئاچماڭلار، كىيىملىرىڭلارنىمۇ يىرتماڭلار. بولمىسا ئۆزۈڭلار ئۆلىسىلەر، ھەم پۈتۈن خەلقنىڭ ئۈستىگە غەزەپ كەلتۈرىسىلەر. لېكىن قېرىنداشلىرىڭلار بولغان پۈتۈن ئىسرائىل جەمەتى پەرۋەردىگار تۇتاشتۇرغان ئوت ئۈچۈن ماتەم تۇتسۇن. ‏7 ئەمما سىلەر ئۇچرىشىش چېدىرىنىڭ تاشقىرىغا چىقماڭلار، بولمىسا ئۆلىسىلەر. چۈنكى سىلەرگە پەرۋەردىگارنىڭ مەسىھلەش يېغى سۈرۈلگەن» دېدى. ئۇلار مۇسانىڭ بۇيرۇغىنىدەك قىلدى.

‏8 پەرۋەردىگار ھارۇنغا سۆز قىلىپ مۇنداق دېدى:

‏9 «سەن ئۆزۈڭ ۋە ئوغۇللىرىڭ ھەرگىز ھاراق-شاراب ئىچىپ، ئۇچرىشىش چېدىرىغا كىرمەڭلار. بولمىسا ئۆلۈپ كېتىسىلەر. بۇ سىلەر ئۈچۈن نەسىلدىن نەسىلگە مەڭگۈلۈك قانۇن-بەلگىلىمە بولىدۇ. ‏10 سىلەر مۇقەددەس بولغان-بولمىغاننى پەرق ئېتىپ، پاك بىلەن ناپاكنى ئاجرىتىپ، ‏11 پەرۋەردىگار مۇسا ئارقىلىق بۇيرۇغان ھەممە قانۇنلارنى بەنى ئىسرائىلغا ئۆگىتىڭلار».

‏12 مۇسا ھارۇن ۋە ئۇنىڭ ھايات قالغان ئوغۇللىرى ئەلىئازار ۋە ئىتامارغا مۇنداق دېدى: «سىلەر پەرۋەردىگارغا ئاتالغان ئوتتا كۆيدۈرۈلىدىغان ھەدىيە-قۇربانلىقلاردىن ئېشىپ قالغان ئاشلىق ھەدىيەسىنى ئېلىپ، ئۇنى قۇربانلىق سۇپىسىنىڭ يېنىدا خېمىرتۇرۇچ سالمىغان ھالدا يەڭلار، چۈنكى ئۇ ئەڭ مۇقەددەستۇر. ‏13 بۇ سەن ۋە ئوغۇللىرىڭنىڭ ھەسسىسى بولسۇن دەپ، پەرۋەردىگارغا ئاتالغان ئوتتا كۆيدۈرۈلىدىغان ھەدىيە-قۇربانلىقلاردىن ئېلىنغاچقا، ئۇنى مۇقەددەس يەردە يەڭلار، چۈنكى ماڭا شۇنداق بۇيرۇلغاندۇر. ‏14 پۇلاڭلاتما ھەدىيەنىڭ تۆشى ۋە كۆتۈرمە ھەدىيەنىڭ ئارقا پۇتىنىمۇ، سەن ئوغۇل-قىزلىرىڭ بىلەن بىللە بىر پاك يەردە يېگىن. چۈنكى بۇلار ئۆزۈڭ ۋە ئوغۇللىرىڭغا تەگسۇن دەپ، بەنى ئىسرائىلنىڭ ئامانلىق قۇربانلىقلىرىدىن بېرىلگەن بىر ھەسسەڭ بولىدۇ. ‏15 كۆتۈرمە ھەدىيەنىڭ ئارقا پۇتى ۋە پۇلاڭلاتما ھەدىيە بولغان تۆش، ئوتتا كۆيدۈرۈلىدىغان قۇربانلىق بولغان ياغ-چاۋىلارغا قوشۇپ كەلتۈرۈلىدۇ. ئۇلار پۇلاڭلاتما ھەدىيە سۈپىتىدە پەرۋەردىگارنىڭ ئالدىدا پۇلاڭلىتىلىدۇ. بۇ پەرۋەردىگارنىڭ بۇيرۇغىنىدەك ئەبەدكىچە سەن ۋە ئوغۇللىرىڭنىڭ ھەققى بولىدۇ».

‏16 ئاندىن كېيىن مۇسا گۇناھ قۇربانلىقى بولغان تېكىنى ئەستايىدىل ئىزدىدى، ئەمما، مانا، ئۇ كۆيدۈرۈلۈپ بولغانىدى. بۇ سەۋەبتىن ئۇ ھارۇننىڭ ھايات قالغان ئىككى ئوغلى ئەلىئازار ۋە ئىتامارغا ئاچچىقلىنىپ: ‏17 «نېمىشقا سىلەر گۇناھ قۇربانلىقى قىلىنىپ مۇقەددەس يەردە يېيىلىدىغان ھايۋاننىڭ گۆشىنى يېمىدىڭلار؟ بۇ ئەڭ مۇقەددەس ئەمەسمۇ؟ سىلەرنى جامائەتنىڭ گۇناھىنى كۆتۈرۈپ، ئۇلار ئۈچۈن پەرۋەردىگارنىڭ ئالدىدا كەفارەت كەلتۈرسۇن دەپ، پەرۋەردىگار شۇنى سىلەرگە بەرمىدىمۇ؟ ‏18 مانا، ئۇنىڭ قېنى مۇقەددەس جاينىڭ ئىچىگە كەلتۈرۈلمىدى. ئەسلىدە مەن بۇيرۇغاندەك، سىلەر ئۇنى مۇقەددەس يەردە يېيىشىڭلار كېرەك ئىدى» دېدى. ‏19 لېكىن ھارۇن مۇساغا: «مانا، ئۇلار بۈگۈن ئۆز گۇناھ قۇربانلىقى ۋە كۆيدۈرمە قۇربانلىقىنى پەرۋەردىگارنىڭ ئالدىدا سۇندى. ئەمما ماڭا نېمە خاپىلىق يەتكىنىنى كۆرمىدىڭمۇ؟ ئەگەر مەن بۈگۈن گۇناھ قۇربانلىقىنىڭ گۆشىنى يېگەن بولسام، پەرۋەردىگارنىڭ نەزىرىدە ئوبدان بولاتتىمۇ؟» دېدى. ‏20 مۇسا بۇنى ئاڭلاپ رازى بولدى.