چۆل-باياۋاندىكى سەپەر
ھەممە ئەر كىشىلەرنىڭ ساناقتىن ئۆتكۈزۈلۈشى
1
1 بەنى ئىسرائىل مىسىر زېمىنىدىن چىققاندىن كېيىن، ئىككىنچى يىلى ئىككىنچى ئاينىڭ بىرىنچى كۈنى پەرۋەردىگار سىناي چۆلىدە، ئۇچرىشىش چېدىرىدا مۇساغا سۆز قىلىپ مۇنداق دېدى: 2 «پۈتۈن بەنى ئىسرائىل جامائىتىنىڭ سانىنى ئېلىپ، ھەممە ئەر كىشىلەر بىر-بىرلەپ سانىلىپ، ئۆز ئائىلە-جەمەتلىرى بويىچە ئىسىملىرى بىلەن تىزىملانسۇن. 3 سەن ھارۇن بىلەن بىرگە ئىسرائىلنىڭ يىگىرمە ياشتىن ئېشىپ، جەڭگە چىقالايدىغان ھەممە ئەر كىشىلەرنى، ئۇلارنىڭ قوشۇن قىسىملىرى بويىچە ساناقتىن ئۆتكۈزۈڭلار. 4 بۇنى قىلغىنىڭلاردا ھەر قەبىلىدىن بىردىن كىشى، يەنى ھەربىرى ئۆز ئاتا جەمەتىنىڭ باشلىقى بولغان كىشى، سىلەر بىلەن بىللە بولسۇن. 5 سىلەرگە ياردەم بېرىپ تۇرىدىغان كىشىلەرنىڭ ئىسىملىرى مۇنۇلاردۇر:
رۇبەن قەبىلىسىدىن: شېدېئۇرنىڭ ئوغلى ئەلىزۇر،
6 شىمون قەبىلىسىدىن زۇرىشاداينىڭ ئوغلى شېلۇمىئەل،
7 يەھۇدا قەبىلىسىدىن ئامىنادابنىڭ ئوغلى ناھشون،
8 ئىسساكار قەبىلىسىدىن زوئارنىڭ ئوغلى نەتانەل،
9 زەبۇلۇن قەبىلىسىدىن خېلوننىڭ ئوغلى ئەلىئاب،
10 يۈسۈپنىڭ ئەۋلادلىرىدىن ئەفرائىم قەبىلىسىدىن ئاممىھۇدنىڭ ئوغلى ئەلىشاما، ماناسسە قەبىلىسىدىن پېداھسۇرنىڭ ئوغلى گاملىئەل،
11 بەنيامىن قەبىلىسىدىن گىدېئونىنىڭ ئوغلى ئابىدان،
12 دان قەبىلىسىدىن ئامىشاداينىڭ ئوغلى ئاخىئەزەر،
13 ئاشەر قەبىلىسىدىن ئوكراننىڭ ئوغلى پاگىئەل،
14 گاد قەبىلىسىدىن دەيۇئەلنىڭ ئوغلى ئەلياساف
15 ۋە نافتالى قەبىلىسىدىن ئېناننىڭ ئوغلى ئاخىرا».
16 بۇلار جامائەت ئىچىدىن تاللاندى. ئۇلار ئاتا جەمەتلىرىنىڭ باشلىقلىرى بولۇپ، بەنى ئىسرائىلنىڭ مىڭلىرىغا سەردار بولغان كىشىلەر ئىدى.
17 مۇسا ۋە ھارۇن ئىسمى ئاتالغان مەزكۇر كىشىلەرنى ئۆزلىرى بىلەن بىللە ئېلىپ، 18 ئىككىنچى ئاينىڭ بىرىنچى كۈنى پۈتۈن جامائەتنى جەم قىلدى. ئۇلار خەلقنىڭ نەسەبنامىلىرىنى خەتلىۋېلىپ، يىگىرمە ياشتىن ئاشقانلارنى بىر-بىرلەپ ساناپ، ئائىلە-جەمەتلىرى بويىچە ئىسىملىرى بىلەن تىزىملىدى.
19 پەرۋەردىگارنىڭ مۇساغا بۇيرۇغىنىدەك ئۇ ئۇلارنى سىناي چۆلىدە ساناقتىن ئۆتكۈزدى.
20 ئىسرائىلنىڭ تۇنجى ئوغلى رۇبەننىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى بىر-بىرلەپ سانىلىپ، ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 21 رۇبەن قەبىلىسىدىن ساناقتىن ئۆتكۈزۈلگەنلەرنىڭ سانى قىرىق ئالتە مىڭ بەش يۈز كىشى ئىدى.
22 شىموننىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى بىر-بىرلەپ سانىلىپ، ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 23 شىمون قەبىلىسىدىن ساناقتىن ئۆتكۈزۈلگەنلەرنىڭ سانى ئەللىك توققۇز مىڭ ئۈچ يۈز كىشى ئىدى.
24 گادنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 25 گاد قەبىلىسىدىن ساناقتىن ئۆتكۈزۈلگەنلەرنىڭ سانى قىرىق بەش مىڭ ئالتە يۈز ئەللىك كىشى ئىدى.
26 يەھۇدانىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 27 يەھۇدا قەبىلىسىدىن ساناقتىن ئۆتكۈزۈلگەنلەرنىڭ سانى يەتمىش تۆت مىڭ ئالتە يۈز كىشى ئىدى.
28 ئىسساكارنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 29 ئىسساكار قەبىلىسىدىن ساناقتىن ئۆتكۈزۈلگەنلەرنىڭ سانى ئەللىك تۆت مىڭ تۆت يۈز كىشى ئىدى.
30 زەبۇلۇننىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 31 زەبۇلۇن قەبىلىسىدىن ساناقتىن ئۆتكۈزۈلگەنلەرنىڭ سانى ئەللىك يەتتە مىڭ تۆت يۈز كىشى ئىدى.
32 يۈسۈپنىڭ ئوغۇللىرىنىڭ بىرى بولغان ئەفرائىمنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 33 ئەفرائىم قەبىلىسىدىن ساناقتىن ئۆتكۈزۈلگەنلەرنىڭ سانى قىرىق مىڭ بەش يۈز كىشى ئىدى. 34 ئۇنىڭ يەنە بىر ئوغلى ماناسسەنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 35 ماناسسە قەبىلىسىدىن ساناقتىن ئۆتكۈزۈلگەنلەرنىڭ سانى ئوتتۇز ئىككى مىڭ ئىككى يۈز كىشى ئىدى.
36 بەنيامىننىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 37 بەنيامىن قەبىلىسىدىن ساناقتىن ئۆتكۈزۈلگەنلەرنىڭ سانى ئوتتۇز بەش مىڭ تۆت يۈز كىشى ئىدى.
38 داننىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 39 دان قەبىلىسىدىن ساناقتىن ئۆتكۈزۈلگەنلەرنىڭ سانى ئاتمىش ئىككى مىڭ يەتتە يۈز كىشى ئىدى.
40 ئاشەرنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 41 ئاشەر قەبىلىسىدىن ساناقتىن ئۆتكۈزۈلگەنلەرنىڭ سانى قىرىق بىر مىڭ بەش يۈز كىشى ئىدى.
42 نافتالىنىڭ نەسلىدىن بولغان خەلقنىڭ ئىچىدىن يىگىرمە ياشتىن ئاشقان، جەڭگە يارايدىغان ئەر كىشىلەرنىڭ ھەممىسى ئۆز ئائىلە-جەمەتلىرىنىڭ نەسەبى بويىچە ئىسىملىرى بىلەن تىزىملاندى. 43 نافتالى قەبىلىسىدىن ساناقتىن ئۆتكۈزۈلگەنلەرنىڭ سانى ئەللىك ئۈچ مىڭ تۆت يۈز كىشى ئىدى.
44 مەزكۇر كىشىلەر بولسا مۇسا ھارۇن ۋە ھەربىرى ئۆز ئاتا جەمەتىگە باشلىق بولغان بەنى ئىسرائىلنىڭ ئون ئىككى رەھبىرى بىلەن بىللە ساناقتىن ئۆتكۈزۈپ سانىغان كىشىلەر ئىدى. 45 بەنى ئىسرائىلنىڭ ئىچىدىن يىگىرمە ياشتىن ئاشقان، جەڭگە يارايدىغان كىشىلەرنىڭ ھەممىسى ئاتا جەمەتلىرى بويىچە تىزىملاندى. 46 ساناقتىن ئۆتكۈزۈلگەنلەر جەمئىي ئالتە يۈز ئۈچ مىڭ بەش يۈز ئەللىك كىشى ئىدى.
47 لېكىن لاۋىيلار ئاتا جەمەتى بويىچە ساناقتىن ئۆتكۈزۈلمىدى. 48 چۈنكى پەرۋەردىگار مۇساغا ئىلگىرى سۆز قىلىپ مۇنداق دېگەنىدى: 49 «سەن پەقەت لاۋىي قەبىلىسىنىلا ساناقتىن ئۆتكۈزمىگىن، ئۇلارنىڭ سانىنى قالغان بەنى ئىسرائىلغىمۇ قوشمىغىن، 50 بەلكى لاۋىيلارنى شاھادەت چېدىرى ۋە ئۇنىڭ بارچە ئەسۋاب-ئەشيالىرىنى بېقىشقا تەيىنلەپ، ئۇنىڭ ھەممە نەرسىلىرىگە مەسئۇل قىلىپ قويغىن. ئۇلار ئىبادەت چېدىرى ۋە ئۇنىڭ ئەسۋاب-جابدۇقلىرىنى كۆتۈرۈپ خىزمەت قىلسۇن ۋە ئىبادەت چېدىرىنىڭ چۆرىسىدە چېدىرلىرىنى تىكسۇن. ■ 51 ئىبادەت چېدىرىنى ئېلىپ ماڭىدىغان ۋاقىتتا لاۋىيلار ئۇنى سۆكۈپ يىغسۇن ۋە ئىبادەت چېدىرىنى تىكىدىغان ۋاقىت كەلسە، لاۋىيلار ئۇنى تىكسۇن. ئەگەر بىر يات كىشى ئىبادەت چېدىرىغا يېقىن كەلسە، ئۆلتۈرۈلسۇن. 52 قالغان بەنى ئىسرائىل بولسا ئۆز قوشۇن قىسىملىرى بويىچە ھەربىرى ئۆز جايىدا ئۆز تۇغىنىڭ ئاستىدا چېدىرلىرىنى تىكسۇن. 53 لېكىن لاۋىيلار، بەنى ئىسرائىل جامائىتىنىڭ پەرۋەردىگارنىڭ قەھر-غەزىپىگە ئۇچرىماسلىقى ئۈچۈن، شاھادەت چېدىرىنىڭ چۆرىسىدە چېدىرلىرىنى تىكسۇن. ئۇلار شاھادەت چېدىرىنىڭ ئىشلىرىغا مەسئۇل بولسۇن».
54 بەنى ئىسرائىل ھەر ئىشتا پەرۋەردىگارنىڭ مۇساغا بۇيرۇغىنىدەك قىلدى.