‏1 بەنى ئىسرائىل مىسىر زېمىنىدىن چىققاندىن كېيىنكى ئىككىنچى يىلى بىرىنچى ئايدا، پەرۋەردىگار سىناي چۆلىدە مۇساغا سۆز قىلىپ:

‏2 «بەنى ئىسرائىل ئۆتۈپ كېتىش ھېيتىنى بېكىتىلگەن ۋاقتىدا ئۆتكۈزسۇن. ^■   ‏3 سىلەر ئۇنى بۇ ئاينىڭ ئون تۆتىنچى كۈنى ئاخشام ۋاقتىدا ئۆتكۈزۈڭلار. بېكىتىلگەن ۋاقىتتا، ئۇنىڭ ھەممە قانۇن-بەلگىلىمىلىرى ۋە قائىدە-نىزاملىرى بويىچە ئۇنى ئۆتكۈزۈڭلار» دېدى.

‏4 شۇنىڭ بىلەن مۇسا بەنى ئىسرائىلغا: «سىلەر ئۆتۈپ كېتىش ھېيتىنى ئۆتكۈزۈڭلار» دەپ بۇيرۇدى. ‏5 بۇنىڭ بىلەن ئۇلار بىرىنچى ئاينىڭ ئون تۆتىنچى كۈنى ئاخشام ۋاقتىدا، سىناي چۆلىدە ئۆتۈپ كېتىش ھېيتىنى ئۆتكۈزدى. بەنى ئىسرائىل ھەر ئىشتا پەرۋەردىگارنىڭ مۇساغا بۇيرۇغىنىدەك قىلدى.

‏6 لېكىن ئۆلۈككە تېگىپ كېتىپ ئۆزىنى ناپاك قىلىپ، ئۇ كۈنى ئۆتۈپ كېتىش ھېيتىنى ئۆتكۈزەلمەيدىغان بىرنەچچە كىشى بار ئىدى. ئۇلار ئۇ كۈندە مۇسا ۋە ھارۇننىڭ ئالدىغا كەلدى. ‏7 بۇ كىشىلەر مۇساغا سۆزلەپ: «مانا، بىز بىر ئۆلۈك ئادەمنىڭ سەۋەبىدىن ناپاك بولدۇق. ئەمدى بۇ ئىش سەۋەبىدىن بىز بەنى ئىسرائىل بىلەن بىللە پەرۋەردىگارنىڭ ھەدىيەسىنى كەلتۈرۈشكە رەت قىلىنىمىزمۇ؟» دەپ سورىدى. ‏8 مۇسا ئۇلارغا جاۋاب بېرىپ: «ساقلاپ تۇرۇڭلار. پەرۋەردىگار سىلەر توغرۇلۇق نېمە بۇيرۇيدىغىنىنى ئاڭلاپ باقاي» دېدى.

‏9 پەرۋەردىگار مۇساغا سۆز قىلىپ مۇنداق دېدى:

‏10 «سەن بەنى ئىسرائىلغا مۇنداق دېگىن: ‹ئەگەر سىلەردىن ياكى ئەۋلادلىرىڭلاردىن بىرى ئۆلۈكنىڭ سەۋەبىدىن ناپاك بولغان بولسىمۇ، ياكى ئۇزۇن سەپەردە بولسىمۇ، پەرۋەردىگارنىڭ ئۆتۈپ كېتىش ھېيتىنى ئۆتكۈزسۇن. ‏11 ئۇلار ئۇنى ئىككىنچى ئاينىڭ ئون تۆتىنچى كۈنى ئاخشام ۋاقتىدا ئۆتكۈزسۇن. ئۆتۈپ كېتىش ھېيتىنىڭ قۇربانلىقى بولسا پېتىر نان ۋە ئاچچىق ئوتياش بىلەن بىللە يېيىلىپ، ‏12 ئەتىسىگە ئۇنىڭدىن ھېچنېمە قالدۇرمىسۇن ۋە ئۇنىڭ ھېچبىر سۆڭىكى سۇندۇرۇلمىسۇن. ئۇلار ئۆتۈپ كېتىش ھېيتى توغرىسىدىكى قانۇن-بەلگىلىمە بويىچە ئۇنى ئۆتكۈزسۇن. ‏13 لېكىن بىر كىشى پاك بولۇپ، سەپەرمۇ قىلماي، ئۆتۈپ كېتىش ھېيتىنى ئۆتكۈزمىسە، ئۇنداق كىشى، بېكىتىلگەن ۋاقىتتا پەرۋەردىگارنىڭ ھەدىيەسىنى كەلتۈرمىگىنى ئۈچۈن، ئۆز خەلقىدىن يۇلۇپ تاشلىنىپ، ئۆز گۇناھىنىڭ جازاسىنى تارتىدۇ. ‏14 ئەگەر بىر مۇساپىر ئاراڭلاردا تۇرۇپ، پەرۋەردىگارغا ئاتالغان ئۆتۈپ كېتىش ھېيتىنى ئۆتكۈزۈشنى خالىسا، ئۆتۈپ كېتىش ھېيتى توغرىسىدىكى قانۇن-بەلگىلىمە بويىچە ئۇنى ئۆتكۈزسۇن. بۇ قانۇن-بەلگىلىمە مەيلى ئاراڭلاردىكى مۇساپىر بولسۇن، مەيلى يەرلىك ئادەم بولسۇن، ھەممىسىگە ئوخشاش بولسۇن›».

‏15 ئۇچرىشىش چېدىرى تىكلەنگەن كۈنىدە، ئۇچرىشىش چېدىرىنى، يەنى شاھادەت چېدىرىنى بىر بۇلۇت قاپلاپ تۇردى، ۋە ئاخشام ۋاقتىدىن تارتىپ تاڭ يورۇغۇچە ئىبادەت چېدىرىنىڭ ئۈستىدىكى بۇلۇت ئوتتەك كۆرۈنۈپ تۇردى. ‏16 بۇ شۇنداق داۋام قىلدى: كۈندۈزى ئۇنىڭ ئۈستىنى بۇلۇت قاپلاپ تۇراتتى ۋە كېچىسى ئۇنىڭ ئۈستىدىكى بۇلۇت ئوتتەك كۆرۈنەتتى. ‏17 بۇلۇت ئىبادەت چېدىرىنىڭ ئۈستىدىن كۆتۈرۈلگەندە، بەنى ئىسرائىل قوزغىلىپ ماڭاتتى ۋە بۇلۇت بېرىپ توختىغان يەردە بەنى ئىسرائىل توختاپ چېدىر-بارگاھ تىكەتتى. ‏18 شۇنداقكى، بەنى ئىسرائىل پەرۋەردىگارنىڭ بۇيرۇقى بىلەن قوزغىلىپ ماڭاتتى ۋە پەرۋەردىگارنىڭ بۇيرۇقى بىلەن چېدىر-بارگاھ تىكەتتى. بۇلۇت ئىبادەت چېدىرىنىڭ ئۈستىدە قانچە ئۇزاق تۇرسا، ئۇلارمۇ شۇنچە ئۇزاق بارگاھتا تۇراتتى. ‏19 بۇلۇت ئىبادەت چېدىرىنىڭ ئۈستىدە ئۇزاق كۈنلەرگىچە تۇرۇپ قالغاندا، بەنى ئىسرائىلمۇ پەرۋەردىگارنىڭ بۇيرۇغانلىرىغا رىئايە قىلىپ، قوزغىلىپ ماڭمايتتى.

‏20 بۇلۇت بىرنەچچە كۈنلا ئىبادەت چېدىرىنىڭ ئۈستىدە توختىغاندىمۇ، ئۇلار پەرۋەردىگارنىڭ بۇيرۇقى بويىچە توختاپ تۇراتتى ۋە پەرۋەردىگارنىڭ بۇيرۇقى بىلەن يەنە قوزغىلىپ ماڭاتتى. ‏21 بۇلۇت ئاخشامدىن تاڭ يورۇغۇچە تۇرۇپ، سەھەر ۋاقتىدا كۆتۈرۈلگەندە، ئۇلارمۇ قوزغىلىپ ماڭاتتى. مەيلى كۈندۈزى بولسۇن، مەيلى كېچىسى بولسۇن، بۇلۇت كۆتۈرۈلگەندە، ئۇلارمۇ قوزغىلىپ ماڭاتتى. ‏22 بۇلۇت ئىككى كۈن، بىر ئاي ياكى ئۇزۇنراق ۋاقىتقىچە ئىبادەت چېدىرىنىڭ ئۈستىدە توختاپ تۇرغاندا، بەنى ئىسرائىلمۇ شۇ ۋاقىتقىچە چېدىرلىرىدا توختاپ تۇرۇپ، قوزغىلىپ ماڭمايتتى، لېكىن بۇلۇت كۆتۈرۈلگەندە ئۇلارمۇ قوزغىلىپ ماڭاتتى. ‏23 ئۇلار پەرۋەردىگارنىڭ بۇيرۇقى بىلەن توختاپ چېدىر-بارگاھ تىكەتتى ۋە پەرۋەردىگارنىڭ بۇيرۇقى بىلەن قوزغىلىپ ماڭاتتى. مۇسا ئارقىلىق بېرىلگەن پەرۋاردىگارنىڭ بۇيرۇقىغا ئەمەل قىلىپ، پەرۋەردىگارنىڭ ھۆكۈمىگە بويسۇناتتى.