‏1 يۈسۈپنىڭ ئەۋلادلىرىنىڭ جەمەتلىرىدىن ماناسسەنىڭ نەۋرىسى، ماكىرنىڭ ئوغلى گىلېئادنىڭ نەسىللىرىنىڭ جەمەتلىرىگە باشلىق بولغان كىشىلەر كېلىپ، مۇسا ۋە بەنى ئىسرائىلنىڭ جەمەت باشلىقلىرى بولغان رەھبەرلەر ئالدىدا سۆز قىلىپ، ‏2 مۇنداق دېدى: «پەرۋەردىگار بىزنىڭ خوجىمىزغا: ‹سەن زېمىننى بەنى ئىسرائىلغا چەك تاشلاپ مىراس قىلىپ بەرگىن› دەپ بۇيرۇدى، پەرۋەردىگار ھەم ساڭا قېرىندىشىمىز زېلوفخادنىڭ مىراسىنى ئۇنىڭ قىزلىرىغا بېرىشنىمۇ بۇيرۇدى. ‏3 لېكىن ئۇلار بەنى ئىسرائىلنىڭ باشقا بىر قەبىلىسىدىن بولغان بىر كىشىگە تەگسە، ئۇلارنىڭ مىراس ھەسسىسى ئاتا-بوۋىلىرىمىزنىڭ مىراس ھەسسىسىدىن ئايرىلىپ كېتىدۇ ۋە ئۇلار قوشۇلغان قەبىلىنىڭ مىراس ھەسسىسى چوڭراق بولىدۇ. بۇنىڭ بىلەن بىزنىڭ مىراسىمىزنىڭ بىر ھەسسىسى ئېلىنىدۇ. ‏4 بەنى ئىسرائىلنىڭ شادلىق يىلى كەلسە، ئۇلارنىڭ مىراس ھەسسىسى قوشۇلغان قەبىلىسىنىڭ مىراسىغا قېتىلىدۇ. شۇنىڭ بىلەن ئۇلارنىڭ مىراس ھەسسىسى ئاتا-بوۋىلىرىمىزنىڭ قەبىلىسىنىڭ مىراسىدىن ئېلىنىپ كېتىدۇ».

‏5 مۇسا پەرۋەردىگارنىڭ ھۆكۈمى بويىچە مۇنداق دېدى: «يۈسۈپ قەبىلىسىنىڭ سۆزى راست. ‏6 پەرۋەردىگارنىڭ زېلوفخادنىڭ قىزلىرى توغرىسىدا بۇيرۇغىنى مۇنداق: ‹ئۇلار خالىغىنىچە ئۆزلىرى ياخشى كۆرگەن كىشىگە تەگسە بولىدۇ، ئەمما ئۆز ئاتىسىنىڭ جەمەت-قەبىلىسىدىن بولغان كىشىگە تەگسۇن. ‏7 چۈنكى بەنى ئىسرائىلنىڭ مىراس ھەسسىسىنىڭ بىر قەبىلىدىن باشقا قەبىلىگە ئۆتۈشى مۇمكىن ئەمەس، چۈنكى بەنى ئىسرائىلنىڭ ھەربىرى ئۆز ئاتا-بوۋىلىرىنىڭ مىراس ھەسسىسىنى چىڭ تۇتۇپ ساقلىشى كېرەك. ‏8 بەنى ئىسرائىل قەبىلىلىرىنىڭ بىرىنىڭ ئىچىدە مىراس تاپقان بىر قىز ئەرگە تەگسە، بەنى ئىسرائىلنىڭ ھەربىرى ئۆز ئاتا-بوۋىلىرىنىڭ مىراس ھەسسىسىنى چىڭ تۇتۇپ ساقلىشى ئۈچۈن، ئۆز ئاتىسىنىڭ جەمەت-قەبىلىسىدىن بولغان بىر كىشىگە تەگسۇن. ‏9 چۈنكى مىراس ھەسسىسىنىڭ بىر قەبىلىدىن باشقا بىر قەبىلىگە ئۆتۈشى ھېچ مۇمكىن ئەمەس، چۈنكى بەنى ئىسرائىلنىڭ ھەربىرى ئۆز مىراس ھەسسىسىنى چىڭ تۇتۇپ ساقلىشى كېرەك›».

‏10 زېلوفخادنىڭ قىزلىرى پەرۋەردىگارنىڭ مۇساغا بۇيرۇغىنىدەك قىلدى. ‏11 زېلوفخادنىڭ قىزلىرى ماخلا، تىرزا، خوگلا، مىلكا ۋە نوئا ئۆز ئاتىلىرىنىڭ ئاكا-ئۇكىلىرىنىڭ ئوغۇللىرىغا تېگىپ، ‏12 يۈسۈپنىڭ ئوغلى ماناسسەنىڭ نەسىل-جەمەتلىرىنىڭ ئىچىدە نىكاھلانغاچقا، ئۇلارنىڭ مىراس ھەسسىسى ئاتىسىنىڭ قەبىلىسى ئىچىدە قالدى.

‏13 مانا بۇلار، پەرۋەردىگار مۇسا ئارقىلىق موئاب تۈزلەڭلىكلىرىدە ئىئوردان دەرياسىنىڭ بويىدا، قارشى تەرىپىدىكى يېرىخونىڭ ئۇدۇلىدا، بەنى ئىسرائىلغا بەرگەن ئەمر ۋە ئەھكاملاردۇر.