‏1 بۇ چاغدا پەرۋەردىگار ماڭا: ‹سەن ئاۋۋالقىسىدەك ئۆزۈڭ ئۈچۈن تاشتىن ئىككى تاختا يونۇپ، ياغاچتىن بىر ساندۇق ياساپ، مېنىڭ يېنىمغا تاغقا ئېلىپ چىققىن. ‏2 مەن ئۆزۈم سەن چېقىۋەتكەن ئىلگىرىكى ئىككى تاختىدا بار سۆزلەرنى يېزىپ بېرىمەن. ئاندىن كېيىن سەن ئۇلارنى مەزكۇر ساندۇققا قويىسەن› دېدى. ‏3 شۇنىڭ بىلەن مەن ئاكاتسىيە ياغىچىدىن بىر ساندۇق ياسىدىم ۋە تاشتىن ئاۋۋالكىسىدەك ئىككى تاختا يونۇپ ياساپ، بۇ ئىككى تاختىنى قولۇمغا ئېلىپ تاغقا چىقتىم. ‏4 پەرۋەردىگار سىلەر ئۇ يەردە جەم بولغان كۈندە تاغدا ئوتنىڭ ئىچىدىن سىلەرگە ئېيتىپ بەرگەن ئون ئەمرنى ئىلگىرىكىدەك بۇ ئىككى تاختىغا ئويۇپ يېزىپ، بۇلارنى ماڭا تاپشۇرۇپ بەردى. ‏5 ئاندىن كېيىن مەن تاغدىن چۈشۈپ، تاختىلارنى ئۆزۈم ياسىغان ساندۇققا قويۇپ قويدۇم. ئۇ يەردە ئۇلار پەرۋەردىگار ماڭا بۇيرۇغاندەك قويۇقلۇق تۇردى.

‏6 — بەنى ئىسرائىل بەنە-يائاقاندىن چىقىپ، موسېراغا ماڭدى. ئۇ يەردە ھارۇن ۋاپات بولۇپ، ئۇ يەرگە دەپنە قىلىندى. ئۇنىڭ ئوغلى ئەلىئازار ئۇنىڭ ئورنىغا كاھىن بولدى. ‏7 ئاندىن ئۇلار ئۇ يەردىن چىقىپ گۇدگوداغا، گۇدگودادىن چىقىپ، ئېقىن سۇلىرى بار يوتباتاغا باردى. — ‏8 شۇ چاغدا پەرۋەردىگار لاۋىي قەبىلىسىنى، بۈگۈنكىچە بولغاندەك پەرۋەردىگارنىڭ ئەھدە ساندۇقىنى كۆتۈرۈش، پەرۋەردىگارنىڭ ئالدىدا تۇرۇپ، ئۇنىڭ ئالدىدا خىزمەت قىلىش ۋە ئۇنىڭ نامىدا خەيرلىك دۇئا قىلىش ئۈچۈن تاللاپ تەيىنلىدى. ‏9 شۇنىڭ ئۈچۈن لاۋىي قېرىنداشلىرىنىڭ ئارىسىدا نېسىۋە ۋە مىراس ئالمايدۇ، بەلكى پەرۋەردىگار خۇدايىڭلار ئۇنىڭغا ئېيتقاندەك، پەرۋەردىگار ئۆزى ئۇنىڭ مىراس ھەسسىسى بولىدۇ.

‏10 ۋە مەن ئىلگىرىكىدەك قىرىق كېچە ۋە قىرىق كۈندۈز تاغدا تۇرۇپ قالدىم. پەرۋەردىگار بۇ نۆۋەتمۇ ماڭا قۇلاق سېلىپ، سېنى ھالاك قىلىشنى خالىمىدى. ‏11 ئاندىن كېيىن پەرۋەردىگار ماڭا سۆز قىلىپ: ‹سەن تۇرۇپ، مەن ئۇلارغا بېرىمەن دەپ، ئۇلارنىڭ ئاتا-بوۋىلىرىغا قەسەم بىلەن ۋەدە قىلغان زېمىنغا كىرىپ، ئۇنى ئىگىلەش ئۈچۈن خەلققە يول باشلاپ ئالدىدا ماڭغىن› دېدى.

‏12 ئەمدى، ئەي ئىسرائىل خەلقى، پەرۋەردىگار خۇدايىڭلاردىن قورقۇپ، ھەمىشە ئۇنىڭ يوللىرىدا مېڭىپ، ئۇنى سۆيۈپ، پۈتۈن قەلبىڭلار ۋە پۈتۈن جېنىڭلار بىلەن پەرۋەردىگار خۇدايىڭلارغا خىزمەت قىلىشىڭلاردىن ۋە ‏13 سىلەرگە ياخشى بولسۇن دەپ پەرۋەردىگار تەرىپىدىن مەن بۈگۈن سىلەرگە بېرىدىغان ئەمر ۋە قانۇن-بەلگىلىمىلەرگە رىئايە قىلىشىڭلاردىن باشقا پەرۋەردىگار خۇدايىڭلار سىلەردىن بىر نەرسە تەلەپ قىلامدۇ؟ ‏14 مانا، ئاسمانلار ۋە ئاسمانلارنىڭ ئاسمىنى، يەر يۈزى ۋە ئۇنىڭدىكى پۈتۈن مەۋجۇدات پەرۋەردىگار خۇدايىڭلارنىڭكىدۇر. ‏15 لېكىن پەرۋەردىگار ئاتا-بوۋىلىرىڭلاردىن سۆيۈنۈپ، ئۇلارنى سۆيۈپ، بۈگۈنكى كۈندىكىدەك بارلىق خەلقلەر ئارىسىدىن ئۇلارنىڭ نەسلىنى، يەنى سىلەرنى تاللىدى. ‏16 شۇنىڭ ئۈچۈن قەلبىڭلارنى خەتنە قىلىڭلار ۋە بوينۇڭلارنى يەنە قاتتىق قىلىپ يۈرمەڭلار. ^■   ‏17 چۈنكى پەرۋەردىگار خۇدايىڭلار خۇدالارنىڭ خۇداسى ۋە رەبلەرنىڭ رەببى بولۇپ، يۈز-خاتىرە قىلمايدىغان ۋە پارا ئالمايدىغان قۇدرەتلىك ۋە قورقۇنچلۇق ئۇلۇغ خۇدادۇر. ‏18 ئۇ يېتىم ۋە تۇل خوتۇنلارنىڭ ھەق-ھوقۇقلىرىنى قوغداپ، مۇساپىرلارنى سۆيۈپ، ئۇلارغا يېمەك-ئىچمەك ۋە كىيىم-كېچەك بەرگۈچىدۇر. ‏19 شۇنىڭ ئۈچۈن سىلەرمۇ مۇساپىرلارنى سۆيۈڭلار. چۈنكى سىلەرمۇ مىسىردا مۇساپىر بولۇپ تۇردۇڭلار. ‏20 سىلەر پەرۋەردىگار خۇدايىڭلاردىن قورقۇپ، ئۇنىڭغا ئىبادەت قىلىپ، ئۇنىڭغا باغلىنىپ تۇرۇپ، ئۇنىڭ نامى بىلەن قەسەم قىلىڭلار. ‏21 ئۇ سىلەرنىڭ پەخرىڭلار بولىدۇ. سىلەر ئۆز كۆزلىرىڭلار بىلەن كۆرگەندەك، ئۇ سىلەر ئۈچۈن ئۇلۇغ ئاجايىپ ئىشلار قىلغان خۇدايىڭلاردۇر. ‏22 ئاتا-بوۋىلىرىڭلار مىسىرغا بارغىنىدا يەتمىش كىشى ئىدى. مانا ھازىر پەرۋەردىگار خۇدايىڭلار سىلەرنى ئاۋۇتۇپ، ئاسماننىڭ يۇلتۇزلىرىدەك نۇرغۇن قىلدى!