‏1 ئاندىن مۇسا موئاب تۈزلەڭلىكلىرىدىن نېبو تېغىنىڭ ئۈستىگە، يەنى يېرىخونىڭ ئۇدۇلىدىكى پىسگانىڭ چوققىسىغا چىقتى. ئۇ يەردە پەرۋەردىگار ئۇنىڭغا پۈتۈن زېمىننى كۆرسەتتى. ئۇ ئۇنىڭغا گىلېئادتىن تارتىپ دانغىچە، ‏2 پۈتۈن نافتالى، ئەفرائىم ۋە ماناسسەنىڭ زېمىنىنى يەھۇدا زېمىنى بىلەن قوشۇپ غەربتىكى دېڭىزغىچە، ‏3 جەنۇبىي زېمىن ۋە ‹خورمىلىق شەھەر› دەپ ئاتالغان يېرىخو ۋادىسىنىڭ تۈزلەڭلىكىدىن زوئارغىچە، ھەممىسىنى كۆرسەتتى. ‏4 ئاندىن پەرۋەردىگار ئۇنىڭغا: «مەن قەسەم قىلىپ: ‹بۇنى سېنىڭ نەسلىڭگە بېرىمەن› دەپ ئىبراھىم، ئىسئھاق ۋە ياقۇبقا ۋەدە قىلغان زېمىن بۇدۇر. ئەمدى ساڭا ئۇنى ئۆز كۆزۈڭ بىلەن كۆرۈشنى نېسىپ قىلدىم، لېكىن ئۆزۈڭ ئۇ يەرگە كىرەلمەيسەن» دېدى.

‏5 ئاندىن پەرۋەردىگارنىڭ خىزمەتكارى مۇسا، پەرۋەردىگارنىڭ ئېيتقىنىدەك، ئۇ يەردە موئابنىڭ زېمىنىدا ۋاپات بولدى. ‏6 پەرۋەردىگار ئۇنى موئابنىڭ زېمىنىدىكى ۋادىغا، بەيت-پېئورنىڭ ئۇدۇلىدا دەپنە قىلدى. لېكىن ئۇنىڭ قەبرىسى قەيەردە ئىكەنلىكىنى بۇ ۋاقىتقىچە ھېچكىم بىلمەيدۇ. ‏7 مۇسا ۋاپات بولغان چاغدا بىر يۈز يىگىرمە ياشتا ئىدى، لېكىن كۆزلىرى ھېچ ئاجىزلىشىپ قالمىغانىدى، بەدىنىنىڭ كۈچىمۇ ھېچ كېمەيمىگەنىدى. ‏8 بەنى ئىسرائىل مۇسا ئۈچۈن موئاب تۈزلەڭلىكلىرىدە ئوتتۇز كۈنگىچە ماتەم تۇتتى. شۇنىڭ بىلەن مۇسا ئۈچۈن ماتەم تۇتۇپ يىغلايدىغان كۈنلەر تۈگىگەنىدى.

‏9 مۇسا ئۆز قوللىرىنى نۇننىڭ ئوغلى يەشۇئانىڭ ئۈستىگە قويغاچقا، ئۇ ھېكمەتنىڭ روھى بىلەن تولغانىدى. شۇنداقكى، بەنى ئىسرائىل ئۇنىڭغا ئىتائەت قىلىپ، پەرۋەردىگارنىڭ مۇساغا بۇيرۇغىنىدەك قىلىپ تۇردى. ‏10 لېكىن مۇسادەك پەرۋەردىگار بىلەن يۈزمۇ-يۈز سۆزلەشكەن بىر پەيغەمبەر ئىسرائىلنىڭ ئىچىدە ئىككىنچى چىقمىدى. ‏11 مۇسا پەرۋەردىگار تەرىپىدىن مىسىر زېمىنىغا ئەۋەتىلىپ، ئۇنىڭ بۇيرۇقى بويىچە فىرئەۋن ۋە ئۇنىڭ خىزمەتكارلىرىغا ۋە پۈتۈن زېمىنىغا ھەممە كارامەتلەر ۋە مۆجىزىلەرنى كۆرسىتىپ، ‏12 پۈتۈن ئىسرائىل خەلقىنىڭ كۆز ئالدىدا ئۇلۇغ كۈچ-قۇدرەت ۋە بۈيۈك ھەيۋەتلىك ئىشلارنى نامايان قىلدى.