‏1 خازورنىڭ پادىشاھى يابىن بۇ ئىشلارنى ئاڭلاپ، مادوننىڭ پادىشاھى يوباب، شىمروننىڭ پادىشاھى ۋە ئاكشافنىڭ پادىشاھىغا، ‏2 شىمال تەرەپتىكى تاغلىق زېمىن، كىننەرەتنىڭ جەنۇب تەرىپىدىكى ئارابا تۈزلەڭلىكى، غەربىي ئويمانلىق ۋە غەرب تەرەپتىكى دور ئېگىزلىكىنىڭ پادىشاھلىرىغا ئەلچى ئەۋەتىپ، ‏3 شەرق بىلەن غەرب تەرەپتىكى كەنئانلارنى، ئامورىيلار، ھېتىتلار ۋە پەرىززىيلەرنى، تاغلىقتىكى يەبۇسىيلارنى ۋە خەرمون تاغ ئېتىكىدىكى مىسپاھ زېمىنىدا ئولتۇرۇشلۇق خىۋۋىيلارنى چاقىرتتى. ‏4 بۇ پادىشاھلار بارلىق قوشۇنلىرىنى ئېلىپ، دېڭىز ساھىلىدىكى قۇمدەك كۆپ ئادەملەر، نۇرغۇن ئات ۋە جەڭ ھارۋىلىرى بىلەن يولغا چىقتى. ‏5 بۇ ھەممە پادىشاھلار بىرلىشىپ، ئىسرائىلغا قارشى جەڭ قىلىش ئۈچۈن مېروم سۇلىرىنىڭ بويىغا كېلىپ چېدىر-بارگاھ تىكتى.

‏6 بۇ چاغدا پەرۋەردىگار يەشۇئاغا: «سەن ئۇلاردىن ھېچ قورقمىغىن، چۈنكى مەن ئەتە مۇشۇ ۋاقىتتا ئۇلارنىڭ ھەممىسىنى ئىسرائىلنىڭ ئالدىدا ھالاكەتكە ئۇچرىتىمەن. سەن ئۇلارنىڭ ئاتلىرىنىڭ پەيلىرىنى كېسىپ، جەڭ ھارۋىلىرىنى ئوتتا كۆيدۈرۈۋەتكىن» دېدى.

‏7 شۇنىڭ بىلەن يەشۇئا ۋە ئۇنىڭ ھەممە جەڭچىلىرى مېروم سۇلىرىنىڭ بويىغا بېرىپ، تۇيۇقسىز ئۇلارغا ھۇجۇم قىلدى. ‏8 پەرۋەردىگار ئۇلارنى ئىسرائىلنىڭ قولىغا چۈشۈرۈپ بەرگەچكە، ئىسرائىل ئۇلارنى ئۇرۇپ، بۈيۈك سىدون ۋە مىسرەپوت-مايىمغىچە، شەرق تەرەپتە مىسپاھ ۋادىسىغىچە قوغلاپ بېرىپ، ئۇلارنىڭ بىرىنى قويماي قىرىپ تاشلىدى. ‏9 يەشۇئا پەرۋەردىگارنىڭ بۇيرۇغىنىدەك قىلىپ، ئۇلارنىڭ ئاتلىرىنىڭ پەيلىرىنى كەستۈرۈپ، جەڭ ھارۋىلىرىنى ئوتتا كۆيدۈرۈۋەتتى.

‏10 ئوخشاش ۋاقىتتا يەشۇئا قايتىپ كېلىپ، خازورنى ئىشغال قىلىپ، ئۇنىڭ پادىشاھىنى قىلىچ بىلەن ئۆلتۈردى. چۈنكى خازور ئىلگىرى پۈتۈن بۇ پادىشاھلىقلارنىڭ پايتەختى بولغانىدى. ‏11 ئۇلار شەھەردە ياشاۋاتقانلارنىڭ ھەممىسىنى قىلىچ بىلەن ئۆلتۈرۈپ، جېنى بارنىڭ بىرىنى قويماي تەلتۆكۈس يوقاتقاندىن كېيىن، يەشۇئا خازورنى ئوت قويۇپ كۆيدۈرۈۋەتتى. ‏12 يەشۇئا باشقا ھەممە پايتەخت شەھەرلىرى ۋە ئۇلارنىڭ پادىشاھلىرىنى مەغلۇپ قىلىپ، ئۇلارنى قىلىچ بىلەن ئۆلتۈرۈپ، پەرۋەردىگارنىڭ خىزمەتكارى مۇسا بۇيرۇغىنىدەك ئۇلارنى تەلتۆكۈس يوقاتتى. ‏13 لېكىن بەنى ئىسرائىل يەشۇئا كۆيدۈرۈۋەتكەن خازوردىن باشقا، دۆڭلۈكلەر ئۈستىگە قۇرۇلغان شەھەرلەرنىڭ ھېچبىرىنى كۆيدۈرمىدى. ‏14 بۇ شەھەرلەردىكى مال-مۈلۈكنى بەنى ئىسرائىل ئۆزلىرى ئۈچۈن ئولجا قىلىپ ئالدى، لېكىن ئىچىدىكى ھەممە ئادەملەرنى قىلىچ بىلەن چېپىپ ئۆلتۈرۈپ، جېنى بارنىڭ بىرىنى قويماي يوقاتتى.

‏15 پەرۋەردىگارنىڭ ئۆز خىزمەتكارى مۇساغا بۇيرۇغىنىدەك مۇسامۇ يەشۇئاغا بۇيرۇغانىدى. يەشۇئا پەرۋەردىگارنىڭ مۇساغا بۇيرۇغىنىدىن بىرىنى قالدۇرماي، ھەممىسىگە ئەمەل قىلدى. ‏16 بۇ تەرىقىدە يەشۇئا زېمىننىڭ ھەممىسىنى، يەنى تاغلىق، پۈتۈن جەنۇبىي زېمىن، پۈتۈن گوشەن زېمىنى، غەربىي ئويمانلىق ۋە ئارابا تۈزلەڭلىكى ھەم ئىسرائىلنىڭ تاغلىق ۋە ئويمانلىق زېمىنىنى، ‏17 سېئىر تەرەپكە يۈكسەلگەن خالاق تېغىدىن تارتىپ، خەرمون تېغىنىڭ ئېتىكىدىكى لىۋان ۋادىسىغا جايلاشقان بائال-گادقىچە يېيىلغان زېمىننى ئىگىلىدى. ئۇ ئۇلارنىڭ ھەممە پادىشاھلىرىنى تۇتۇپ ئۆلتۈردى. ‏18 يەشۇئا بۇ ھەممە پادىشاھلارغا قارشى ئۇزۇن مەزگىل جەڭ قىلدى. ‏19 گىبېئوندا ئولتۇرۇشلۇق خىۋۋىيلاردىن باشقا ھېچبىر شەھەر بەنى ئىسرائىل بىلەن سۈلھى تۈزمىدى. بەنى ئىسرائىل ئۇلارنىڭ ھەممىسىگە قارشى جەڭ قىلىپ، ئۇلارنىڭ شەھەرلىرىنىڭ ھەممىسىنى ئىگىلىدى. ‏20 چۈنكى پەرۋەردىگارنىڭ مۇساغا بۇيرۇغىنىدەك ئۇلارنىڭ رەھىم قىلىنماي تۆلتۆكۈس يوقىتىلىشى ئۈچۈن، ئۇلارنىڭ قەلبىنى قاتتىق قىلىپ ئىسرائىل بىلەن جەڭ قىلغۇزغانىدى.

‏21 بۇ چاغدا يەشۇئا كېلىپ، ئاناقىيلارنى تاغلىقلاردىن، خېبروندىن، دېبىر بىلەن ئانابتىن، يەھۇدانىڭ ۋە ئىسرائىلنىڭ ھەممە تاغلىقلىرىدىن قوغلاپ يوقاتتى. يەشۇئا ئۇلارنى شەھەرلىرى بىلەن تەلتۆكۈس يوقاتتى. ‏22 بۇنىڭ بىلەن بەنى ئىسرائىل زېمىنىدا ھېچ ئاناقىي قالمىدى، پەقەتلا گازا، گات ۋە ئاشدودتا ساق قالغانلار بار ئىدى.

‏23 شۇنداق قىلىپ يەشۇئا پەرۋەردىگارنىڭ مۇساغا بۇيرۇغىنىدەك ھەممە زېمىننى ئېلىپ، ئىسرائىلغا ئۇلارنىڭ قەبىلىلىرى بويىچە مىراس قىلىپ تەقسىم قىلدى. ئاندىن زېمىن جەڭدىن ئارام تاپتى.