‏1 ئەفرائىمنىڭ ئادەملىرى يىغىلىپ، ئىئوردان دەرياسىدىن ئۆتۈپ زافونغا كەلدى. ئۇلار يىپتاھقا سوئال قويۇپ: «سەن ئاممونىيلار بىلەن جەڭ قىلغىلى بارغىنىڭدا نېمىشقا بىزنى بىللە بېرىشقا چاقىرمىدىڭ؟ ئەمدى بىز ئۆيۈڭنى ئۆزۈڭ بىلەن قوشۇپ، ئوتتا كۆيدۈرۈۋېتىمىز» دېدى. ‏2 يىپتاھ ئۇلارغا جاۋاب بېرىپ: «مەن ۋە خەلقىم ئاممونىيلارغا قارشى قاتتىق جەڭ قىلىۋاتقاندا سىلەرنى چاقىردىم، لېكىن سىلەر مېنى ئۇلارنىڭ قولىدىن قۇتقۇزمىدىڭلار. ‏3 مېنى قۇتقۇزمىغىنىڭلارنى كۆرگىنىمدە، ئۆز جېنىمنى ئالىقىنىمغا ئېلىپ، ئاممونىيلارغا ھۇجۇم قىلىشقا ئاتلاندىم، پەرۋەردىگار ئۇلارنى مېنىڭ قولۇمغا چۈشۈرۈپ بەردى. ئەمدى سىلەر نېمىشقا بۈگۈن مەن بىلەن ئۇرۇشقىلى كەلدىڭلار؟» دېدى. ‏4 ئاندىن يىپتاھ ھەممە گىلېئادلىقلارنى يىغىپ، ئەفرائىمغا قارشى جەڭ قىلدى ۋە گىلېئادلىقلار ئەفرائىملىقلارنى مەغلۇپ قىلدى، چۈنكى ئەفرائىملىقلار: «ئەي گىلېئادلىقلار، سىلەر ئەفرائىمنىڭ قاچقۇنلىرىسىلەر خالاس» دېگەنىدى. گىلېئاد بولسا ئەفرائىم بىلەن ماناسسەنىڭ ئوتتۇرىسىدا جايلاشقان. ^■   ‏5 گىلېئادلىقلار ئىئوردان دەرياسىنىڭ كېچىكلىرىنى توسۇۋېلىپ ئەفرائىملىقلارنى ئۆتكۈزمىدى. ئەفرائىملىقلارنىڭ بىر قاچقۇنى كېلىپ: «ماڭا ئۆتۈشكە ئىجازەت بەرگىن» دېسە، گىلېئادلىقلار ئۇنىڭدىن: «سەن ئەفرائىملىقمۇ؟» دەپ سورايتتى. ئۇ كىشى ياق دېسە، ‏6 ئۇلار ئۇنىڭغا: «‹شىبولەت› دەپ باقە» دېيتتى. ئەگەر ئۇ كىشى: «سىبولەت» دەپ قېلىپ، سۆزنى توغرى تەلەپپۇز قىلالمىسا، ئۇلار ئۇنى تۇتۇپ، ئىئوردان دەرياسىنىڭ كېچىكىنىڭ يېنىدا ئۆلتۈرۈۋەتەتتى. بۇ تەرىقىدە ئەفرائىم قەبىلىسىدىن قىرىق ئىككى مىڭدەك ئادەم ئۆلتۈرۈلدى. ‏7 يىپتاھ ئالتە يىل ئىسرائىل خەلقىگە ھاكىملىق قىلدى. ئاندىن گىلېئادلىق يىپتاھ ۋاپات بولۇپ، گىلېئاد شەھەرلىرىنىڭ بىرىدە دەپنە قىلىندى.

‏8 ئۇنىڭدىن كېيىن بەيتلەھەملىك ئىبزان ئىسرائىل خەلقىگە ھاكىم بولدى. ‏9 ئۇنىڭ ئوتتۇز ئوغلى، ئوتتۇز قىزى بولۇپ، قىزلىرىنى سىرتقا ياتلىق قىلىپ، ئوغۇللىرىغىمۇ يەنە سىرتتىن ئوتتۇز قىز ئېلىپ بەردى. ئۇ يەتتە يىل ئىسرائىل خەلقىگە ھاكىملىق قىلدى. ‏10 ئاندىن ئىبزان ۋاپات بولۇپ، بەيتلەھەمدە دەپنە قىلىندى.

‏11 ئۇنىڭدىن كېيىن زەبۇلۇن قەبىلىسىدىن بولغان ئېلون ئىسرائىل خەلقىگە ھاكىم بولدى، ئۇ ئون يىل ئىسرائىل خەلقىگە ھاكىملىق قىلدى. ‏12 ئاندىن زەبۇلۇن قەبىلىسىدىن بولغان ئېلون ۋاپات بولۇپ، زەبۇلۇن زېمىنىدىكى ئايالون دېگەن جايدا دەپنە قىلىندى.

‏13 ئۇنىڭدىن كېيىن پىراتونلۇق ھىللەلنىڭ ئوغلى ئابدون ئىسرائىل خەلقىگە ھاكىم بولدى. ‏14 ئۇنىڭ قىرىق ئوغلى ۋە ئوتتۇز نەۋرىسى بار ئىدى. بۇلار يەتمىش ئېشەككە مىنىپ ماڭاتتى. ئۇ سەككىز يىل ئىسرائىل خەلقىگە ھاكىملىق قىلدى. ‏15 ئاندىن پىراتونلۇق ھىللەلنىڭ ئوغلى ئابدون ۋاپات بولۇپ، ئەفرائىم زېمىنىدا ئامالەك تاغلىقلىرىدىكى پىراتون دېگەن جايدا دەپنە قىلىندى.