‏1 بىرنەچچە ۋاقىت ئۆتكەندىن كېيىن ئاممونىيلارنىڭ پادىشاھى ۋاپات بولدى. خانۇن دېگەن ئوغلى ئۇنىڭ ئورنىغا تەختكە چىقتى. ‏2 داۋۇد: «ئۇنىڭ ئاتىسى ماڭا مېھىر-شەپكەت كۆرسەتكەندەك، مەن ناخاشنىڭ ئوغلى خانۇنغا مېھىر-شەپكەت كۆرسىتەي» دېدى. داۋۇد ئۇنىڭغا ئاتىسى ئۈچۈن تەسەللى بەرگىلى ئۆز خىزمەتكارلىرىدىن بىرنەچچىنى ئەۋەتتى. داۋۇدنىڭ خىزمەتكارلىرى ئاممونىيلارنىڭ زېمىنىغا كەلگەندە، ‏3 ئاممونىيلارنىڭ سەردارلىرى ئۆز غوجىسى خانۇنغا: «داۋۇد ئاتاڭغا ئىززەت قىلىش ئۈچۈن ساڭا تەسەللى بەرگۈچىلەر ئەۋەتتى دەپ خىيال قىلامسەن؟ ئۇنداق ئەمەس، داۋۇد خىزمەتكارلىرىنى شەھەرنى كۆرۈپ پايلاش ئۈچۈن ئەۋەتىپ، ئاندىن ئۇنى ۋەيران قىلماقچى» دېدى.

‏4 شۇنىڭ بىلەن خانۇن داۋۇدنىڭ خىزمەتكارلىرىنى تۇتۇپ، ساقاللىرىنىڭ يېرىمىنى چۈشۈرۈپ، كىيىملىرىنى يانپاشلىرىغىچە كەستۈرۈپ، ئاندىن ئۇلارنى كەتكۈزۈۋەتتى. ‏5 بۇ خەۋەر داۋۇدقا يەتكەندە، بۇ ئادەملەر تولىمۇ خىجالەت بولغاچقا، پادىشاھ ئۇلارنىڭ ئالدىغا كىشى ئەۋەتىپ: «ساقاللىرىڭلار ئۆسكۈچە يېرىخو شەھىرىدە تۇرۇپ، ئاندىن قايتىپ كېلىڭلار» دېدى.

‏6 ئاممونىيلار ئۆزلىرىنىڭ داۋۇدنىڭ ئاچچىقىنى كەلتۈرگەنلىكىنى بىلىپ، كىشى ئەۋەتىپ بەيت-رەخوبتىكى ۋە زوبادىكى ئارامىيلاردىن يىگىرمە مىڭ پىيادە ئەسكەر، مائاكانىڭ پادىشاھىدىن بىر مىڭ لەشكەر ۋە توبدىكى ئادەملەردىن ئون ئىككى مىڭ لەشكەر ياللاپ ئالدى. ‏7 داۋۇد بۇنى ئاڭلىغاندا، يوئاب بىلەن پالۋانلاردىن تەركىب تاپقان پۈتۈن قوشۇنىنى ئۇلارنىڭ ئالدىغا ئەۋەتتى. ‏8 ئاممونىيلار چىقىپ، شەھەرنىڭ دەرۋازىسىنىڭ ئالدىدا سەپ تۈزدى. زوبا ۋە رەخوبدىن كەلگەن ئارامىيلار، توبنىڭ ئادەملىرى ۋە مائاكانىڭ ئادەملىرى بولسا دالادا ئايرىم سەپ تۈزدى. ‏9 يوئاب ئالدى ھەم كەينىدىن ھۇجۇم بولىدىغانلىقىنى كۆرگەندە، ئىسرائىلدىن بىر قىسىم خىل ئادەملەرنى تاللاپ، ئارامىيلارغا قارشى سەپ تۈزدى. ‏10 ئۇ قالغان ئادەملەرنى ئۇكىسى ئابىشاينىڭ قولىغا، تاپشۇردى. ئابىشاي ئۇلارنى ئاممونىيلارغا قارشى سەپكە تىزىپ جەڭگە تەييار قىلدى. ‏11 يوئاب ئۇنىڭغا: «ئەگەر ئارامىيلار مەندىن كۈچلۈك كەلسە، سەن ياردەمگە كېلىسەن. ئەمما ئاممونىيلار سەندىن كۈچلۈك كەلسە، مەن بېرىپ ساڭا ياردەم بېرەي. ‏12 جۈرئەتلىك بولغىن. ئۆز خەلقىمىز ئۈچۈن ۋە خۇدايىمىزنىڭ شەھەرلىرى ئۈچۈن باتۇر جەڭ قىلايلى. پەرۋەردىگار ئۆزى توغرا كۆرگەننى قىلسۇن» دېدى. ‏13 يوئاب ۋە ئۇنىڭ بىلەن بىرگە بولغان ئادەملەر ئارامىيلارغا ھۇجۇم قىلىشقا چىقىپ يېقىنلاشقاندا، ئارامىيلار ئۇلارنىڭ ئالدىدا قاچتى. ‏14 ئاممونىيلار ئارامىيلارنىڭ قاچقىنىنى كۆرگەندە، ئۇلارمۇ ئابىشاينىڭ ئالدىدىن قېچىپ شەھەرگە كىرىۋالدى. ئۇ ۋاقىتتا يوئاب ئاممونىيلارنى قويۇپ، يېرۇسالېمغا قايتىپ كەتتى.

‏15 ئارامىيلار ئۆزىنىڭ بەنى ئىسرائىلنىڭ ئالدىدا مەغلۇپ بولغىنىنى كۆرگەندە، يەنە جەم بولۇپ يىغىلىشتى. ‏16 ھادادەزەر فىرات دەرياسىنىڭ ئۇ تەرىپىدىكى ئارامىيلارغا خەۋەرچى ئەۋەتىپ، ئۇلارنى چاقىردى. ئۇلار ھادادەزەرنىڭ قوشۇنىنىڭ سەردارى شوباكنىڭ قول ئاستىدا يۈرۈپ خېلام شەھىرىگە كەلدى. ‏17 بۇ خەۋەر داۋۇدقا يەتكەندە ئۇ پۈتۈن ئىسرائىلنى يىغدۇرۇپ، ئىئوردان دەرياسىدىن ئۆتۈپ، خېلامغا باردى. ئارامىيلار داۋۇدقا قارشى سەپ تۈزۈپ، ئۇنىڭغا ھۇجۇم قىلدى. ‏18 لېكىن ئارامىيلار يەنە ئىسرائىلنىڭ ئالدىدىن قاچتى. داۋۇد جەڭ ھارۋىسى ھەيدەيدىغان يەتتە يۈز ئادەم ۋە قىرىق مىڭ ئاتلىق كىشىنى ئۆلتۈردى ۋە يەنە قوشۇنىنىڭ سەردارى شوباكنىمۇ يەرگە يىقىتتى. ئۇ شۇ يەردە ئۆلدى. ‏19 ھادادەزەرنىڭ ئىتائىتىگە بويسۇنغان ھەممە پادىشاھلار ئۆزىنىڭ ئىسرائىللار ئالدىدا مەغلۇپ بولغىنىنى كۆرگەندە ئىسرائىل بىلەن سۈلھى تۈزۈشۈپ، ئىسرائىلنىڭ ئىتائىتىگە بويسۇندى. شۇنىڭدىن كېيىن ئارامىيلار ئاممونىيلارغا ياردەم بېرىشتىن قورقاتتى.