‏1 داۋۇد پادىشاھ خېلى ياشىنىپ قالغانىدى. ئۇنى يوتقان بىلەن قانچە ياپسىمۇ، ئۇ ئىسسىمايتتى. ‏2 خىزمەتكارلىرى ئۇنىڭغا: «بىر پاك قىز پادىشاھنىڭ قېشىدا تۇرۇپ، ئۇنىڭدىن خەۋەر ئالسۇن دەپ، غوجام پادىشاھ ئۈچۈن بىر پاك قىزنى ئىزدەپ تاپسۇن. ئەگەر ئۇ قۇچىقىڭدا ياتسا، غوجام پادىشاھ ئىسسىق تۇرىدۇ» دېدى. ‏3 ئۇلار پۈتۈن ئىسرائىلنىڭ زېمىنىدا چىرايلىق بىر قىزنى ئىزدەپ يۈردى. ئۇلار شۇنەملىك ئابىشاگنى تېپىپ، ئۇنى پادىشاھنىڭ ئالدىغا ئېلىپ كەلدى. ‏4 ئۇ ئىنتايىن چىرايلىق بىر قىز ئىدى. ئۇ پادىشاھنىڭ خىزمىتىدە بولۇپ، ئۇنىڭدىن خەۋەر ئېلىپ تۇراتتى. ئەمما پادىشاھ ئۇنىڭغا يېقىنچىلىق قىلمايتتى.

‏5 ئۇ چاغلاردا خاگىتنىڭ ئوغلى ئادونىيا: «مەن پادىشاھ بولىمەن» دەپ مەقسەت قىلدى. ئۇ ئۆزىگە جەڭ ھارۋىلىرى بىلەن ئاتلىقلارنى راسلاپ، ئۆز ئالدىدا يۈرىدىغان ئەللىك كىشىنىمۇ تەييار قىلدى. ‏6 پادىشاھ ئۇنى غەمكىن قىلىشنى خالىماي ھېچقاچان: «نېمىشقا ئۇنداق قىلدىڭ؟» دەپ ئۇنىڭغا تەربىيە بەرمىگەنىدى، ھەم ئۇ ناھايىتى كېلىشكەن بىر يىگىت ئىدى. ئانىسى ئۇنى ئابشالومدىن كېيىن تۇغقانىدى. ‏7 ئادونىيا زېرۇيانىڭ ئوغلى يوئاب ۋە كاھىن ئابياتار بىلەن مەسلىھەتلەشتى. ئۇلار ئادونىياغا ئەگىشىپ، ئۇنىڭغا ياردەم بېرەتتى. ‏8 لېكىن كاھىن سادوق، يەھويادانىڭ ئوغلى بەنايا، ناتان پەيغەمبەر، شىمەي، رەئىي ۋە داۋۇدنىڭ پالۋانلىرى ئادونىياغا ئەگەشمىدى.

‏9 ئادونىيا قوي، كالا ۋە بورداق مال روگېل بۇلىقىنىڭ يېنىدىكى زوخەلەت دېگەن تاشتا سويدۇرۇپ، ھەممە ئاكا-ئۇكىلىرىنى، يەنى پادىشاھنىڭ ئوغۇللىرىنى ۋە يەھۇدادا پادىشاھنىڭ خىزمىتىدە بولغان ھەممە ئادەملىرىنى چاقىردى. ‏10 لېكىن ئۇ ناتان پەيغەمبەر، بەنايا، پالۋانلار ۋە ئۆز ئىنىسى سۇلايماننى چاقىرمىدى.

‏11 ناتان بولسا سۇلايماننىڭ ئانىسى باتشېباغا مۇنداق دېدى: «ئاڭلىمىدىڭمۇ؟ خاگىتنىڭ ئوغلى ئادونىيا پادىشاھ بولدى. ئەمما خوجىمىز داۋۇد پادىشاھ ھېچنېمىدىن خەۋىرى يوق. ‏12 ئەمدى ئۆز جېنىڭ ۋە ئوغلۇڭ سۇلايماننىڭ جېنىنى قۇتقۇزۇش ئۈچۈن، ساڭا بىر مەسلىھەت بېرەي. ‏13 سەن داۋۇد پادىشاھنىڭ ئالدىغا بېرىپ، ئۇنىڭغا: ‹غوجام پادىشاھ قەسەم بىلەن ئۆز دېدىكىگە ۋەدە قىلىپ: «سېنىڭ ئوغلۇڭ سۇلايمان پادىشاھ بولىدۇ، ئۇ مەندىن كېيىن تەختىمدە ئولتۇرىدۇ» دېگەن ئەمەسمۇ؟ شۇنداق تۇرۇقلۇق نېمىشقا ئەمدى ئادونىيا پادىشاھ بولدى› دېگىن. ‏14 پادىشاھ بىلەن سۆزلىشىپ تۇرغىنىڭدا مەنمۇ سېنىڭ كەينىڭدىن كىرىپ، سۆزلىرىڭنى قوللايمەن» دېدى.

‏15 باتشېبا ئىچكىرى ئۆيگە پادىشاھنىڭ قېشىغا كىردى. پادىشاھ تولىمۇ قېرىغاچقا، شۇنەملىك ئابىشاگ پادىشاھقا خىزمەت قىلىۋاتاتتى. ‏16 باتشېبا پادىشاھقا ئېڭىشىپ تەزىم قىلدى. پادىشاھ: «نېمە تەلىپىڭ بار؟» دەپ سورىدى. ‏17 ئۇ ئۇنىڭغا: «ئەي غوجام، سەن ئۆز دېدىكىڭگە ۋەدە قىلىپ، پەرۋەردىگار خۇدايىڭنىڭ نامى بىلەن: ‹سېنىڭ ئوغلۇڭ سۇلايمان مەندىن كېيىن پادىشاھ بولىدۇ، ئۇ تەختىمدە ئولتۇرىدۇ› دەپ قەسەم قىلدىڭ ئەمەسمۇ؟ ‏18 مانا، ئەمدى ئادونىيا پادىشاھ بولۇپتۇ. ئەمما ئەي غوجام پادىشاھ، سېنىڭ بۇنىڭدىن خەۋىرىڭ يوق! ‏19 ئۇ نۇرغۇن كالا، بورداق مال ۋە قوي سويدۇرۇپ، پادىشاھنىڭ ھەممە ئوغۇللىرى، كاھىن ئابياتار ۋە قوشۇننىڭ سەردارى يوئابنى چاقىرىپتۇ. لېكىن قۇلۇڭ سۇلايماننى چاقىرماپتۇ. ‏20 ئەمدى ئەي غوجام پادىشاھ، ھەممە ئىسرائىلنىڭ كۆزلىرى سەندە، غوجام پادىشاھتىن كېيىن ئۇنىڭ تەختىدە كىمنىڭ ئولتۇرىدىغانلىقىنى ئۇلارغا ئېلان قىلىشىڭنى كۈتۈپ تۇرىدۇ. ‏21 بولمىسا، غوجام پادىشاھ ئاتا-بوۋىلىرىنىڭ قېشىدا راھەت تاپقاندىن كېيىن، مەن بىلەن ئوغلۇم سۇلايمان جىنايەتچى بولۇپ ھېسابلىنىمىز».

‏22 ئۇ تېخى پادىشاھ بىلەن سۆزلىشىۋاتقاندا ناتان پەيغەمبەر كەلدى. ‏23 ئۇلار پادىشاھقا: «ناتان پەيغەمبەر كەلدى» دەپ خەۋەر بەردى. ئۇ پادىشاھنىڭ ئالدىغا كېلىپ، يىقىلىپ يەرگە باش قويۇپ پادىشاھقا تەزىم قىلدى. ‏24 ناتان مۇنداق دېدى: «ئەي غوجام پادىشاھ، سەن ئۆزۈڭ: ‹ئادونىيا مەندىن كېيىن پادىشاھ بولىدۇ، ئۇ مېنىڭ تەختىمدە ئولتۇرىدۇ› دېگەنمىدىڭ؟ ‏25 ئۇ بۈگۈن بېرىپ، نۇرغۇن كالا، بورداق مال ۋە قوي سويدۇرۇپ، پادىشاھنىڭ ھەممە ئوغۇللىرى، قوشۇننىڭ سەردارلىرى ۋە كاھىن ئابياتارنى چاقىردى. ئۇلار ئۇنىڭ ئالدىدا يەپ-ئىچىپ: ‹ياشىسۇن پادىشاھ ئادونىيا!› دەپ توۋلاشماقتا. ‏26 لېكىن ئۇ مەن قۇلۇڭنى، كاھىن سادوق، يەھويادانىڭ ئوغلى بەنايا ۋە قۇلۇڭ سۇلايماننى چاقىرمىدى. ‏27 شۇ ئىش غوجام پادىشاھنىڭ بۇيرۇقى بىلەن بولدىمۇ؟ ئۇنداقتا غوجام پادىشاھتىن كېيىن ئۇنىڭ تەختىدە كىمنىڭ ئولتۇرىدىغانلىقىنى ئۆز قۇلۇڭغا دېمەپسەن».

‏28 داۋۇد پادىشاھ: «باتشېبانى ماڭا چاقىرىڭلار» دېدى. ئۇ پادىشاھنىڭ يېنىغا كېلىپ، پادىشاھنىڭ ئالدىدا تۇرغاندا، ‏29 پادىشاھ: «مېنى ھەممە ئازاب-ئوقۇبەتلەردىن قۇتۇلدۇرغان تىرىك پەرۋەردىگارنىڭ نامى بىلەن قەسەم قىلىمەنكى، ‏30 مەن ئىسرائىلنىڭ خۇداسى پەرۋەردىگارنىڭ نامى بىلەن ساڭا قەسەم قىلىپ: ‹سېنىڭ ئوغلۇڭ سۇلايمان مەندىن كېيىن پادىشاھ بولۇپ، ئورنۇمدا مېنىڭ تەختىمدە ئولتۇرسۇن› دېگىنىمنى بۈگۈن ئەمەلگە ئاشۇرىمەن» دېدى. ‏31 باتشېبا يۈزى يەرگە تەگكۈدەك ئېڭىشىپ پادىشاھقا تەزىم قىلىپ: «غوجام داۋۇد پادىشاھ ئەبەدكىچە ياشىسۇن» دېدى.

‏32 داۋۇد پادىشاھ: «كاھىن سادوق، ناتان پەيغەمبەر ۋە يەھويادانىڭ ئوغلى بەنايا ئالدىمغا چاقىرىڭلار» دېدى. ئۇلار پادىشاھنىڭ ئالدىغا كەلگەندە، ‏33 پادىشاھ ئۇلارغا: «غوجاڭلارنىڭ خىزمەتكارلىرىنى ئۆزۈڭلارغا قوشۇپ، سۇلايماننى ئۆز قېچىرىمغا مىندۈرۈپ گىخونغا ئېلىپ بېرىڭلار. ‏34 ئۇ يەردە كاھىن سادوق بىلەن ناتان پەيغەمبەر ئۇنى ئىسرائىلغا پادىشاھ بولغىلى مەسىھلىسۇن. ئاندىن بۇرغا چېلىپ: ‹ياشىسۇن سۇلايمان پادىشاھ!› دەپ توۋلاپ، ^■   ‏35 ئۇنىڭغا ئەگىشىپ بۇ يەرگە چىقىڭلار. ئۇ كېلىپ، تەختىمدە ئولتۇرۇپ، مېنىڭ ئورنۇمدا پادىشاھ بولىدۇ. مەن ئۇنى ئىسرائىل بىلەن يەھۇداغا ھۆكۈمران قىلىپ تەيىنلىدىم» دېدى. ‏36 يەھويادانىڭ ئوغلى بەنايا پادىشاھقا جاۋاب بېرىپ: «ئامىن! غوجام پادىشاھنىڭ خۇداسى پەرۋەردىگار شۇنداق بۇيرۇسۇن! ‏37 پەرۋەردىگار غوجام پادىشاھقا يار بولغاندەك، سۇلايمانغا يار بولۇپ، ئۇنىڭ تەختىنى خوجام داۋۇد پادىشاھنىڭكىدىنمۇ ئۇلۇغ قىلغاي» دېدى.

‏38 كاھىن سادوق، ناتان پەيغەمبەر، يەھويادانىڭ ئوغلى بەنايا ۋە مۇھاپىزەتچىلەر بىلەن چاپارمەنلەر بېرىپ، سۇلايماننى داۋۇد پادىشاھنىڭ قېچىرىغا مىندۈرۈپ گىخونغا ئېلىپ باردى. ‏39 كاھىن سادوق ئىبادەت چېدىرىدىن ياغ بىلەن تولغان بىر مۈڭگۈزنى ئېلىپ، سۇلايماننى مەسىھلىدى. ئاندىن ئۇلار بۇرغا چېلىپ، ھەممە خەلق: «ياشىسۇن سۇلايمان پادىشاھ!» دەپ توۋلاشتى. ‏40 خەلقنىڭ ھەممىسى ئۇنىڭ كەينىدىن ئەگىشىپ، سۇناي چېلىپ، چوڭ خۇشاللىق بىلەن يەر يېرىلغۇدەك تەنتەنە قىلىشتى.

‏41 لېكىن ئادونىيا ۋە ئۇنىڭ بىلەن بىللە بولغان ھەممە چاقىرىلغانلار زىياپەتنى تۈگەتكەن چاغدا، تەنتەنە ئاۋازى ئۇلارنىڭ قۇلىقىچا يەتتى. يوئاب بۇرغا ئاۋازىنى ئاڭلىغاندا: «شەھەردىن ئاڭلانغان چۇقان نېمە ئىكەن؟» دەپ سورىدى. ‏42 ئۇ سۆزىنى تېخى ئاخىرلاشتۇرمىغاندا كاھىن ئابياتارنىڭ ئوغلى يوناتان كەلدى. ئادونىيا ئۇنىڭغا: «كىرگىن. باتۇر ئادەمسەن، بىزگە چوقۇم ياخشى خەۋەر ئېلىپ كەلدىڭ» دېدى. ‏43 يوناتان ئادونىياغا جاۋاب بېرىپ مۇنداق دېدى: «ياق! ئەكسىچە، خوجىمىز داۋۇد پادىشاھ سۇلايماننى پادىشاھ قىلدى. ‏44 پادىشاھ كاھىن سادوق، ناتان پەيغەمبەر، يەھويادانىڭ ئوغلى بەنايا ۋە مۇھاپىزەتچىلەر بىلەن چاپارمەنلەرنى ئۇنىڭ بىلەن ئەۋەتىپ، ئۇنى پادىشاھنىڭ قېچىرىغا مىندۈردى. ‏45 ئاندىن كاھىن سادوق بىلەن ناتان پەيغەمبەر ئۇنى پادىشاھ بولۇشقا گىخوندا مەسىھلىدى. ئۇلار ئۇ يەردىن چىقىپ شاد-خۇراملىق بىلەن شۇنداق تەنتەنە قىلىشتىكى، پۈتۈن شەھەر قوزغالدى. سىلەر ئاڭلىغان چۇقان شۇدۇر. ‏46 سۇلايمان ھازىر پادىشاھلىق تەختىدە ئولتۇرۇۋاتىدۇ. ‏47 پادىشاھنىڭ خىزمەتكارلىرى كېلىپ، خوجىمىز پادىشاھ داۋۇدقا: ‹خۇدا سۇلايماننىڭ نامىنى سېنىڭكىدىن شەرەپلىك قىلىپ، تەختىنى سېنىڭكىدىنمۇ ئۇلۇغ قىلغاي› دەپ ئۇنى مۇبارەكلەشتى. پادىشاھ ئۆزى ياتقان ئورنىدا سەجدە قىلدى. ‏48 پادىشاھ: ‹كۆزلىرىم كۆرگۈدەك بۈگۈن مېنىڭ تەختىمدە ئولتۇرىدىغان بىرىنى بەرگەن ئىسرائىلنىڭ خۇداسى پەرۋەردىگارغا ھەمدۇسانا بولغاي› دېدى».

‏49 شۇنى ئاڭلاپ، ئادونىيا بىلەن بىللە بولغان ھەممە چاقىرىلغانلار قورقۇپ كېتىپ، ئورنىدىن تۇرۇپ، ھەربىرى ئۆز يولىغا كەتتى. ‏50 ئادونىيا سۇلايماندىن قورقۇپ، دەرھال ئورنىدىن قوپۇپ، مۇقەددەس بەيتكە بېرىپ، قۇربانلىق سۇپىسىنىڭ مۈڭگۈزلىرىنى تۇتۇۋالدى. ‏51 سۇلايمانغا: «مانا، ئادونىيا سۇلايمان پادىشاھتىن قورقۇپ، قۇربانلىق سۇپىسىنىڭ مۈڭگۈزلىرىنى تۇتۇپ تۇرۇپ: ‹سۇلايمان پادىشاھ بۈگۈن ماڭا قەسەم ئىچىپ، ئۆز قۇلىنى قىلىچ بىلەن ئۆلتۈرمەسلىككە ۋەدە قىلسۇن› دەۋاتىدۇ» دېگەن خەۋەر بېرىلدى. ‏52 سۇلايمان: «ئەگەر ئۇ دۇرۇس ئادەمدەك تۇرسا، بېشىدىن بىر تال چاچ يەرگە چۈشمەيدۇ. لېكىن ئۇنىڭدا يامانلىق تېپىلسا، چوقۇم ئۆلىدۇ» دېدى. ‏53 سۇلايمان پادىشاھ كىشى ئەۋەتىپ، ئۇنى قۇربانلىق سۇپىسىدىن ئېلىپ كەلتۈردى. ئۇ كېلىپ، سۇلايمان پادىشاھنىڭ ئالدىدا ئېڭىشىپ تەزىم قىلدى. سۇلايمان ئۇنىڭغا: «ئۆيۈڭگە كەتكىن» دېدى.