‏1 ئاخاب ئۆلگەندىن كېيىن موئاب ئىسرائىلنىڭ ئىتائىتىدىن چىقىپ كەتتى. ‏2 ئاخازيا سامارىيەدە تۇرغاندا ئوردىسىدىكى بالىخانىنىڭ بىر پەنجىرىسىدىن يىقىلىپ چۈشۈپ ئېغىر يارىلىنىپ يېتىپ قالدى. ئۇ ئەلچىلەر ئەۋەتىپ ئۇلارغا: «بېرىپ، ئەقروندىكى ئىلاھ بائال-زېبۇبتىن مەن توغرۇلۇق: ‹كېسىلىدىن ساقىيامدۇ؟› دەپ سوراڭلار» دېدى.

‏3 لېكىن پەرۋەردىگارنىڭ پەرىشتىسى تىشبەلىك ئەلىياغا مۇنداق دېدى: «ئورنۇڭدىن تۇرۇپ، سامارىيەنىڭ پادىشاھىنىڭ ئەلچىلىرى بىلەن كۆرۈشۈپ، ئۇلارغا ئېيتقىنكى: ‹ئىسرائىلدا بىر خۇدا بولمىغىنى ئۈچۈن ئەقروننىڭ ئىلاھى بائال-زېبۇبتىن سورىغىلى بارامسىلەر؟ ‏4 شۇنىڭ ئۈچۈن پەرۋەردىگار مۇنداق دەيدۇ: «سەن ياتقان ئورنۇڭدىن تۇرماي، بەلكى چوقۇم ئۆلىسەن»›». ئەلىيا ئۇلارغا شۇنى دەپ ئۇلاردىن ئايرىلدى.

‏5 ئەلچىلەر پادىشاھنىڭ يېنىغا قايتىپ كەلگەندە ئۇ ئۇلاردىن: «نېمىشقا شۇنچە تېز قايتىپ كەلدىڭلار؟» دەپ سورىدى. ‏6 ئۇلار ئۇنىڭغا: «بىر ئادەم بىزگە يولدا ئۇچراپ ئېيتتىكى: ‹سىلەرنى ئەۋەتكەن پادىشاھنىڭ يېنىغا قايتىپ بېرىپ، ئۇنىڭغا: «پەرۋەردىگار مۇنداق دەيدۇ: ‹ئىسرائىلدا بىر خۇدا بولمىغىنى ئۈچۈن ئەقروننىڭ ئىلاھى بائال-زېبۇبتىن سورىغىلى ئادەملەر ئەۋەتتىڭمۇ؟ شۇنىڭ ئۈچۈن سەن ياتقان ئورنۇڭدىن تۇرماي، بەلكى چوقۇم ئۆلىسەن›» دەڭلار›» دېيىشتى. ‏7 ئۇ ئۇلاردىن سورىدى: «سىلەرگە ئۇچراپ بۇ سۆزلەرنى ئېيتقان ئادەم قانداق كۆرۈندى؟» ‏8 ئۇلار ئۇنىڭغا: «ئۇ تۈكلۈك بولۇپ، بېلىگە بىر تاسما باغلىغانىدى» دېدى. پادىشاھ: «ئۇ تىشبەلىك ئەلىيا ئىكەن» دېدى. ^■  

‏9 ئاندىن پادىشاھ بىر ئەللىكبېشىنى ئۇنىڭ قول ئاستىدىكى ئەللىك ئادىمى بىلەن ئەلىيانىڭ قېشىغا ئەۋەتتى. بۇ كىشى ئۇنىڭ قېشىغا بارسا، مانا ئەلىيا تاغنىڭ چوققىسىدا ئولتۇراتتى. ئۇ ئەلىياغا: «ئەي خۇدانىڭ ئادىمى، پادىشاھ سېنى ‹چۈشۈپ كەلسۇن› دەيدۇ» دېدى. ‏10 لېكىن ئەلىيا ئەللىكبېشىغا: «مەن خۇدانىڭ ئادىمى بولسام، ئاسماندىن ئوت چۈشۈپ سەن بىلەن ئەللىك ئادىمىڭنى كۆيدۈرسۇن» دەپ جاۋاب بەردى. ئۇ ھامان ئاسماندىن ئوت چۈشۈپ، ئۇنىڭ ئۆزى بىلەن ئەللىك ئادىمىنى كۆيدۈرۈۋەتتى.

‏11 لېكىن پادىشاھ يەنە بىر ئەللىكبېشىنى ئۇنىڭ قول ئاستىدىكى ئەللىك ئادىمى بىلەن ئەلىيانىڭ قېشىغا ئەۋەتتى. ئۇ سۆز باشلاپ ئۇنىڭغا: «ئەي خۇدانىڭ ئادىمى، پادىشاھ سېنى ‹دەرھال چۈشۈپ كەلسۇن› دەيدۇ» دېدى. ‏12 لېكىن ئۇ ئۇلارغا: «مەن خۇدانىڭ ئادىمى بولسام، ئاسماندىن ئوت چۈشۈپ، سەن بىلەن ئەللىك ئادىمىڭنى كۆيدۈرسۇن» دەپ جاۋاب بەردى. ئۇ ھامان ئاسماندىن خۇدانىڭ ئوتى چۈشۈپ، ئۇنىڭ ئۆزى بىلەن ئەللىك ئادىمىنى كۆيدۈرۈۋەتتى.

‏13 پادىشاھ ئۈچىنچى قېتىم يەنە بىر ئەللىكبېشىنى ئۇنىڭ قول ئاستىدىكى ئەللىك ئادىمى بىلەن ئەلىيانىڭ قېشىغا ئەۋەتتى. بۇ ئۈچىنچى كەلگەن ئەللىكبېشى چىقىپ يېتىپ كەلگەندە، ئەلىيانىڭ ئالدىدا تىز پۈكۈپ ئۇنىڭغا يالۋۇرۇپ: «ئەي خۇدانىڭ ئادىمى، مېنىڭ جېنىم بىلەن سېنىڭ بۇ ئەللىك قۇلۇڭنىڭ جانلىرى سېنىڭ نەزىرىڭدە ئەزىز بولسۇن. ‏14 مانا، ئاسماندىن ئوت چۈشۈپ، ئىلگىرىكى ئىككى ئەللىكبېشى بىلەن ئۇلارنىڭ قول ئاستىدىكى ئەللىك ئادەمىنى كۆيدۈرۈۋەتتى. لېكىن مېنىڭ جېنىم سېنىڭ نەزىرىڭدە ئەزىز بولسۇن» دېدى.

‏15 پەرۋەردىگارنىڭ پەرىشتىسى ئەلىياغا: «سەن قورقماي ئۇنىڭ بىلەن چۈشۈپ بارغىن» دېدى. شۇنىڭ بىلەن ئۇ قوپۇپ، ئۇنىڭ بىلەن چۈشۈپ، پادىشاھنىڭ قېشىغا بېرىپ، ‏16 ئۇنىڭغا: «پەرۋەردىگار مۇنداق دەيدۇ: ‹سۆز سورىغىلى ئىسرائىلدا خۇدا بولمىغاندەك، ئەقروننىڭ ئىلاھى بائال-زېبۇبتىن سورىغىلى ئەلچىلەر ئەۋەتكىنىڭ ئۈچۈن سەن ياتقان ئورنۇڭدىن تۇرماي، بەلكى چوقۇم ئۆلىسەن›» دېدى. ‏17 پادىشاھ ئەلىيا دەپ بەرگەن پەرۋەردىگارنىڭ سۆزى بويىچە ئۆلدى. ئۇنىڭ ئوغلى بولمىغاچقا، يەھورام يەھۇدا پادىشاھى يەھوشافاتنىڭ ئوغلى يەھورامنىڭ ئىككىنچى يىلىدا ئۇنىڭ ئورنىغا تەختكە چىقتى.

‏18 ئاخازيانىڭ ھاياتىدىكى باشقا ۋەقەلەر ۋە ئۇنىڭ ئىش-پائالىيەتلىرى «ئىسرائىل پادىشاھلىرى تەزكىرىسى» دېگەن كىتابتا پۈتۈلگەندۇر.