‏1 پەرۋەردىگار ئەلىيانى بىر قۇيۇندا ئاسمانغا ئالىدىغانغا ئاز قالغاندا ئەلىيا بىلەن ئەلىشا گىلگالدىن چىقىپ ماڭغانىدى. ‏2 ئەلىيا ئەلىشاغا ئېيتتى: «بۇ يەردە قالغىن، چۈنكى پەرۋەردىگار مېنى بەيتەلگە ئەۋەتتى» دېدى. لېكىن ئەلىشا: «تىرىك پەرۋەردىگارنىڭ نامى بىلەن ۋە سېنىڭ تىرىك جېنىڭ بىلەن قەسەم قىلىمەنكى، سەندىن ئايرىلمايمەن» دېدى. شۇنىڭ بىلەن ئۇلار بەيتەلگىچە چۈشۈپ بېرىشتى. ‏3 ئۇ ۋاقىتتا بەيتەلدىكى پەيغەمبەرلەرنىڭ شاگىرتلىرى ئەلىشانىڭ قېشىغا كېلىپ، ئۇنىڭغا: «بىلەمسەنكى، پەرۋەردىگار بۈگۈن غوجاڭنى كۆتۈرۈپ، سەندىن ئېلىپ كېتىدۇ» دېدى. ئۇ جاۋاب بېرىپ: «بىلىمەن، لېكىن شۈك تۇرۇڭلار» دېدى.

‏4 ئەلىيا ئۇنىڭغا: «ئەي ئەلىشا، بۇ يەردە قالغىن، چۈنكى پەرۋەردىگار مېنى يېرىخوغا ئەۋەتتى» دېدى. لېكىن ئەلىشا: «تىرىك پەرۋەردىگارنىڭ نامى بىلەن ۋە سېنىڭ تىرىك جېنىڭ بىلەن قەسەم قىلىمەنكى، سەندىن ئايرىلمايمەن» دېدى. شۇنىڭ بىلەن ئۇلار يېرىخوغا يېتىپ كەلدى. ‏5 ئۇ ۋاقىتتا يېرىخودىكى پەيغەمبەرلەرنىڭ شاگىرتلىرى ئەلىشانىڭ قېشىغا كېلىپ ئۇنىڭغا: «بىلەمسەنكى، پەرۋەردىگار بۈگۈن غوجاڭنى كۆتۈرۈپ ئېلىپ كېتىدۇ» دېدى. ئەلىشا: «بىلىمەن، لېكىن شۈك تۇرۇڭلار» دېدى.

‏6 ئەلىيا ئۇنىڭغا «بۇ يەردە قالغىن، چۈنكى پەرۋەردىگار مېنى ئىئوردان دەرياسىغا ئەۋەتتى» دېدى. لېكىن ئەلىشا: «تىرىك پەرۋەردىگارنىڭ نامى بىلەن ۋە سېنىڭ تىرىك جېنىڭ بىلەن قەسەم قىلىمەنكى، سەندىن ئايرىلمايمەن» دېدى. شۇنىڭ بىلەن ئۇلار ئىككىسى كېتىپ بېرىشتى. ‏7 ئەمدى پەيغەمبەرلەرنىڭ شاگىرتلىرىدىنمۇ ئەللىك كىشى بېرىپ، يىراقتىن قاراپ تۇراتتى. ئۇ ئىككىيلەن ئىئوردان دەرياسىنىڭ بويىدا توختاپ تۇردى. ‏8 ئەلىيا ئۆز يېپىنچىسىنى ئېلىپ قاتلاپ ئۇنىڭ بىلەن سۇنى ئۇردى. سۇ ئىككىگە بۆلۈندى ۋە ئۇلار ئىككىسى قۇرۇق يول بىلەن مېڭىپ دەريادىن ئۆتتى. ‏9 ئۆتكەندىن كېيىن ئەلىيا ئەلىشاغا: «مەن سەندىن ئايرىلماستا، ساڭا نېمە قىلاي، نېمە تىلەيسەن؟» دېدى. ئەلىشا «سېنىڭ روھىڭنىڭ ئىككى ھەسسىسى ماڭا تەگكەي» دېدى. ‏10 ئەلىيا: «بۇ سورىغىنىڭ تەستۇر. لېكىن مەن سەندىن ئېلىپ كېتىلىدىغان چاغدا سەن مېنى كۆرۈپ تۇرساڭ، سورىغىنىڭ ساڭا بېرىلىدۇ. بولمىسا بېرىلمەيدۇ» دېدى.

‏11 ئۇلار سۆزلىشىپ يۈرگەندە، مانا، يالقۇنلۇق جەڭ ھارۋىسى بىلەن يالقۇنلۇق ئاتلار پەيدا بولۇپ، ئۇلارنى بىر-بىرىدىن ئايرىدى. شۇ تەرىقىدە ئەلىيا بىر قۇيۇندا ئاسمانغا كۆتۈرۈلۈپ كەتتى. ‏12 ئەلىشا بۇنى كۆرۈپ: «ئەي ئاتام، ئەي ئاتام، ئىسرائىلنىڭ جەڭ ھارۋىسى ۋە ئاتلىقلىرى!» دەپ توۋلىدى. ئاندىن كېيىن ئۇ ئۇنى يەنە كۆرمىدى. ئۇ ئۆز كىيىمىنى تۇتۇپ، يىرتىپ ئىككى پارچە قىلدى. ‏13 ئاندىن كېيىن ئۇ ئەلىيانىڭ چۈشۈپ قالغان يېپىنچىسىنى يەردىن ئېلىپ، قايتىپ كېتىپ ئىئوردان دەرياسىنىڭ قىرغىقىغا كەلدى. ‏14 ئۇ ئەلىيانىڭ چۈشكەن يېپىنچىسىنى ئېلىپ، سۇنى ئۇرۇپ: «ئەلىيانىڭ خۇداسى پەرۋەردىگار قەيەردىدۇر؟» دېدى. ئەلىشا سۇنى ئۇرغاندا سۇ ئۇ تەرەپكە بۇ تەرەپكە ئېقىپ، ئىككىگە بۆلۈندى ۋە ئەلىشا دەريادىن ئۆتتى.

‏15 يېرىخودىكى پەيغەمبەرلەرنىڭ شاگىرتلىرى نېرىراق تۇرۇپ، شۇنى كۆرۈپ: «ئەلىيانىڭ روھى ئەلىشانىڭ ئۈستىدىدۇر» دەپ ئۇنىڭ ئالدىغا بېرىپ، يەرگە تەگكۈدەك تەزىم قىلىشتى. ‏16 ئۇلار ئەلىشاغا: «مانا، سېنىڭ خىزمەتكارلىرىڭ ئارىسىدا ئەللىك كۈچلۈك ئادەم بار. بۇلار غوجاڭنى ئىزدىگىلى بارسۇن. پەرۋەردىگارنىڭ روھى ئۇنى كۆتۈرۈپ، تاغلارنىڭ بىرىدە ياكى بىر ۋادىدا قويغانمىكىن» دېدى. لېكىن ئۇ: «ھېچكىمنى ئەۋەتمەڭلار» دېدى. ‏17 ئەمما ئۇلار ئۇنى تولا قىستىغاچقا، ئۇ خىجالەت بولۇپ: «بوپتۇ، ئەۋەتىڭلار» دېدى. شۇنىڭ بىلەن ئۇلار ئەللىك كىشىنى ئەۋەتتى. بۇلار ئۈچ كۈنگىچە ئەلىيانى ئىزدىدى، لېكىن ئۇنى تاپالمىدى. ‏18 ئۇلار تېخى يېرىخودا تۇرغان ئەلىشانىڭ قېشىغا قايتىپ كەلگەندە، ئۇ ئۇلارغا: «‹بارماڭلار› دېمىدىممۇ؟» دېدى.

‏19 شەھەردىكى ئادەملەر ئەلىشاغا: «غوجام كۆرگەندەك شەھەر ئۆزى ئوبدان جايدىدۇر، لېكىن سۇ ناچار ۋە يۇرتتا تۇغماسلىق پەيدا قىلىدۇ» دېدى. ^■   ‏20 ئەلىشا ئۇلارغا: «ماڭا يېڭى قاچىنى ئېلىپ كېلىپ، شۇنىڭغا تۇز سېلىڭلار» دېدى. ئۇلار شۇنداق قىلدى. ‏21 ئۇ سۇ بۇلىقىغا بېرىپ، ئۇنىڭغا تۇزنى سېلىپ: «‹پەرۋەردىگار مۇنداق دەيدۇ: ‹بۇ سۇنى ئوڭلىدىم. ئۆلۈم ۋە تۇغماسلىق ئۇنىڭدىن يەنە پەيدا بولمايدۇ›» دېدى. ‏22 ئەلىشا ئېيتقاندەك سۇ ئوڭلىنىپ، بۈگۈنكى كۈنگىچە شۇنداق بولۇپ كەلمەكتە.

‏23 ئەلىشا ئۇ يەردىن كېتىپ بەيتەلگە باردى. يولدا كېتىپ بارغىنىدا شەھەردىن بالىلار چىقىپ، ئۇنى زاڭلىق قىلىپ: «چىقىپ كەت، ئەي تاقىر باش! چىقىپ كەت، ئەي تاقىر باش!» دەپ ۋارقىرىشىپ تۇردى. ‏24 ئۇ بۇرۇلۇپ، ئۇلارغا قاراپ پەرۋەردىگارنىڭ نامى بىلەن ئۇلارنى قارغىغاندا، ئورمانلىقتىن ئىككى چىشى ئېيىق چىقىپ، بالىلاردىن قىرىق ئىككىنى تالاپ تىتما-تىتما قىلىۋەتتى. ‏25 ئەلىشا ئۇ يەردىن كېتىپ، كارمەل تېغىغا بېرىپ، ئۇ يەردىن سامارىيەگە قايتىپ باردى.