‏1 سۇلايمان پەرۋەردىگارنىڭ بەيتى ۋە پادىشاھنىڭ ئوردىسىنى، شۇنداقلا قۇرۇشنى ئارزۇ قىلغىنىنىڭ ھەممىسىنى پۈتكۈزۈپ بولغاندا، ‏2 پەرۋەردىگار سۇلايمانغا گىبېئوندا كۆرۈنگەندەك ئەمدى ئىككىنچى قېتىم ئۇنىڭغا كۆرۈندى.

‏3 پەرۋەردىگار ئۇنىڭغا مۇنداق دېدى: «سەن مېنىڭ ئالدىمدا قىلغان دۇئا ۋە ئىلتىجايىڭنى ئاڭلىدىم. مېنىڭ نامىم ئۇ يەردە ئەبەدكىچە تىكلەنسۇن دەپ، سەن ماڭا ياسىغان بەيتنى ئۆزۈمگە مۇقەددەس قىلدىم. مېنىڭ كۆزلىرىم بىلەن كۆڭلۈم ئۇ يەردە ھەمىشە بولىدۇ. ‏4 ئەگەر سەن ئاتاڭ داۋۇدنىڭ ئالدىمدا چىن كۆڭۈل ۋە سەمىمىي نىيەت بىلەن ماڭغىنىدەك مېڭىپ، ساڭا بۇيرۇغىنىمنىڭ ھەممىسىگە ئەمەل قىلىپ، قانۇنۇم بىلەن ئەھكاملىرىمنى تۇتساڭ، ‏5 مەن ئاتاڭ داۋۇدقا ۋەدە قىلىپ: ‹سېنىڭ ئەۋلادلىرىڭدىن ئىسرائىلنىڭ تەختىدە ئولتۇرىدىغان كىشى كەم قالمايدۇ› دەپ ئېيتقىنىمدەك ئىسرائىلنىڭ ئۈستىدە سېنىڭ پادىشاھلىق تەختىڭنى ئەبەدكىچە مۇقىم قىلىمەن.

‏6 لېكىن ئۆزۈڭلار ياكى بالىلىرىڭلار مەندىن يۈز ئۆرۈپ، مەن سىلەرگە بۇيرۇغان ئەمر بىلەن قانۇن-بەلگىلىمىلىرىمگە رىئايە قىلماي، بەلكى بېرىپ، باشقا ئىلاھلارغا ئىبادەت قىلىپ، ئۇلارغا سەجدە قىلساڭلار، ‏7 مەن ئىسرائىلنى ئۇلارغا بەرگەن زېمىندىن يۇلۇپ چىقىرىپ، ئۆز نامىم ئۈچۈن مۇقەددەس قىلغان بۇ بەيتنى يۈزۈمدىن تاشلايمەن ۋە ئىسرائىل ھەممە خەلقلەر ئارىسىدا ماقال-تەمسىلنىڭ مەۋزۇسى ۋە مەسخىرە نىشانى بولىدۇ. ‏8 بۇ ئۇلۇغ بەيتمۇ بىر ئىبرەت بولىدۇ. ئۇنىڭدىن ئۆتىدىغان ھەربىر كىشى ھەيران بولۇپ ئىسقىرتىدۇ. ‹پەرۋەردىگار بۇ يۇرت بىلەن بۇ بەيتكە نېمىشقا شۇنداق قىلدى؟› دەپ سورىسا، ‏9 كىشىلەر جاۋاب بېرىپ: ‹ئۇلار ئۆز ئاتا-بوۋىلىرىنى مىسىر زېمىنىدىن چىقارغان خۇداسى پەرۋەردىگارنى تاشلاپ، ئۆزىگە باشقا ئىلاھلارنى تۇتۇپ، ئۇلارغا سەجدە قىلىپ، ئىبادەت قىلغىنى ئۈچۈن پەرۋەردىگار بۇ ھەممە يامانلىقنى ئۇلارنىڭ ئۈستىگە كەلتۈردى› دەيدۇ».

‏10 يىگىرمە يىل ئۆتۈپ بولۇپ، سۇلايمان ئۇ ئىككى ئۆينى، يەنى پەرۋەردىگارنىڭ بەيتى ۋە پادىشاھلىق ئوردىسىنى ياساپ بولغاندىن كېيىن، ‏11 سۇلايمان پادىشاھ ئۆزىنىڭ ھەممە تەلەپ قىلغىنى بويىچە كېدىر ياغىچىدىن، قارىغاي ياغىچىدىن ۋە ئالتۇندىن ئۇنىڭغا يەتكۈزۈپ بەرگەن تىرنىڭ پادىشاھى خىرامغا گالىلىيە زېمىنىدا يىگىرمە شەھەرنى بەردى. ‏12 لېكىن خىرام تىردىن چىقىپ، سۇلايمان ئۇنىڭغا بەرگەن شەھەرلەرنى كۆرگەندە، ئۇلار ئۇنىڭغا ياقمىدى. ‏13 ئۇ: «ئەي بۇرادىرىم، سەن ماڭا بەرگەن بۇ شەھەرلەر قانداق شەھەرلەردۇر؟!» دەپ، ئۇلارنى كابۇل يۇرتى دەپ ئاتىدى. ئۇلار بۈگۈنكى كۈنگىچە شۇنداق ئاتىلىپ كەلمەكتە. ^■   ‏14 خىرام پادىشاھقا بىر يۈز يىگىرمە تالانت ئالتۇننى ئەۋەتكەنىدى. ^■  

‏15 سۇلايمان پادىشاھ پەرۋەردىگارنىڭ بەيتى، ئۆز ئوردىسى، مىللو قەلئەسى، يېرۇسالېمنىڭ سېپىلىنى ۋە خازور، مەگىددو ۋە گېزەر شەھەرلىرىنى ياساش ئۈچۈن ئىشلەمچىلەرنى ھاشارغا تۇتاتتى. ^■  

‏16 ئۇ چاغلاردا مىسىرنىڭ پادىشاھى فىرئەۋن چىقىپ، گېزەرنى ئېلىپ، ئۇنى ئوت قويۇپ كۆيدۈرۈۋېتىپ، شەھەردە تۇرغان كەنئانلارنى ئۆلتۈرگەنىدى ۋە شەھەرنى سۇلايماننىڭ خوتۇنى بولغان قىزىغا سوۋغا قىلىپ بەرگەنىدى. ‏17 سۇلايمان گېزەر بىلەن تۆۋەنكى بەيت-خوروننى يەنە بىنا قىلىپ، ‏18 باياۋاندىكى بائالات ۋە تادمورنىمۇ يېڭىدىن ياسىدى. ‏19 شۇنداقلا سۇلايمان ئۆزى ئۈچۈن ھەممە ئامبار شەھەرلىرى، جەڭ ھارۋىلىرى ئۈچۈن تەيىنلەنگەن شەھەرلەرنى ۋە ئاتلىقلار ئۈچۈن تەيىنلىگەن شەھەرلەرنى بىنا قىلدى ۋە يېرۇسالېمدا، لىۋاندا ۋە ئۆز پادىشاھلىقىنىڭ ھەر يېرىدە خالىغىنىنىمۇ ياسىدى.

‏20 ئامورىيلار، ھېتىتلار، پەرىززىيلەر، خىۋۋىيلار ۋە يەبۇسىيلاردىن قالغانلار، يەنى بەنى ئىسرائىلدىن بولمىغانلارنىڭ ھەممىسى ھاشارغا تۇتۇلدى. ‏21 سۇلايمان ئۇلارنى، يەنى بەنى ئىسرائىل زېمىندا پۈتۈنلەي يوقىتالمىغان خەلقلەرنىڭ قالغان ئەۋلادلىرىنى ھاشارغا تۇتۇپ، قۇللۇققا سالدى. ئۇلار بۈگۈنكى كۈنگىچە شۇنداق بولۇپ كەلمەكتە. ‏22 لېكىن سۇلايمان بەنى ئىسرائىلدىن ھېچكىمنى قۇل قىلماي، بەلكى ئۇلارنى جەڭچى، خىزمەتكار، ئەمەلدار، سەردار ۋە ھارۋىلىقلار بىلەن ئاتلىقلارنىڭ باشلىقلىرى قىلدى. ‏23 سۇلايماننىڭ ئىشلىرىنى قىلغان خەلقنىڭ ئۈستىدە تۇرغان چوڭ ئەمەلدارلار بەش يۈز ئەللىك ئىدى.

‏24 فىرئەۋننىڭ قىزى داۋۇدنىڭ شەھىرىدىن ئۆزىگە ياسالغان ئۆيگە كۆچكەندىن كېيىن سۇلايمان مىللو قەلئەسىنىمۇ ياسىدى.

‏25 سۇلايمان پەرۋەردىگارغا ئاتاپ ياسىغان قۇربانلىق سۇپىسىدا يىلدا ئۈچ قېتىم كۆيدۈرمە قۇربانلىق ۋە ئامانلىق قۇربانلىقىنى قۇربانلىق قىلىپ، پەرۋەردىگارنىڭ ئالدىدا خۇشبۇي ئىسرىق كۆيدۈردى. شۇ تەرىقىدە ئۇ بەيتنىڭ ئىشلىرىنى پۈتتۈردى.

‏26 سۇلايمان پادىشاھ ئەسيون-گېبەردە كېمىلەر ياسىدى. ئۇ يەر ئېدوم زېمىنىدا قىزىل دېڭىز بويىدىكى ئەيلوتنىڭ يېنىدا ئىدى. ‏27 خىرام ئۆز خىزمىتىدە بولغان، دېڭىزچىلىقنى ئوبدان بىلىدىغان كېمىچىلەرنى سۇلايماننىڭ ئادەملىرىگە قوشۇپ كېمىلەرگە سالدى. ‏28 ئۇلار ئوفىرغا بېرىپ، ئۇ يەردىن تۆت يۈز يىگىرمە تالانت ئالتۇننى ئېلىپ كېلىپ سۇلايمان پادىشاھقا ئېلىپ باردى.