22
1 نەغمىچىلەرنىڭ بېشىغا تاپشۇرۇلۇپ «سەھەر مارالى» دېگەن ئاھاڭدا ئېيتىلسۇن دەپ، داۋۇد يازغان مەدھىيە ناخشىسى. 2 ئەي خۇدايىم، ئەي خۇدايىم، نېمە ئۈچۈن مېنى تاشلىدىڭ؟
نېمە ئۈچۈن ماڭا ياردەم بېرىشتىن ئۇزاق تۇرۇپ،
نالە-پەريادىمدىن يىراق تۇرىسەن؟
3 ئەي خۇدايىم، كۈندۈزى نالە قىلىمەن،
ئەمما جاۋاب بەرمەيسەن.
كېچىسىمۇ پەرياد قىلىمەن،
ئارام يوق ماڭا.
4 لېكىن سەن مۇقەددەستۇرسەن،
ئىسرائىلنىڭ مەدھىيەلىرىنىڭ تەختىگە ئولتۇرغۇچىسەن.
5 ئاتا-بوۋىلىرىمىز ساڭا تاياندى.
ئۇلار ساڭا تايانغاچقا، سەن ئۇلارنى قۇتقۇزدۇڭ.
6 ئۇلار ساڭا پەرياد قىلىپ قۇتۇلدى،
ساڭا تايىنىپ ئۇياتتا قالمىدى.
7 ئەمما مەن بىر قۇرت، ئادەم ئەمەس،
ئادەملەر تەرىپىدىن ھاقارەتكە ئۇچرايمەن،
خەلق ئىچىدە خورلۇق تارتىمەن.
8 مېنى كۆرگەنلەرنىڭ ھەممىسى مەسخىرە قىلىدۇ.
ئۇلار ئېغىزلىرىنى پۈرۈشتۈرۈپ، باشلىرىنى چايقىشىپ:
9 «ئۇ ئۆزىنى پەرۋەردىگارغا تاپشۇرغان ئەمەسمۇ؟
ئەمدى پەرۋەردىگار ئۇنى قۇتقۇزسۇن.
ئەگەر ئۇ ئۇنىڭدىن سۆيۈنسە، ئۇنى قۇتۇلدۇرسۇن!» دېيىشىدۇ.
10 ئەمما سەن مېنى قورساقتىن چىقاردىڭ،
ئانامنىڭ قۇچىقىدىكى چېغىمدىلا تايىنىشنى ماڭا ئۆگەتتىڭ.
11 مەن قورساقتىكى ۋاقتىدىن تارتىپ ساڭا تاپشۇرۇلغانمەن،
ئانامنىڭ قورسىقىدىكى ۋاقتىدىن تارتىپ سەن مېنىڭ خۇدايىمسەن.
12 ئەمدى بالا-قازا يېقىن كەلگەچكە، مەندىن يىراق بولمىغىن،
چۈنكى ياردەم قىلىدىغان ھېچكىم يوق.
13 نۇرغۇن بۇقىلار مېنى قورشىۋالدى،
باشاننىڭ كۈچلۈك بۇقىلىرى مېنى قورشاۋغا ئالدى.
14 چىشلەپ تىتىشقا تەييار بولۇپ ھۇۋلاپ تۇرغان شىردەك،
ماڭا ئېغىزلىرىنى يوغان ئاچتى.
15 مەن سۇدەك تۆكۈلۈپ كەتتىم،
ھەممە سۆڭەكلىرىم بېغىشلىرىدىن ئاجراپ كەتتى.
يۈرىكىم مومدەك بولۇپ، ئىچىمدە ئېرىپ كەتتى.
16 كۈچۈم بىر ساپالدەك قۇرۇپ كەتتى،
تىلىم بولسا تاڭلىيىمغا چاپلىشىپ كەتتى.
چۈنكى سەن مېنى ئۆلۈم توپىسىغا ياتقۇزۇپ قويدۇڭ.
17 ئىتلار مېنى قورشىۋالدى،
بىر توپ رەزىللەر مېنىڭ چۆرەمگە يىغىلىۋېلىپ،
قوللىرىم ۋە پۇتلىرىمنى تەشتى.
18 سۆڭەكلىرىمنىڭ ھەممىسىنى سانىيالايمەن.
ئۇلار ماڭا تىكىلىپ قارايدۇ.
19 ئۇلار كىيىملىرىمنى ئۆز ئارىلىرىدا بۆلۈشىدۇ،
لىباسىم ئۈچۈن چەك تاشلىشىدۇ.
20 لېكىن سەن، ئەي پەرۋەردىگار، يىراق بولمىغىن.
ئەي مېنىڭ كۈچ-قۇدرىتىم، ياردەمگە تېز كەلگىن.
21 جېنىمنى قىلىچتىن قۇتقۇزغىن،
يېگانە ھاياتىمنى ئىتلارنىڭ چاڭگىلىدىن قۇتۇلدۇرغىن.
22 مېنى شىرنىڭ ئاغزىدىن قۇتقۇزغىن،
ياۋا بۇقىلارنىڭ مۈڭگۈزلىرىدىن ئاجرىتىپ قۇتقۇزغىن.
سەن دۇئايىمنى ئىجابەت قىلدىڭ!
23 مەن سېنىڭ نامىڭنى قېرىنداشلىرىمغا بايان قىلىمەن،
جامائەت ئىچىدە سېنى مەدھىيىلەيمەن.
24 ئەي سىلەر، پەرۋەردىگاردىن قورقىدىغانلار،
ئۇنى مەدھىيىلەڭلار.
ئەي ياقۇبنىڭ ئۇرۇق-ئەۋلادىنىڭ ھەممىسى،
ئۇنى ئۇلۇغلاڭلار.
ئەي سىلەر، ئىسرائىلنىڭ نەسلىدىن بولغانلارنىڭ ھەممىسى،
ئۇنىڭدىن ئەيمىنىڭلار.
25 چۈنكى ئۇ بىچارىنىڭ دەرد-ئەلىمىگە سەل قارىمىدى
ۋە ئۇنى رەت قىلمىدى.
ئۇ ئۇنىڭدىن يۈزىنى ئۆرۈمىدى،
بەلكى ئۇ ئىلتىجا قىلغاندا، دۇئاسىنى ئىجابەت قىلدى.
26 چوڭ جامائەت ئىچىدە مەدھىيەلىرىم سېنىڭ ئۈچۈندۇر.
ۋەدىلىرىمنى ئۇنىڭ تەقۋادارلىرىنىڭ ئالدىدا ئادا قىلىمەن.
27 كەمتەر-مۇلايىم يەپ تويىدۇ.
پەرۋەردىگارنى ئىزدىگۈچىلەر ئۇنى مەدھىيىلەيدۇ.
سىلەرنىڭ دىلىڭلار مەڭگۈ ياشنايدۇ!
28 دۇنيانىڭ ھەممە چېتىدىكىلەر پەرۋەردىگارنى ياد ئېتىپ،
ئۇنىڭغا قايتىپ كېلىدۇ.
ئەللەرنىڭ ھەممە قەبىلىلىرى سېنىڭ ئالدىڭدا سەجدە قىلىدۇ.
29 چۈنكى پادىشاھلىق پەرۋەردىگارنىڭكىدۇر،
ئەللەرنىڭ ھۆكۈمرانى ئۇدۇر.
30 دۇنيادىكى بايلارنىڭ ھەممىسى
يەپ-ئىچىدۇ ۋە سەجدە قىلىدۇ.
گۆرگە كىرىدىغان، ئۆز جېنىنى ساقلىيالمايدىغانلارنىڭ ھەممىسى
ئۇنىڭ ئالدىدا تىز پۈكىدۇ.
31 كېلەچەكتىكى نەسىل ئۇنىڭغا ئىبادەت قىلىدۇ.
ئۇ نەسىل ئىگىمىزنىڭ پەرزەنتلىرى دەپ سانىلىدۇ.
32 ئۇلار كېيىنكى ئەۋلادلارغا:
«ئۇ ھەققانىيلىقنى ئەمەلگە ئاشۇردى» دەپ،
ئۇنىڭ ھەققانىيلىقىنى بايان قىلىدۇ.