پادىشاھنىڭ ئانىسىنىڭ نەسىھىتى
31
1 لەمۇئەل پادىشاھنىڭ ئۆز ئانىسى ئۇنىڭغا نەسىھەت قىلىپ ئۆگەتكەن سۆزلىرى: 2 ئەي ئوغلۇم، ئەي قورسىقىمنىڭ مېۋىسى،
ئەي مەن خۇداغا ۋەدە قىلىپ ئۇنىڭدىن تىلىگەن ئوغلۇم،
مەن ساڭا نېمە دېسەم بولار؟
3 كۈچ-قۇۋۋىتىڭنى ئاياللارغا بەرمىگىن،
پادىشاھلارنى ۋەيران قىلىدىغان نەرسىلەرگە ئۆزۈڭنى بەرمىگىن.
4 بىر ئىش پادىشاھلارغا ماسلاشمەس، ئەي لەمۇئەل:
شاراب ئىچىش پادىشاھلارغا ماسلاشمەس،
ھاراق ئىچىش ئەمىرلەرگە ياراشماس.
5 بولمىسا ئۇلار شاراب ئىچىۋېلىپ قانۇننى ئۇنتۇپ قالار
ۋە ھەممە بىچارىلەرنىڭ ھەقلىرىنى دەپسەندە قىلار.
6 بەلكى ھالاكەتكە يېقىن بولغانلارغا ھاراق ئىچۈرگىن،
كۆڭلى غەمگە تولغانلارغا شاراب بەرگىن.
7 ئۇنداق كىشى شاراب ئىچىپ ئۆز بىچارىلىكىنى ئۇنتۇسۇن،
مۇشەققەتلىرىنى يادىدىن چىقارسۇن.
8 سۆزلىيەلمەيدىغانلار ئۈچۈن سۆزلىگىن،
ئاجىزلارنىڭ دەۋاسى ئۈچۈن ئاغزىڭنى ئاچقىن.
9 ئاغزىڭنى ئېچىپ ئادالەت بىلەن ھۆكۈم قىلغىن،
كەمبەغەل-بىچارىلەرنىڭ ھەقلىرىنى قوغدىغىن.
پەزىلەتلىك ئايال
10 پەزىلەتلىك ئايالنى كىم تاپالايدۇ؟
ئۇنىڭ قەدىر-قىممىتى مەرۋايىتتىن ئۈستۈن.
11 ئېرىنىڭ كۆڭلى ئۇنىڭغا تايىنار،
ئۇنىڭ ئېرى ھېچ نەرسىگە موھتاج بولماس.
12 ئۇ ئېرىگە ئۆمۈر بويى ياخشىلىق قىلار،
ئۇنىڭغا ھېچ يامانلىق قىلماس.
13 ئۇ يۇڭ ۋە كەندىر ئىزدەپ تېپىپ،
ئۆز قولىدا چېۋەرلىك بىلەن ئىش قىلار.
14 ئۇ سودىگەرنىڭ كېمىلىرىدەك بولۇپ،
رىزقىنى يىراقتىن ئېلىپ كېلەر.
15 ئۇ تاڭ ئاتماستا قوپۇپ،
ئائىلىسىدىكىلەرگە تاماق تەييارلار،
خىزمەتكارلىرىغا تېگىشلىكىنى بېرەر.
16 ئۇ بىر ئېتىزلىقنى خالىسا، ئۇنى سېتىۋالار،
ئۆز قولىنىڭ چېۋەرلىكى بىلەن تاپقىنىغا
بىر ئۈزۈمزارلىقنى بەرپا قىلار.
17 ئۇ بېلىنى كۈچ بىلەن باغلار،
بىلەكلىرىنى كۈچلەندۈرەر.
18 ئۇ ئۆز ئىشىنىڭ پايدىسىنى كۆرەر،
كېچىچە ئىشلەپ ئۇنىڭ چىرىغى ئۆچمەس.
19 ئۇ قوللىرى بىلەن ئۇرچۇقنى ئايلاندۇرار،
بارماقلىرى يىپنى تۇتۇپ ئېگىرەر.
20 ئۇ يوقسۇللارغا قولىنى ئۇزىتار،
مىسكىنلەرگە قولىنى ئاچار.
21 ئۇ ئائىلىسىدىكىلەر ئۈچۈن قاردىن قورقماس،
چۈنكى ئۆيىدىكىلەرنىڭ ھەربىرى قېلىن قىزىل كىيىم كىيەر.
22 ئۇ ئۆزىگە چىرايلىق تەكىيە توقۇر،
ئۇنىڭ كىيىمى نەپىس كەندىر ۋە سۆسۈن رەختلەردىندۇر.
23 ئۇنىڭ ئېرى شەھەرنىڭ دەرۋازىلىرىدا ئاقساقاللارنىڭ قاتارىدا ئولتۇرار،
ئۇ يەردە ئۇنىڭ ئابرۇيى بار.
24 ئۇ نەپىس كەندىر رەختتىن كىيىملەرنى تىكىپ ساتار،
سودىگەرلەرنى بەلۋاغلار بىلەن تەمىنلەر.
25 كۈچ-قۇدرەت ۋە ئىززەت-ھۆرمەت ئۇنىڭ لىباسىدۇر.
ئۇ خۇشاللىق بىلەن كېلىدىغان كۈننى كۈتىدۇ.
26 ئۇ ئاغزىنى ھېكمەت بىلەن ئاچار،
يۇمشاق تىلى بىلەن تەلىم بېرەر.
27 ئۇ ئۆز ئۆيىنى ياخشى باشقۇرار،
ناننى بىكار يەپ ياتماس.
28 ئوغۇللىرى ئورنىدىن تۇرۇشۇپ، ئۇنى تەبرىكلەر.
ئېرىمۇ ئۇنى ماختاپ مۇنداق دەر:
29 «پەزىلەتلىك ئاياللار كۆپتۇر،
لېكىن سەن ئۇلارنىڭ ھەممىسىدىن ئۈستۈنسەن».
30 گۈزەللىك ئالدامچىدۇر، چىرايلىقلىق تۈگەپ كېتىدۇ،
لېكىن پەرۋەردىگاردىن قورقىدىغان ئايال ماختاشقا لايىقتۇر.
31 ئۇ ئۆز مېھنىتىنىڭ مېۋىسىنى يېسۇن،
ئۇنىڭ ئىشلىرى ئۇنى دەرۋازىلاردا ھۆرمەت-شۆھرەتكە ئېرىشتۇرسۇن.