8
1 كاشكى سەن مېنىڭ ئۇكام بولۇپ، ئانامنىڭ ئەمچىكىنى ئەمگەن بولساڭ ئىدىڭ.
ئۇچراپ قالساڭ سۆيىۋالاتتىم سېنى،
ئەيىبلىمەستى ھېچكىم مېنى.
2 باشلايتتىم سېنى ماڭا تەلىم بەرگەن ئانامنىڭ ئۆيىگە.
ئىچۈرەتتىم ئانارىمنىڭ شەربىتىدىن تەييارلانغان
دورا-دەرمەك ئارىلاشتۇرۇلغان شارابنى ساڭا.
3 ئۇنىڭ سول قولى بېشىمنىڭ ئاستىدا،
ئوڭ قولى مېنى قۇچاقلايدۇ.
4 ئەي يېرۇسالېمنىڭ قىزلىرى،
سىلەرگە: «سۆيگۈنى ۋاقتى-سائىتى كەلمىگۈچە،
ئويغاتماڭلار ۋە قوزغىماڭلار» دەپ جېكىلەيمەن.
5 كىم بۇ ئۆز سۆيۈملۈكىگە يۆلىنىپ،
باياۋاندىن چىقىپ كېلگەن؟
ئالما دەرىخىنىڭ تۈۋىدە ئويغاتتىم سېنى.
ئۇ يەردە ئاناڭ سېنى تۇغدى،
ئۇ يەردە ئاناڭ سېنى دۇنياغا كەلتۈردى.
6 بىر مۆھۈردەك مېنى يۈرىكىڭگە باس،
بىر مۆھۈر ئۈزۈكىدەك مېنى قولۇڭدا تۇت.
چۈنكى مۇھەببەت ئۆلۈم كەبى كۈچلۈكتۇر،
ئۇنىڭ قىزغىنىشى ئۆلۈكلەر دىيارىغا ئوخشار،
ئۇنىڭ يالقۇنى پەرۋەردىگارنىڭ ئوتىنىڭ يالقۇنىدەك كۆيدۈرەر.
7 چوڭ سۇلار سۈيگۈنى ئۆچۈرەلمەس،
كەلكۈنلەر ئۇنى غەرق قىلالماس.
ئەگەر بىرى سۆيگۈ ئۈچۈن ئۆيىدىكى پۈتۈن بارلىقىنى بەرسىمۇ ھەتتا،
مەسخىرىدىن باشقىغا ئېرىشەلمەس.
قىز ۋە ئۇنى قوغدايدىغان ئاكىلىرى
8 كىچىك بىر سىڭلىمىز بار تېخى كۆكسى چىقمىغان.
ئەلچى كېلىدىغان كۈنى كەلگەندە
سىڭلىمىز ئۈچۈن نېمە قىلايلى؟
9 ئەگەر ئۇ بىر سېپىل بولسا،
ئۇنىڭ ئۈستىگە كۈمۈشتىن بىر مۇنار ياسايلى.
ئەگەر بىر ئىشىك بولسا
كېدىر تاختايلىرى بىلەن قاپلايلى.
10 مەن بىر سېپىلمەن،
كۆكسىلىرىم مۇنارلار كەبى.
شۇڭا ئۇنىڭ نەزىرىدە ئىلتىپات تاپقان بىرى بولدۇم مەن.
سۇلايماننىڭ ئۈزۈمزارلىقى ۋە قىزنىڭ ئۈزۈمزارلىقى
11 سۇلايماننىڭ بىر ئۈزۈمزارلىقى بار ئىدى بائال-ھاموندا.
ئۈزۈمزارلىقنى باغۋەنلەرگە ئىجارىگە بەردى ئۇ.
مىڭ كۈمۈش تەڭگە تاپشۇرۇشى كېرەك ئىدى مېۋىسى ئۈچۈن ھەربىرى.
12 ئۆزۈمنىڭ ئۈزۈمزارلىقى ئالدىمدا مېنىڭ:
ئەي سۇلايمان سەن ئۆز مىڭىڭنى ئالغىن.
باغۋەنلەر ئىككى يۈزنى ئالسۇن.
يىگىت ۋە قىز بىر-بىرىنى رىغبەتلەندۈرىدۇ
13 ئەي گۈل باغلاردا ئولتۇرغان،
دوستلار قۇلاق سالار ئاۋازىڭغا.
ئاڭلات ئۇنى ماڭىمۇ.
14 تېز بول، ئەي سۆيۈملۈكۈم،
خۇددى خۇشبۇي تاغلاردىكى بىر كېيىك
ياكى بىر ياش بۇغا كەبى.