شۇلامىت قىز ئۇسسۇل ئويناشتا
7
1 قايتقىن، قايتقىن، ئەي شۇلامىت قىز، بۇ تەرەپكە قايت، سېنى كۆرەيلى.
نېمىشقا ئىككى قاتاردا ئۇسسۇل ئوينىشىۋاتقان ئەسكەرلەرنى تاماشا قىلغاندەك،
شۇلامىت قىزغا قارىغۇڭلار بار؟
2
كەش كىيىكلىك پۇتلىرىڭ نەقەدەر گۈزەل، ئەي ئېسىلزادىنىڭ قىزى!
گۆھەرلەردەك يۇمىلاق يانپاشلىرىڭ بىر چېۋەر ئۇستىنىڭ ئىشى.
3 كىندىكىڭ ئارىلاش شارابى كەم بولماس بىر يۇمىلاق پىيالە،
قورسىقىڭ نىلۇپەرلەر بىلەن ئورالغان بۇغداي دۆۋىسى.
4 كۆكسىلىرىڭ ئىككى كېيىك قوزىسى كەبى،
بىر كېيىكنىڭ قوشكېزەك بالىلىرى كەبى.
5 خۇددى پىل چىشى مۇنارى سېنىڭ بوينۇڭ،
بەيت-راببىم دەرۋازىسى بويىدىكى خەشبون كۆللىرى كەبى كۆزلىرىڭ.
دەمەشقكە قارايدىغان لىۋان مۇنارى كەبى بۇرنۇڭ.
6 كارمەل تېغىدەك تۇرار گويا بېشىڭ،
سۆسۈن كىمھاب كەبى چاچلىرىڭ.
ئەسىر قىلدى پادىشاھنى بۈدۈر چاچلىرىڭ.
7 ئەي مۇھەببەت، نەقەدەر گۈزەلسەن،
نەقەدەر يېقىملىق ۋە سۆيۈملۈكسەن.
مۇھەببەت رىشتىسى
8 بويۇڭ خورما دەرىخى كەبى،
كۆكسىلىرىڭ خۇددى ئۈزۈم ساپاقلىرى.
9 دېدىمكى، چىقاي خورما دەرىخىگە،
تۇتاي مېۋىلىك شاخلىرىنى.
ئۈزۈم ساپاقلىرى كەبى بولغاي كۆكسىلىرىڭ،
ئالمىنىڭ پۇرىقى چىققاي دىماغلىرىڭدىن.
10 ئەڭ ئېسىل شاراب كەبى بولغاي سېنىڭ تاڭلىيىڭ.
... سۆيۈملۈكۈمگە سىلىق ئېقىپ كىرگەن،
ئۇخلىغان لەۋلەرنى نەمدىگەن.
11 مەن سۆيۈملۈكۈمنىڭكىدۇرمەن،
ئۇمۇ ماڭا مەپتۇن.
12 كەلگىن، ئەي سۆيۈملۈكۈم،
دالاغا چىقىپ يېزىلاردا قونايلى.
13 تاڭدا تۇرۇپ ئۈزۈمزارلىققا چىقايلى،
ئۈزۈم تېلى چېچەكلەپ، غۇنچىلار پورەكلەپ،
ئانارنىڭ گۈللىرى ئېچىلدىمىكىن كۆرەيلى دەپ.
ئىزھار قىلىمەن سۆيگۈمنى ساڭا شۇ يەردە.
14 خۇش ھىدىنى چاچار مېھىرگىياھلار.
ئىشىكلىرىمىزنىڭ ئۈستىدە
يېڭى-قۇرۇق خىلمۇخىل ئېسىل مېۋىلەر باردۇر.
ساڭا ساقلىدىم ئۇلارنى، ئەي سۆيۈملۈكۈم.