6
1 سۆيۈملۈكۈڭ نەگە كەتتى؟ ئەي قىز-ئاياللارنىڭ ئارىسىدا ئەڭ گۈزىلى،
سېنىڭ سۆيۈملۈكۈڭ قايسى تەرەپكە بۇرۇلدى؟
سەن بىلەن بېرىپ ئىزدەيلى ئۇنى.
2 خۇشپۇراق گۈلزارلىقلاردا ھۇزۇرلىنىشقا،
نىلۇپەر گۈللەرنى ئۈزۈشكە،
ئۆز بېغىغا چۈشتى سۆيۈملۈكۈم.
3 مەن سۆيۈملۈكۈمنىڭكىدۇرمەن ۋە سۆيۈملۈكۈم مېنىڭكى،
ئوتلىتار ئۇ ئۆز پادىسىنى نىلۇپەرلەر ئارىسىدا.
يىگىت قىزنى يەنە كۈيلەيدۇ
4 ئەي سۆيگىنىم، تىرزا كەبى گۈزەلسەن،
يېرۇسالېمدەك يېقىملىقسەن،
تۇغلار كۆتۈرگەن قوشۇندەك ھەيۋەتلىكسەن. ■
5 كۆزلىرىڭنى ئېلىپ قاچ مەندىن،
چۈنكى ئۇلار مېنى مەپتۇن قىلدى.
گىلېئاد تېغىدا ئوتلايدىغان ئۆچكە پادىسى كەبى چاچلىرىڭ.
6 چىشلىرىڭ يۇيۇلۇپ سۇدىن چىققان قويلار كەبى،
ھەممىسىنىڭ بار قوشكېزەك قوزىسى، قىسىر ئەمەس ھېچبىرى.
7 مەڭزىڭ چۈمپەرەڭنىڭ ئىچىدە
يېرىلغان ئاناردۇر.
8 خانىشلار ئاتمىش، كېنىزەكلەر سەكسەنگە يېتىپ،
پاك قىزلار ھېسابسىز بولسىمۇ،
9 مېنىڭ نۇقسانسىز كەپتىرىم بىردىنبىردۇر.
ئۇ ئانىسىنىڭ يالغۇزى،
ئۆزىنى تۇغقۇچىنىڭ ئەزىزىدۇر.
پاك قىزلار ئۇنى كۆرسە، ئۇنى بەختلىك دەيدۇ،
خانىشلار ۋە كېنىزەكلەر ئۇنى داڭلايدۇ.
10 كىمدۇر بۇ قىز، تاڭ قىزىرىپ ئاتقاندەك بولغان،
ئايدەك گۈزەل، قۇياشتەك پارلاق،
تۇغلار كۆتۈرگەن قوشۇندەك ھەيۋەتلىك بولغان؟
11 ياڭاق بېغىغا چۈشتۈم،
ياپ-يېشىل ۋادىنى كۆرەي دەپ،
ئۈزۈم تاللىرى چېچەكلەپ-چېچەكلىمىگەنلىكىنى،
ئانارنىڭ گۈللىرى ئېچىلىپ-ئېچىلمىغانلىقىنى كۆرەي دەپ.
12 لېكىن بىلىپ-بىلمەي،
كۆڭلۈم ئەمىرلەرنىڭ ھارۋىلىرىغا ئولتۇرغۇزدى مېنى.