‏1 مەن ئىگىمىزنىڭ قۇربانلىق سۇپىسىنىڭ يېنىدا تۇرغىنىنى كۆردۈم. ئۇ مۇنداق دېدى: «بوسۇغىلار تەۋرەپ كەتكۈدەك تەرىقىدە تۈۋرۈكلەرنىڭ بېشىغا ئۇرۇپ، پارە-پارە قىلىپ، ئۇ يەردە بولغانلارنىڭ ھەممىسىنىڭ بېشىغا چۈشۈرگىن. ئۇلارنىڭ قالغانلىرىنى مەن قىلىچ بىلەن ئۆلتۈرىمەن. ئۇلاردىن ھېچبىرى قاچالمايدۇ ۋە ھېچكىم قۇتۇلالمايدۇ. ‏2 ئەگەر ئۇلار ئۆلۈكلەر دىيارىغىچە كولاپ كىرىۋالسىمۇ، مېنىڭ قولۇم ئۇلارنى ئۇ يەردىن تارتىپ چىقىرىدۇ. ئۇلار ئاسمانغا چىقىۋالسىمۇ، مەن ئۇ يەردىنمۇ ئۇلارنى سۆرەپ چۈشۈرىمەن. ‏3 ئۇلار كارمەل تېغىنىڭ چوققىسىغا چىقىپ مۆكۈۋالسىمۇ، مەن ئۇلارنى ئۇ يەردە تېپىپ ئېلىپ كېتىمەن. ئۇلار دېڭىزنىڭ تېگىدە مېنىڭ كۆزۈمدىن يوشۇرۇنۇۋالسىمۇ، مەن ئۇ يەردە يىلانغا ئۇلارنى چېقىشنى بۇيرۇيمەن. ‏4 دۈشمەن ئۇلارنى ئەسىر قىلىپ ئېلىپ كەتسىمۇ، ئۇ يەردە قىلىچقا ئۇلارنى ئۆلتۈرۈۋېتىشنى بۇيرۇيمەن، چۈنكى مەن ئۇلارغا ياخشىلىق بولسۇن دېمەي، بەلكى ئۇلارغا يامانلىق بولسۇن دەپ ئۇلارغا نەزەر سالىمەن».

‏5 ساماۋى قوشۇنلارنىڭ سەردارى رەب پەرۋەردىگار زېمىنغا قولىنى بىر تەگكۈزسە، زېمىن ئېرىپ كېتىپ، ئۇنىڭدا ياشايدىغانلارنىڭ ھەممىسى يىغا-زار قىلىدۇ. پۈتۈن زېمىن نىل دەرياسىدەك ئۆرلەپ چىقىپ، مىسىرنىڭ دەرياسىدەك يەنە پەسلەپ كېتىدۇ. ‏6 بالىخانىلىرىنى ئاسماندا قۇرۇپ، ئاسمان گۈمبىزىنىڭ ئۇلىنى يەر ئۈستىگە بېكىتكۈچى، دېڭىزنىڭ سۈيىنى چاقىرىپ، يەر يۈزىگە قۇيغۇچى ئۇدۇر. پەرۋەردىگار ئۇنىڭ نامىدۇر.

‏7 «ئەي بەنى ئىسرائىل، سىلەر مېنىڭ ئالدىمدا كۇشىيلارنىڭ ئەۋلادىغا ئوخشاش ئەمەسمۇ؟» دەيدۇ پەرۋەردىگار. «مەن ئۆزۈم ئىسرائىلنى مىسىر زېمىنىدىن، فىلىستىنلەرنى كافتور ئارىلىدىن ۋە ئارامىيلارنى كىر شەھىرىدىن چىقاردىم ئەمەسمۇ؟ ^■  

‏8 مانا، رەب پەرۋەردىگارنىڭ كۆزلىرى بۇ گۇناھكار پادىشاھلىققا قارشىلىق بىلەن قارايدۇ. شەكسىز مەن ئۇنى يەر يۈزىدىن يوق قىلىۋېتىمەن. لېكىن مەن ياقۇب جەمەتىنى تامامەن يوق قىلمايمەن» دەيدۇ پەرۋەردىگار. ‏9 «چۈنكى، مانا، كىشى بىر دانمۇ يەرگە چۈشۈرمەي ئاشلىقنى غەلۋىردە تاسقىغاندەك، مەن بۇيرۇق چىقىرىپ، ئىسرائىل جەمەتىنى ھەممە ئەللەر ئارىسىدا تاسقايمەن. ‏10 خەلقىم ئىچىدىكى: ‹بالايىئاپەت بىزگە يېقىنلىشىپ بېشىمىزغا كەلمەيدۇ› دېگەن بارلىق گۇناھكارلار قىلىچ ئاستىدا ئۆلتۈرۈلىدۇ.

‏11 ئۇ كۈنى داۋۇدنىڭ يىقىلغان كەپىسىنى قايتىدىن قۇرىمەن، ئۇنىڭ يېرىقلىرىنى ئېتىپ، ۋەيران بولغان جايلىرىنى ئوڭشاپ، ئىلگىرىكى ھالىتىگە كەلتۈرىمەن. ‏12 شۇنىڭ بىلەن ئۇلار ئېدومنىڭ قالغانلىرى ۋە مېنىڭ نامىم بىلەن ئاتالغان ھەممە ئەللەرگە ئىگە بولىدۇ» دەيدۇ بۇنى ئەمەلگە ئاشۇرغۇچى پەرۋەردىگار. ‏13 «مانا، قوش ھەيدىگۈچى ئورما ئورغۇچىغا، ئۈزۈم دەسسىگۈچى ئۇرۇق تېرىغۇچىغا يېتىشىپ قالىدىغان كۈنلەر كېلىدۇ. ئۇ چاغدا يېڭى شاراب تاغلاردىن تېمىپ، ھەممە دۆڭلەردىن ئېقىپ چۈشىدۇ» دەيدۇ پەرۋەردىگار. ^■   ‏14 «مەن ئۆز خەلقىم ئىسرائىلنى ئاسارەتتىن قۇتقۇزۇپ ئەسلىگە كەلتۈرىمەن. ئۇلار خاراب بولغان شەھەرلىرىنى قايتا قۇرۇپ، ئۇلاردا ياشايدۇ. ئۇلار ئۈزۈمزارلىقلارنى يېتىشتۈرۈپ، ئۇلارنىڭ شارابىنى ئىچىدۇ، باغلارنى ئۆستۈرۈپ، مېۋىسىنى يەيدۇ. ‏15 چۈنكى مەن ئۇلارنى ئۆز زېمىنىدا ئۈندۈرىمەن. مەن ئۇلارغا بەرگەن زېمىندىن ھېچكىم ئۇلارنى يۇلۇۋېتەلمەيدۇ» دەيدۇ سېنىڭ پەرۋەردىگار خۇدايىڭ.