‏1 رەب پەرۋەردىگار ماڭا شۇنى كۆرسەتتى: مەن پىششىق مېۋە بىلەن تولغان بىر سېۋەتنى كۆردۈم. ‏2 ئۇ مەندىن: «ئاموس، نېمىنى كۆردۈڭ؟» دەپ سورىدى. مەن جاۋاب بېرىپ: «پىششىق مېۋە بىلەن تولغان بىر سېۋەتنى كۆردۈم» دېدىم. پەرۋەردىگار ماڭا: «مېنىڭ خەلقىم ئىسرائىلنىڭ ھالاكىتى يېتىپ كەلدى. مەن ئۇنى يەنە ئاياپ قويمايمەن» دېدى. ‏3 «شۇ كۈنى ئوردىدا ئېيتىلغان ناخشىلار يىغا-زارغا ئايلىنىدۇ»، دەيدۇ رەب پەرۋەردىگار، «جەزەتلەر كۆپ بولىدۇ. ئۇلار ھەر يەرگە تاشلىنىدۇ. ئەتراپ جىمجىت بولىدۇ». ^■  

‏4 ئەي مىسكىنلەرنى يۇتقۇچىلار، ئېزىلگەنلەرنى زېمىندىن يوق قىلغۇچىلار، ئاڭلاڭلار. ‏5 «يېڭى ئاي قاچان تۈگەيدۇ؟ ئاشلىقنى ساتماقچىمىز. شابات كۈنى قاچان تۈگەيدۇ؟ بۇغداي تاغارلىرىنى ئاچماقچىمىز. ئېفانى كىچىك ۋە شېكەلنى چوڭ قىلىپ، يالغان تارازىلار ئىشلىتىپ ئادەملەرنى ئالدايمىز. ^■   ‏6 نامراتلارنى كۈمۈش پۇلغا ساتىمىز، مىسكىنلەرنى بىر جۈپ چورۇققا تېگىشىمىز، بۇغداينى سامىنى بىلەن قوشۇپ ساتىمىز» دېگەنلەر بۇنى ئاڭلاڭلار. ‏7 پەرۋەردىگار ياقۇبنىڭ پەخرى بىلەن قەسەم قىلىپ: «مەن ئۇلارنىڭ بارلىق قىلغان ئىشلىرىنى ھەرگىز ئۇنتۇمايمەن! ‏8 شۇ سەۋەبتىن زېمىن تەۋرىنىپ كېتىپ، ئۇنىڭدا ياشايدىغانلارنىڭ ھەممىسى داد-پەرياد كۆتۈرمەمدۇ؟ پۈتۈن زېمىن نىل دەرياسىدەك ئۆركەشلىمەمدۇ، مىسىردىكى نىل دەرياسىدەك ئۆرلەپ چىقىپ، يەنە پەسلەپ كەتمەمدۇ؟» دەيدۇ. ‏9 «ئۇ كۈنى چۈش ۋاقتىدا مەن كۈننى پاتتۇرۇۋېتىپ، كۈندۈزى يەر يۈزىنى قاراڭغۇ قىلىمەن» دەيدۇ رەب پەرۋەردىگار، ‏10 «مەن ھېيتلىرىڭلارنى ماتەمگە، ناخشىلىرىڭلارنى مەرسىيەگە ئايلاندۇرىمەن. ھەربىر كىشىنىڭ بېلىگە بۆز رەخت باغلىتىپ، ھەربىر باشنى تاقىر قىلىۋېتىمەن، سىلەرنى يالغۇز ئوغلىنى يىتتۈرگەن كىشىدەك غەملىككە تاشلاپ، دەرد-ئەلەملىك بىر كۈن ئەۋەتىمەن».

‏11 رەب پەرۋەردىگار مۇنداق دەيدۇ: «مانا، مەن بۇ زېمىنغا ئاچارچىلىق ئەۋەتىدىغان كۈنلەر كېلىدۇ. بۇ ئاچلىق نانغا بولغان ئاچلىق ياكى سۇغا بولغان ئۇسسۇزلۇق ئەمەس، بەلكى پەرۋەردىگارنىڭ سۆزىگە بولغان ئاچلىق بولىدۇ. ‏12 ئۇ چاغدا خەلق دېڭىزدىن دېڭىزغا، شىمالدىن شەرققە كېزىپ ماڭىدۇ. ئۇلار ئۇ ياق-بۇ ياققا يۈرۈپ، پەرۋەردىگارنىڭ سۆزىنى ئىزدەيدۇ، لېكىن ئۇنى تاپالمايدۇ. ‏13 ئۇ كۈندە گۈزەل قىزلار ۋە ياش يىگىتلەر ئۇسسۇزلۇقتىن چاڭقاپ ھالىدىن كېتىدۇ. ‏14 گۇناھقا سەۋەب بولغان سامارىيەنىڭ بۇتىنىڭ نامى بىلەن قەسەم قىلىپ، ‹ئەي دان، ئىلاھىڭنىڭ تىرىكلىكى بىلەن› ۋە ‹بەئەرشېبانىڭ ئىلاھىي يولىنىڭ تىرىكلىكى بىلەن› دېگەنلەر ھەممىسى يىقىلىدۇ ۋە ئورنىدىن يەنە تۇرالمايدۇ».