‏1 رەب پەرۋەردىگار ماڭا شۇنى كۆرسەتتى: ئاخىركى زىرائەت باش تارتقان ۋاقتىدا، پەرۋەردىگار چېكەتكىلەرنى ياراتتى. بۇ پادىشاھنىڭ ئورمىسى ئورۇلغاندىن كېيىن ئۈنگەن زىرائەت ئىدى. ‏2 چېكەتكىلەر يەرنىڭ ھەممە ئوت-چۆپلىرىنى يەپ بولغاندىن كېيىن، مەن ئىلتىجا قىلىپ: «ئەي رەببىم پەرۋەردىگار، كەچۈرگەيسەن. ياقۇب كىچىككۇ، ئۇ قانداقمۇ چىداپ تۇرالايدۇ؟» دېدىم. ‏3 شۇنىڭ بىلەن پەرۋەردىگار نىيىتىدىن ياندى. «ماقۇل، ئۇنداق بولمايدۇ» دېدى پەرۋەردىگار.

‏4 ئاندىن رەب پەرۋەردىگار ماڭا شۇنى كۆرسەتتى: مانا، رەب پەرۋەردىگار جازالاش ئۈچۈن ئوتنى چاقىردى. ئوت كېلىپ، چوڭقۇر دېڭىزنى يۇتۇپ كەتتى، مىراس بولغان زېمىننىمۇ يۇتۇپ كەتكىلى تاس قالدى. ‏5 ئۇ ۋاقىتتا مەن ئىلتىجا قىلىپ: «ئەي رەببىم پەرۋەردىگار، توختىغايسەن! ياقۇب كىچىككۇ، ئۇ قانداقمۇ چىداپ تۇرالايدۇ؟» دېدىم. ‏6 شۇنىڭ بىلەن پەرۋەردىگار نىيىتىدىن ياندى. «ماقۇل، ئۇنداق بولمايدۇ» دېدى رەب پەرۋەردىگار.

‏7 يەنە ئۇ ماڭا شۇنى كۆرسەتتى: ئىگەم تىك قۇرۇلغان تامنىڭ ئۈستىدە قولىدا تىكلىكنى تەكشۈرۈش تانىسىنى تۇتۇپ تۇردى. ‏8 پەرۋەردىگار مەندىن: «ئاموس، نېمىنى كۆردۈڭ؟» دەپ سورىدى. مەن جاۋاب بېرىپ: «تىكلىكنى تەكشۈرۈش تانىسىنى كۆردۈم» دېدىم. ئاندىن ئىگەم: «مانا، مەن خەلقىم ئىسرائىلنىڭ ئارىسىدا تىكلىكنى تەكشۈرۈش تانىسىنى ساڭگىلىتىپ، ئۇلارنى يەنە ئاياپ قويمايمەن. ‏9 ئىسئھاقنىڭ تۆپىلىكلەردىكى سەجدىگاھلىرى ۋەيران بولىدۇ. ئىسرائىلنىڭ مۇقەددەس جايلىرى خارابىلىككە ئايلىنىدۇ. مەن قوپۇپ، يەروبېئامنىڭ جەمەتىگە قارشى قىلىچ كۆتۈرىمەن» دېدى.

‏10 بەيتەلنىڭ كاھىنى ئامازيا ئىسرائىلنىڭ پادىشاھى يەروبېئامغا ئەلچى ئەۋەتىپ: «ئاموس ئىسرائىل جەمەتىنىڭ ئىچىدە ساڭا قارشى پىتنە قوزغىۋاتىدۇ. زېمىن ئۇنىڭ قىلغان ھەممە گەپلىرىنى كۆتۈرەلمەيدۇ. ‏11 چۈنكى ئاموس: ‹يەروبېئام قىلىچ بىلەن ئۆلتۈرۈلىدۇ ۋە ئىسرائىل خەلقى شەكسىز ئۆز زېمىنىدىن سۈرگۈن قىلىنىدۇ› دەيدۇ» دېدى. ‏12 ئاندىن ئامازيا ئاموسقا: «ئەي غايىبنى كۆرگۈچى، سەن يەھۇدا زېمىنىغا قېچىپ بېرىپ، ئۇ يەردە نېنىڭنى يەپ، پەيغەمبەرلىك قىلغىن. ‏13 ئەمما بەيتەل پادىشاھنىڭ مۇقەددەس جايى ۋە بۇ يەردە پادىشاھلىقنىڭ ئىبادەتخانىسى بولغاچقا، بەيتەلدە يەنە پەيغەمبەرلىك قىلمىغىن» دېدى.

‏14 ئاموس ئامازياغا جاۋاب بېرىپ مۇنداق دېدى: «مەن ئەسلى پەيغەمبەر ئەمەس ۋە پەيغەمبەرنىڭ ئوغلىمۇ ئەمەس، بەلكى مال باقىدىغان پادىچى ۋە ياۋا ئەنجۈر تېرىپ يەيدىغان بىر كىشىدۇرمەن. ‏15 لېكىن پەرۋەردىگار مېنى پادىنىڭ كەينىدىن ئېلىپ: ‹سەن بېرىپ، مېنىڭ خەلقىم ئىسرائىل ئۈچۈن پەيغەمبەرلىك قىلغىن› دېدى. ‏16 ئەمدى سەن پەرۋەردىگارنىڭ سۆزىنى ئاڭلىغىن. ‹ئىسرائىلغا قارشى بېشارەت بەرمىگىن ۋە ئىسئھاق جەمەتى ئۈستىگە ھۆكۈم سۆزلىرىنى ياغدۇرمىغىن› دېگىنىڭ ئۈچۈن، ‏17 پەرۋەردىگار مۇنداق دەيدۇ: ‹سېنىڭ ئايالىڭ بۇ شەھەردە پاھىشە بولۇپ قالىدۇ، ئوغۇل-قىزلىرىڭ قىلىچ ئاستىدا ھالاك بولىدۇ ۋە زېمىنىڭ ئۆلچەش تانىسى تارتىلىشى ئارقىلىق بۆلۈنىدۇ. سەن ئۆزۈڭ ناپاك بىر زېمىندا ئۆلىسەن ۋە ئىسرائىل خەلقى شەكسىز ئۆز زېمىنىدىن سۈرگۈن قىلىنىدۇ».