‏1 ھالىڭغا ۋاي، ئەي يالغان ۋە زۇلۇمغا تولغان، توختىماي بۇلاپ-تالاپ يۈرىدىغان قانلىق شەھەر! ‏2 مانا، قامچىلارنىڭ ئاۋازى، چاقلارنىڭ غۇچۇرلىشى، ئاتلارنىڭ سەكرىشى ۋە جەڭ ھارۋىلىرىنىڭ تاراق-تۇرۇق قىلىپ مېڭىشى ئاڭلىنىۋاتىدۇ. ‏3 مانا، ئاتلىقلار ھۇجۇم قىلىدۇ، قىلىچلار پارقىرايدۇ، نەيزىلەر يالتىرايدۇ. ئۆلتۈرۈلگەنلەر ناھايىتى كۆپ بولىدۇ، ئۆلۈكلەر دۆۋىلەپ توپلىنىدۇ، ئۇلار سانى يوق جەسەتلەرگە پۇتلىشىپ يىقىلىدۇ.

‏4 ئۇ ئۆز پاھىشىلىكى بىلەن ئەللەرنى، ئۆز جادۇگەرلىكى بىلەن قەبىلىلەرنى قۇللۇققا ساتقۇچى بولغىنى ئۈچۈن ۋە شۇ جادۇگەرلىككە ماھىر بولغان چىرايلىق مەھلىيا قىلغۇچى پاھىشىنىڭ نۇرغۇن بۇزۇقچىلىقلىرى سەۋەبىدىن، ‏5 ساماۋى قوشۇنلارنىڭ سەردارى پەرۋەردىگار مۇنداق دەيدۇ: «مانا، مەن ساڭا قارشى تۇرۇپ، كۆڭلىكىڭنىڭ ئېتىكىنى يۈزۈڭگىچە كۆتۈرۈپ، ئەللەرگە يالىڭاچلىقىڭنى ئاشكارىلايمەن، پادىشاھلىقلارغا شەرمەندىلىكىڭنى كۆرسىتىمەن. ‏6 ئۈستۈڭگە نىجاسەت تاشلايمەن. سېنى رەسۋا قىلىپ، بىر ئىبرەت جايى قىلىمەن. ‏7 شۇنداقكى، ھەركىم سېنى كۆرسە، سەندىن قېچىپ: ‹ۋاي ۋاي، نىنەۋە خاراب بولدى! كىم ئۇنىڭغا ئىچ ئاغرىتىدۇ؟ مەن ساڭا تەسەللى بەرگۈچىلەرنى قەيەردىن تاپاي؟› دەيدۇ».

‏8 سەن دەريالارنىڭ ئارىسىدا جايلاشقان، چۆرىسىدە سۇلار بولغان، نىل دەرياسى ئۇنىڭ قورغىنى، دېڭىز ئۇنىڭ سېپىلى بولغان نو-ئامون شەھىرىدىن ئەۋزەلمۇسەن؟ ‏9 كۇش ۋە مىسىر ئۇنىڭ تۈگىمەس كۈچ-قۇدرىتى ئىدى، پۇتىيلار ۋە لىۋىيەلەر ئۇنىڭ ياردەمچىلىرى ئىدى. ‏10 شۇنداق بولسىمۇ، ئۇ ئەسىر قىلىنىپ ئېلىپ كېتىلدى. ئۇنىڭ بوۋاقلىرى ھەر كوچا بېشىدا ئۇرۇپ ئۆلتۈرۈلدى، ئۇنىڭ ئېسىلزادىلىرى ئۈستىگە چەك تاشلاندى ۋە ئۇنىڭ ھەممە چوڭلىرى زەنجىر بىلەن باغلاندى.

‏11 سەنمۇ مەست ئادەمدەك بولۇپ مۆكۈنۈۋالىسەن. دۈشمەن تۈپەيلى پاناھ ئىزدەپ يۈرىسەن. ‏12 سېنىڭ ھەممە قورغانلىرىڭ تۈنجى مېۋىسى پىشقان ئەنجۈر دەرىخىدەكتۇر. بىر سىلكىگەندە ئەنجىرلىرى يېگۈچىنىڭ ئاغزىغا چۈشىدۇ. ‏13 مانا، سېنىڭ ئىچىڭدىكى ئەر كىشىلەر ئايال كىشىدەك بولۇپ قالىدۇ، زېمىنىڭنىڭ دەرۋازىلىرى دۈشمەنلىرىڭگە ئېچىلىدۇ، ئوت تاقاقلىرىڭنى يەپ كېتىدۇ.

‏14 سەن قورشاۋغا چۈشىدىغان ۋاقتىڭ ئۈچۈن سۇ توشتۇرۇۋالغىن، قورغانلىرىڭنى مۇستەھكەملىگىن. سېغىز دەسسەپ لاي ئېتىپ، خىش قېلىپىنى قولۇڭغا ئالغىن. ‏15 شۇنداق قىلساڭمۇ، شۇ يەردە ئوت سېنى يەپ كېتىدۇ، قىلىچ سېنى چېپىپ تاشلايدۇ. سەن چېكەتكە لىچىنكىلىرىدەك كۆپەيسەڭمۇ، چېكەتكىلەردەك كۆپ بولساڭمۇ، چېكەتكە لىچىنكىلىرى تەرىپىدىن يەپ كېتىلگەندەك بولىسەن. ‏16 سەن سودىگەرلىرىڭنى ئاسماننىڭ يۇلتۇزلىرىدىن زىيادە قىلغان بولساڭمۇ، ئۇلار چېكەتكە لىچىنكىلىرىدەك قانات چىقىرىپ ئۇچۇپ كېتىدۇ. ‏17 سېنىڭ ئەمەلدارلىرىڭ چېكەتكىلەردەكتۇر، سەردارلىرىڭ سوغۇق كۈندە تامغا قونۇپ ئولتۇرۇشۇپ، كۈن چىققاندا ئۇچۇپ كېتىشىپ ئىز-دېرەك قالدۇرمايدىغان چېكەتكىلەرنىڭ قوشۇنىدەكتۇر. ‏18 ئەي ئاسسۇرنىڭ پادىشاھى، پادىچىلىرىڭ مۈگدەپ ياتىدۇ، رەھبەرلىرىڭ ئۇخلاپ قالغان. سېنىڭ خەلقىڭ تاغلاردا تارقىلىپ كەتتى ۋە ئۇلارنى يىغىدىغان كىشى يوق.

‏19 سېنىڭ جاراھىتىڭ داۋاسىز، سېنىڭ ياراڭ ساقايماس. سېنىڭ توختاۋسىز يامانلىقىڭ بېشىغا كەلمىگەن ھېچ كىشى بولمىغاچقا، سېنىڭ توغرىسىدىكى خەۋەرنى ئاڭلىغانلارنىڭ ھەممىسى چاۋاك چالىدۇ. چۈنكى سېنىڭ تۈگىمەس زۇلۇمۇڭدىن كىم خالاس بولالىدى؟