‏1 يوتام، ئاھاز ۋە خىزقىيا دېگەن يەھۇدا پادىشاھلىرىنىڭ كۈنلىرىدە مورەشەتلىق مىكاغا كەلگەن پەرۋەردىگارنىڭ سۆزى، ئۇنىڭغا سامارىيە ۋە يېرۇسالېم توغرىسىدا كەلگەن ۋەھىي.

‏2 «ئەي بارلىق خەلقلەر، ئاڭلاڭلار! ئەي يەر يۈزى ۋە ئۇنىڭدا ياشاۋاتقانلار، قۇلاق سېلىڭلار! ئىگىمىز پەرۋەردىگار سىلەرگە قارشى گۇۋاھلىق بېرىدۇ، ئۆز مۇقەددەس بەيتىدىن ئىگىمىز سىلەرنى ئەيىبلەيدۇ.

‏3 مانا، پەرۋەردىگار ئۆز ماكانىدىن چىقىدۇ. ئۇ چۈشۈپ، يەر يۈزىنىڭ ئېگىزلىكلىرىنى دەسسەيدۇ. ‏4 موم ئوتنىڭ ئالدىدا ئېرىپ كەتكەندەك، سۇلار تىك دۆڭدىن پەسكە ئېقىپ چۈشكەندەك، ئۇنىڭ ئاستىدا تاغلار ئېرىپ كېتىدۇ، جىلغىلار يېرىلىدۇ. ‏5 بۇنىڭ ھەممىسى ياقۇبنىڭ ئاسىيلىقىنىڭ سەۋەبىدىن بولىدۇ، ئىسرائىل جەمەتىنىڭ گۇناھلىرى تۈپەيلىدىن بولىدۇ. ياقۇبنىڭ ئاسىيلىقى نەدىن باشلاندى؟ سامارىيەدىن ئەمەسمۇ؟ يەھۇدانىڭ تۆپىلىكلەردىكى سەجدىگاھلىرى نەدىن باشلاندى؟ يېرۇسالېمدىن ئەمەسمۇ؟ ‏6 شۇنىڭ ئۈچۈن مەن سامارىيەنى دالادىكى بىر خارابىگە، ئۈزۈم تاللىرى تىكىلىدىغان يەرگە ئايلاندۇرىمەن. مەن ئۇنىڭ تاشلىرىنى جىلغىغا تاشلىۋېتىمەن، ئۇنىڭ ئۇللىرىنى ئېچىۋېتىمەن. ‏7 ئۇنىڭ ھەممە ئويما بۇت ھەيكەللىرى پارە-پارە قىلىنىدۇ. ئۇنىڭ پاھىشىنىڭ ھەققىدەك يىغقان سوۋغاتلىرى ھەممىسى ئوتتا كۆيدۈرۈلىدۇ. مەن ئۇنىڭ ھەممە بۇتلىرىنى ۋەيران قىلىمەن. چۈنكى ئۇ بۇلارنى پاھىشىنىڭ ھەققىدەك تاپقاچقا، ئۇلار يەنە پاھىشىلىكنىڭ ھەققىگە قايتۇرۇلىدۇ».

‏8 بۇنىڭ ئۈچۈن مەن ماتەم تۇتۇپ يىغا-زار قىلىمەن. مەن كىيىمىمنى سېلىۋېتىپ، يالاڭ ئاياغ يۈرىمەن. چىلبۆرىدەك ھۆركىرىمەن، تۆگىقۇشتەك چىرقىرىمەن. ‏9 چۈنكى ئۇنىڭغا تەگكەن ۋابا داۋاسىز. ئۇ يەھۇداغىمۇ يېتىپ كەلدى، ھەتتە مېنىڭ خەلقىمنىڭ دەرۋازىسىغىچە، يەنى يېرۇسالېمغىمۇ يېتىپ كەلدى.

‏10 بۇنىڭ خەۋىرىنى گات ئىچىدە تارقاتماڭلار. ھەتتا ياش تۆكمەڭلار. بەيت-ئافرادا توپىغا مىلىنىپ ئولتۇرۇڭلار.

‏11 ئەي شافىر خەلقى، يالىڭاچلىق ۋە خىجالەت ئىچىدە چىقىپ كەتكىن. زائانان خەلقى تالاغا چىقىشقا جۈرئەت قىلمايدۇ. بەيت-خاېزەل نالە-زار قىلىدۇ. خۇدا سەندىن ئارقا تىرەكنى تارتىپ ئالىدۇ. ‏12 ماروت خەلقى ياخشىلىقنى كۈتۈپ تەلمۈرۈپ ئولتۇرىدۇ، چۈنكى پەرۋەردىگار تەرىپىدىن ئاپەت چۈشۈپ، يېرۇسالېمنىڭ دەرۋازىسىغا يېتىپ كەلدى.

‏13 ئەي لاكىش خەلقى، چاپقۇر ئاتلارنى جەڭ ھارۋىسىغا قوشقىن. سەن سىئون قىزىنىڭ گۇناھقا چۈشۈشىگە سەۋەب بولدۇڭ، ئىسرائىلنىڭ ئاسىيلىقى سېنىڭدىن چىققان. ^■   ‏14 شۇڭا مورەشەت-گات بىلەن خەيرلىشىپ، خۇشلىشىش ھەدىيەلىرىنى بەرگىن. ئىسرائىل پادىشاھلىرى ئىشەنچ باغلىغان ئاكزىب ئاھالىسى ئالدامچى بولۇپ چىقىدۇ.

‏15 ئەي مارەشا خەلقى، مەن مەغلۇپ قىلغۇچىنى يەنە سېنىڭ ئۈستۈڭگە ئەۋەتىمەن. ئىسرائىلنىڭ شان-شەرىپى بولغانلار ئادۇللامغا قېچىپ كېتىدۇ. ‏16 ئامراق بالىلىرىڭ ئۈچۈن ماتەم تۇتۇپ، چېچىڭنى چۈشۈرۈۋەتكىن. ئۆزۈڭنى تاقىر باش قىلغىن، بۈركۈتتەك تاقىرلىقىڭنى كەڭەيتكىن. چۈنكى ئۇلار سەندىن ئايرىلىپ، سۈرگۈن قىلىنغان.