‏1 نىنەۋە شەھىرى توغرىسىدىكى ھۆكۈم ۋەھىيسى. ئەلقوشلۇق ناھۇمغا كەلگەن ۋەھىي خاتىرىلەنگەن كىتاب.

‏2 پەرۋەردىگار قىزغىنىدىغان ۋە ئىنتىقام ئالىدىغان خۇدا، دەرۋەقە پەرۋەردىگار ئىنتىقام ئالغۇچى ۋە قەھر-غەزەپ قىلغۇچى. پەرۋەردىگار ئۆزىگە قارشى تۇرغۇچىلاردىن ئىنتىقام ئالغۇچى. ئۇ دۈشمەنلىرىگە بولغان غەزىپىدىن يانمايدۇ.

‏3 پەرۋەردىگار ئاسان غەزەپلەنمىسىمۇ، ئۇنىڭ كۈچ-قۇدرىتى چوڭ. ئۇ گۇناھكارنى ھەرگىز جازاسىز قويمايدۇ. پەرۋەردىگارنىڭ يولى قۇيۇن ۋە بوران ئىچىدە، بۇلۇتلار بولسا ئۇنىڭ ئاياغلىرى ئاستىدىكى چاڭ-توزاڭدۇر. ‏4 ئۇ دېڭىزغا تەنبىھ بېرىپ ئۇنى قۇرۇق قىلىدۇ، بارلىق دەريالارنىمۇ قۇرۇتۇۋېتىدۇ. باشان ۋە كارمەل قاغجىراپ كېتىدۇ، لىۋاننىڭ گۈللىرى سولىشىپ كېتىدۇ. ‏5 تاغلار ئۇنىڭ ئالدىدا تىترىشىدۇ، دۆڭلۈكلەر ئېرىپ كېتىدۇ. ئۇنىڭ ئالدىدا يەر يۈزى كۆتۈرۈلىدۇ، دۇنيا بىلەن ئۇنىڭدا ياشاۋاتقانلارمۇ تەۋرەپ كېتىدۇ. ‏6 ئۇنىڭ ئاچچىقى كەلسە، كىم تىك تۇرالايدۇ؟ كىم ئۇنىڭ غەزىپىنىڭ ئوتىغا قارشى تۇرالايدۇ؟ ئۇنىڭ قەھرى ئوتتەك تۆكۈلىدۇ، قورام تاشلار ئۇنىڭ ئالدىدا يېرىلىدۇ.

‏7 پەرۋەردىگار مېھرىبان بولغاچقا، ئاپەتلىك كۈندە باشپاناھتۇر. ئۇ ئۆزىگە تايانغانلارنى بىلىدۇ.

‏8 ئۇ بىر ئېشىپ تاشقان كەلكۈن بىلەن نىنەۋەنى پۈتۈنلەي يوقىتىۋېتىدۇ، ئۇ دۈشمەنلىرىنى قاراڭغۇلۇق ئىچىگە سۈرۈپ قوغلايدۇ. ‏9 سىلەر پەرۋەردىگارغا قارشى قانداق تەدبىر ئېلىشنى ئويلاۋاتىسىلەر؟ ئۇ ھەممىسىنى پۈتۈنلەي يوقىتىدۇ. شۇنداقكى، يەنە بالايىئاپەت ئەۋەتىش لازىم بولمايدۇ. ‏10 ئۇلار چىرمىشىپ قالغان تىكەنلىكلەرگە، مەست بولۇپ قالغان ھاراقكەشلەرگە ئوخشايدۇ. ئۇلار قۇرۇق پاخالدەك پۈتۈنلەي كۆيدۈرۈلۈپ كېتىدۇ. ‏11 سېنىڭ ئىچىڭدىن پەرۋەردىگارغا قارشى يامان نىيەتتە بولغۇچى، شۇم مەقسەت كۆزلەيدىغان كىشى چىقتى. ^■  

‏12 پەرۋەردىگار مۇنداق دەيدۇ: «ئۇلار قانچە كۈچ-قۇدرەتلىك بولسىمۇ، قانچە چوڭ قوشۇن بولسىمۇ، ئۇلار قىرىپ تاشلىنىپ يوق بولۇپ كېتىدۇ.

مەن ئىلگىرى ساڭا ئېغىرچىلىك سالغان بولساممۇ، ئەمدى ساڭا ئېغىرچىلىك سالمايمەن. ^■   ‏13 چۈنكى ئەمدى مەن ئۇنىڭ ساڭا قويغان بويۇنتۇرۇقىنى سۇندۇرۇپ تاشلايمەن، زەنجىرلىرىڭنى ئۈزۈپ تاشلايمەن».

‏14 لېكىن پەرۋەردىگار سەن توغرۇلۇق مۇنداق بۇيرۇق بەرگەن: «سېنىڭ نامىڭ بىلەن ئاتىلىدىغان نەسلىڭ قالمايدۇ. مەن سېنىڭ بۇتخانىلىرىڭدىكى ئويما بۇت ھەيكەللىرى ۋە قۇيما بۇت ھەيكەللىرىنى يوقىتىۋېتىمەن. سەن پەسەندە بولغىنىڭ ئۈچۈن گۆرۈڭنى تەييارلاۋاتىمەن». ^■