‏1 ھاباقۇق پەيغەمبەر كۆرگەن ھۆكۈم ۋەھىيسى.

‏2 ئەي پەرۋەردىگار، قاچانغىچە سەن مېنىڭ پەريادىمنى ئاڭلىمايسەن؟ «زۇلۇم-زوراۋانلىق!» دەپ ساڭا نالە قىلىپ تۇرىمەن، بىراق سەن قۇتقۇزمايسەن. ‏3 نېمىشقا سەن مېنى شۇنچە ئادالەتسىزلىك كۆرۈشكە مەجبۇر قىلىسەن؟ نېمىشقا شۇنچە ئىنساپسىزلىققا پەرۋاسىز قاراپ تۇرىسەن؟ چۈنكى ۋەيرانچىلىق ۋە زوراۋانلىق كۆز ئالدىمدا، تالاش-تارتىش ۋە ئۇرۇش-جېدەل چىقىپ تۇرىدۇ. ‏4 شۇڭا تەۋرات قانۇنى كۈچىنى يوقاتقان ۋە ئادالەت ھېچ ئوتتۇرىغا چىقمايدۇ، چۈنكى يامانلار ھەققانىيلارنى قىستاققا ئالىدۇ. شۇ سەۋەبتىن ئادالەت بۇرمىلىنىدۇ. ^■  

‏5 «ئەللەر ئارىسىدا بولغانلىقىنى كۆرۈپ بېقىڭلار، كۆرگىنىڭلاردىن ھەيران قېلىپ ئالاقزادە بولىسىلەر! چۈنكى سىلەرنىڭ كۈنلىرىڭلاردا مەن شۇنداق بىر ئىش قىلىمەنكى، ئەگەر بۇ ئىش توغرىسىدا خەۋەر بېرىلسىمۇ، ئىشەنمەيسىلەر. ‏6 مانا، مەن ئۆزىنىڭكى بولمىغان جايلارنى ئىگىلەش ئۈچۈن يەرنىڭ چەتلىرىگىچە بارىدىغان رەھىمسىز ۋە زومىگەر كالدىيلارنى مەيدانغا چىقىرىمەن. ‏7 ئۇلار قورقۇنچلۇق ۋە دەھشەتلىكتۇر. ئۇلار ئۆزلىرىنى خەممىدىن ئۈستۈن تۇتۇپ، خالىغانچە ھۆكۈم قىلىدۇ. ‏8 ئۇلارنىڭ ئاتلىرى يىلپىزدىنمۇ چاققان، ئاخشامدا ئوۋغا چىقىدىغان بۆرىلەردىن ئەشەددىي. ئۇلارنىڭ ئاتلىقلىرى يىراقتىن چېپىپ كېلىپ، ئوۋغا ئېتىلغان بۈركۈتتەك ئۇچۇپ چۈشىدۇ. ‏9 ئۇلارنىڭ ھەممىسى زوراۋانلىق قىلىش ئۈچۈن كېلىدۇ، ئالدىغا ئۇدۇل بېسىپ كېلىدۇ. ئۇلار قۇمدەك كۆپ كىشىلەرنى ئەسىر ئالىدۇ. ‏10 ئۇلار پادىشاھلارنى زاڭلىق قىلىدۇ، ئەمىرلەرنى مەسخىرە قىلىدۇ ۋە ھەممە قورغانلار ئۈستىدىن كۈلىدۇ. چۈنكى ئۇلار توپا دۆۋىلەپ قويۇپ ئۇلارنى ئىگىلىۋالىدۇ. ‏11 ئۇلار ئۆز كۈچىنى ئىلاھ دەپ ساناپ، گۇناھىنى ئاشۇرۇپ تۇرۇپ، بوراندەك ئۆتۈپ كېتىدۇ».

‏12 ئەي پەرۋەردىگار، مۇقەددەس خۇدايىم، سەن ئەزەلدىن تارتىپ بار بولغۇچى ئەمەسمۇ؟ بىز يوقالمايمىز! ئەي پەرۋەردىگار، سەن ئۇلارنى ھۆكۈم قىلىش ۋاسىتىسى قىلىپ بېكىتتىڭ. ئەي قورام تاش بولغۇچى، سەن ئۇلارنى جازالاشقا تەيىنلىدىڭ. ‏13 سېنىڭ كۆزلىرىڭنىڭ پاكلىقى ئۈچۈن يامانلىققا چىداپ تۇرالمايسەن، زۇلۇمغىمۇ قارىيالمايسەن. ئۇنداق بولسا، بۇ خىيلىگەرلەرگە قانداقمۇ قاراپ تۇرالايسەن؟ يامان كىشى ئۆزىدىن ياخشى بولغان كىشىنى يۇتۇپ كەتسە، قانداقمۇ شۈك تۇرالايسەن؟ ‏14 بۇ تەرىقىدە سەن ئادەملەرنى دېڭىزدىكى بېلىقلاردەك، پادىشاھى بولمىغان قۇرت-قوڭغۇزدەك قىلىپ قويىسەن.

‏15 بۇ كالدىيلار ئۇلارنىڭ ھەممىسىنى قارماققا ئىلىندۇرىدۇ، ئۆز تورى بىلەن ئۇلارنى تۇتۇۋېلىپ، تور خالتىسىغا سېلىپ يىغىدۇ، شۇنىڭ بىلەن خۇشال بولۇپ شادلىنىدۇ. ‏16 شۇنىڭ ئۈچۈن ئۇلار ئۆز تورىغا قۇربانلىق سۇنىدۇ، تور خالتىسىنىڭ ئالدىدا خۇشبۇي ئىسرىق كۆيدۈرىدۇ. چۈنكى بۇ ئەسۋابلار ئارقىلىق ئۇلارنىڭ نېسىۋىسى كۆپەيىدۇ، تائاملىرى ياغلىق بولىدۇ. ‏17 ئەمدى ئۇلار توختىماي تورىنى تولدۇرۇپ بوشىتامدۇ؟ خەلقلەرنى رەھىم قىلماي قىرغىن قىلىشتىن توختىمامدۇ؟