‏1 مانا، تاغلار ئۈستىدە ئامانلىقنى جاكارلاپ خۇش خەۋەر ئېلىپ كەلگۈچىنىڭ ئاياغلىرىنى كۆرگىن! ئەي يەھۇدا، ھېيتلىرىڭنى ئۆتكۈزگىن، بەرگەن ۋەدىلىرىڭنى ئادا قىلغىن، چۈنكى شۇ ۋەيران قىلغۇچى پۈتۈنلەي ھالاك بولۇپ كەتكەچكە، يەنە زېمىنىڭدىن ئۆتمەيدۇ. ‏2 مانا، پاراكەندە قىلغۇچى ساڭا قارشى چىقتى. قورغاننى قوغدىغىن، يولنى كۆزىتىپ تۇرغىن، بېلىڭنى چىڭ باغلىغىن، كۈچۈڭنى يىغىپ مۇستەھكەم بولغىن.

‏3 چۈنكى بۇلاڭچىلار ئۇنى بۇلاڭ-تالاڭ قىلىپ، ئۇنىڭ ئۈزۈم تاللىرىنى ۋەيران قىلغان بولسىمۇ، پەرۋەردىگار يەنە ياقۇبنىڭ شان-شەرىپىنى ئەسلىگە كەلتۈرىدۇ، دەرھەقىكەت ئىسرائىلنىڭ شان-شەرىپىنى قايتا تىكلەيدۇ. ‏4 ئۇنىڭ پالۋانلىرىنىڭ قالقانلىرى قىزىل بويالغان، ئۇنىڭ باتۇر ئادەملىرى توق قىزىل كىيىم كىيگەن. تەييارلىق كۈنىدە جەڭ ھارۋىلىرى ئوتتەك پارقىرايدۇ، نەيزىلەر ئوينىتىلىدۇ.

‏5 جەڭ ھارۋىلىرى كوچىلاردا چېپىپ ئالغا باسىدۇ، كەڭ يوللاردا بىر-بىرىدىن ئۇچۇپ ئۆتىدۇ. ئۇلار مەشئەللەردەك كۆرۈنىدۇ، چاقماقلاردەك ماڭىدۇ. ‏6 سەردار پالۋانلىرىنى قوزغايدۇ. ئۇلار ئالدىراپ بارغىنىدا يىقىلىپ قوپۇپ، شەھەرنىڭ سېپىلىغا قاراپ يۈگۈرىدۇ. ئۇ يەردە مۇھاسىرە قالقىنى تەييارلاپ قويۇلغان.

‏7 دەريالارنىڭ دەرۋازىلىرى ئېچىلىدۇ. ئوردا سۇدا ئېرىپ كېتىدۇ. ‏8 مۇنداق بېكىتىلگەن: ئۇ يالىڭاچ قىلىنىپ ئېلىپ كېتىلىدۇ. ئۇنىڭ دېدەكلىرى مەيدىلىرىگە ئۇرۇپ كەپتەردەك بۇقۇلدايدۇ. ^■  

‏9 نىنەۋە ئىلگىرىدىن بېرى سۇغا تولغان كۆلدەك بولغان بولسىمۇ، ئەمدى ئۇنىڭ ئاھالىسى قېچىپ كېتىدۇ. بىركىم «ئەي، توختاڭلار، توختاڭلار» دېسىمۇ، ھېچكىم بۇرۇلۇپ قايتمايدۇ. ‏10 ئالتۇن-كۈمۈشلەرنى بۇلىۋېلىڭلار! چۈنكى ھەشەمەتلىك خەزىنىنىڭ قىممەتلىك بۇيۇملىرىنىڭ سانى يوق. ‏11 ئەمدى ئۇ قۇرۇقدالغان، ۋەيران قىلىنغان، خارابە بولۇپ كەتكەن. يۈرەك ئېرىپ كېتىدۇ، تىزلار سۇسلىشىپ قالىدۇ، ھەربىرىنىڭ بېلى تولغاقتا بولغاندەك ئاغرىيدۇ، ھەممەيلەننىڭ يۈزلىرى تاتىرىپ كېتىدۇ.

‏12 شىرلارنىڭ ئۇۋىسى قېنى؟ ياش شىرلار ئوۋ يەيدىغان جاي، ئەركەك شىر، چىشى شىر بىلەن شىر بالىلىرى ھېچكىمدىن قورقماي يۈرگەن جاي ئەمدى قېنى؟

‏13 ئۆز بالىلىرى ئۈچۈن ئوۋنى تۇتۇپ يىرتقان، چىشى شىرلىرى ئۈچۈن ئوۋنى بوغقان شىر ئەمدى قېنى؟ ئۆز ئۇۋىلىرىدا ئوۋنى دۆۋىلەپ قويغان، غارلىرىنى يىرتىپ ئۆلتۈرۈلگەن مال بىلەن تولدۇرغان شىر ئەمدى قېنى؟

‏14 «مانا، مەن ساڭا قارشى تۇرۇپ، جەڭ ھارۋىلىرىڭنى كۆيدۈرۈۋېتىپ تۈتۈن قىلىۋېتىمەن، ئارسلانلىرىڭنى قىلىچتىن ئۆتكۈزىمەن، ئوۋلىرىڭنى يەر يۈزىدىن يوقىتىۋېتىمەن. ئەلچىلىرىڭنىڭ ئاۋازى يەنە ئاڭلانمايدۇ» دەيدۇ ساماۋى قوشۇنلارنىڭ سەردارى پەرۋەردىگار.